FCA મુજબ તથા NBWFની મંજૂરીઓ લેવાતી નથી
બાલારામ-અંબાજી અભયારણ્ય તથા તેના ઇકોઝોનમાં આ રીતે પ્રોજેક્ટો થઈ રહ્યાં છે !
'કેગ' દ્વારા રાજ્યના 6 અભયારણ્યો અંગે થયેલા લેટેસ્ટ ઑડિટ રિપોર્ટ જાહેર

રાજ્યના જંગલ વિસ્તારમાંથી અભયારણ્યોમાંથી ઈકો સેન્સિટિવ ઝોનમાંથી પસાર થતાં રસ્તાઓ પહોળા કરવા હોય, એમાંથી કોઈ વિકાસ યોજના પસાર કરવી હોય તો જંગલનો વિષય કન્કરન્ટ લિસ્ટમાં હોઈ વનસંરક્ષણ ધારા, 1980 હેઠળ કેન્દ્રના વન-પર્યાવરણ મંત્રાલયની તથા નેશનલ બોર્ડ ફોર વાઇલ્ડ લાઇફની પૂર્વમંજૂરી લેવાની હોય છે, પરંતુ ગુજરાતમાં એવી લાલિયાવાડી અને બેદરકારી ચાલે છે કે, કહેવાતા વિકાસ પ્રોજેક્ટો માટે કોઈ પૂર્વમંજૂરી જ લેવાતી નથી અને લેવાય છે, તો કામ પૂર્ણ થઈ ગયું હોય કે પતવા આવ્યું હોય ત્યારે મંજૂરી લેવાય છે. 'કેગ' દ્વારા રાજ્યના 6 અભયારણ્યો અંગે થયેલા લેટેસ્ટ ઑડિટ રિપોર્ટમાં આ બાબત ઉજાગર કરી આલોચના કરવામાં આવી છે, જેમ કે બાલારામ-અંબાજી અભયારણ્ય અને તેના ઇકો સેન્સિટિવ ઝોન વિસ્તારમાં દાંતા-અંબાજી રાજ્ય ધોરી માર્ગને પહોળા કરવા માટે ચેઇનેજ માપ 97થી 94/480 અને 101/400થી 102/352ના સંદર્ભમાં પરિયોજના ઘડાઈ હતી અને 13 જૂન-2018ના રોજ કાર્યઆદેશ આર એન્ડ બી દ્વારા બહાર પડયો હતો પણ એજન્સીએ 2020માં કામ પૂર્ણ કર્યું, એમાં 4 પૈકી 3 પેકેજમાં એફસીએ હેઠળ તથા નેશનલ બોર્ડ તરફથી પૂર્વમંજૂરી જ નવેમ્બર-22 સુધી લેવાઈ હતી, જ્યારે અન્ય એક પેકેજમાં કામ શરૂ થયા બાદમાં ઓગસ્ટ-2019માં તથા જુલાઈ-2020માં પૂર્વમંજૂરીઓ આવી હતી. 'કેગ' દ્વારા આ બાબતમાં નોંધાયું છે કે કાયદાનું ઉલ્લંઘન સરિયામ થયું છે અને પરિયોજનાની નકારાત્મક અસરોથી વનજીવન સંવેદનશીલ બન્યું છે. આવું જ ડાંગના પૂર્ણા અભયારણ્ય અને તેના ઇકો સેન્સિટિવ ઝોનમાંથી પસાર થતા વ્યારા-ભેંસ કાતરી-કાલીબેલ- પિંપરી રોડને પહોળો કરવાની યોજનામાં તથા શૂલપાણેશ્વર અભયારણ્યના ઇકો સેન્સિટિવ ઝોનમાંથી પસાર થતા દેવલિયાથી રાજપીપળા રાષ્ટ્રીય ધોરીમાર્ગને પહોળો કરવાની યોજનામાં બન્યું છે.

તારંગા-અંબાજી બ્રોડગેજ યોજનામાં હવે DFOનો ખુલાસો મગાશે

રાજ્યના જંગલ- ઇકો સેન્સિટિવ ઝોનમાં વગર મંજૂરીએ યોજનાઓ હાથ ધરાય છે!