સુરતમાં ફરી એક વખત હાઈ પ્રોફાઈલ પાર્ટી ઝડપાઈ છે. શહેરના ચલથાણ મરઘાં ફાર્મ પાસે ફાર્મ હાઉસમાં હાઈ પ્રોફાઈલ પાર્ટી ચાલી રહી હોવાની બાતમી મળતા જ પોલીસે રેડ પાડી છે. ફાર્મ હાઉસમાં કાપડના વેપારીઓ દારૂની પાર્ટી કરી રહ્યા હતા. સુત્રો દ્વારા મળતી માહિતી મુજબ કાપડ વેપારીઓ અને GST કૌભાંડીઓની પાર્ટી ચાલી રહી હતી.
કાપડના વેપારીઓની ફાર્મ હાઉસમાં હતી દારુ પાર્ટી
ત્યારે આ હાઈ પ્રોફાઈલ પાર્ટી પર પોલીસે રેડ પાડતા જ કાપડના વેપારીઓ ચોંકી ગયા અને ભાગવાનો પ્રયાસ કર્યો પણ તેમાં તેઓ ફાવ્યા નહીં. તમને જણાવી દઈએ કે આ પાર્ટીમાં ભારતીય અને થાઈ યુવતીઓ પણ સામેલ હતી. પોલીસે દારૂની મહેફિલ માણતા 9 આરોપીઓને પકડી પાડ્યા છે. કડોદરા પોલીસે આ પાર્ટી પર કડક કાર્યવાહી કરતા રેડ પાડી અને આરોપીઓને સકંજામાં લઈ લીધા છે.
ફાર્મ હાઉસમાં લગાવેલા CCTVના DVR પોલીસે કબજે કર્યા
હાલમાં ફાર્મ હાઉસ પરથી પોલીસે વ્હીસ્કી અને દારૂની બોટલો કબજે કરી લીધી છે. આ સિવાય કાર સહિત 11 મોબાઈલ ફોન મળીને કુલ રૂપિયા 6 લાખથી વધુનો મુદ્દામાલ કબ્જે કરવામાં આવ્યો છે. પોલીસે ફાર્મ હાઉસમાં લગાવેલા CCTVનું DVR પણ કબ્જે કર્યું છે. કડોદરા પોલીસે તમામ વિરુદ્ધ ગુનો નોંધીને કાયદેસરની કાર્યવાહી હાથ ધરી છે.
