જૂનાગઢ મહાપાલિકાની 52 બેઠક માટે ગઈકાલે રવિવારે મતદાન યોજાયું હતું, સાંજના છ વાગ્યા સુધીમાં 44.32 ટકા મતદાન જે ગત (ચૂંટણી 2019) ની સરખામણીએ 5.36 ટકા ઓછુ મતદાન થતા મતદારો અનેક સસ્પેન્સ સર્જ્યા છે અને જેનાથી રાજકીય પક્ષોના ગણિત ઉંધા પડયા છે, તો અનેક રાજકીય નેતાઓની શાખ દાવ ઉપર લાગી છે. કારણ કે, ગત ચુંટણીમાં સ્પષ્ટ બહુમતી સાથે ભાજપની સરકાર બની હતી, પરંતુ આ વખતે શું પરિણામ આવે છે, તેના ઉપર સૌની મીટ છે. ભાજપ, કોંગ્રેસ સહિત રાજકીય પક્ષોના 157 ઉમેદવારોનું ભાવિ આવતીકાલે ખૂલશે.
2004માં જૂનાગઢમાં મહાપાલિકા અસ્તિત્વમાં આવી હતી. ત્યારથી લઈને અત્યાર સુધીનો ઈતિહાસ જોઈએ તો, 2004માં 17 વોર્ડની 51 બેઠક પૈકી ભાજપને 36 બેઠક, કોંગ્રેસને 14 બેઠક, 1 અપક્ષને બેઠક મળી હતી, તો વર્ષ 2009 માં 17 વોર્ડની 51 બેઠકમાંથી 21 બેઠક ભાજપને ફળે, તો 26 બેઠક કોંગ્રેસને ફળે આવેલ, જયારે 4 અપક્ષ ઉમેદવારો વિજેતા થયા હતા. વર્ષ 2014માં 20 વોર્ડની 60 બેઠકમાંથી 41 બેઠક ભાજપને મળેલી.
