Gujarat latest News Updated: IMDની આગાહી દિલ્હીમાં બુધવારે હવામાન કેવું રહેશે, જાણો

IMDની આગાહી દિલ્હીમાં બુધવારે હવામાન કેવું રહેશે, જાણો

IMD અનુસાર, દિલ્હી અને NCRની આસપાસના વિસ્તારોમાં 40 થી 70 કિલોમીટર પ્રતિ કલાકની ઝડપે ધૂળની ડમરીઓ, વરસાદ અને જોરદાર પવન ફૂંકાવાની સંભાવના છે. આ સાથે બુધવારે હળવા વાદળો છવાયેલા રહેશે. દિવસ દરમિયાન ભારે પવન ફૂંકાશે. મહત્તમ તાપમાન 37 ડિગ્રી સેલ્સિયસ હોઈ શકે છે.

ACBની ટ્રેપમાં 5 લાખ રૂપિયાની લાંચ લેતા વચેટિયો ઝડપાયો

એક તરફ રાજ્ય સરકાર જ્યાં ભ્રષ્ટાચાર મુક્ત ભારત અને રાજ્ય બનાવવાના વચનો આપી રહી છે ત્યારે સરકારી અધિકારીઓ અને કર્મચારીઓ જ ભ્રષ્ટાચારના ખપ્પરમાં ખદબદી રહ્યા હોય તેવો ઘાટ ઘડાયો છે. સુરતમાં ACBએ સપાટો બોલાવીને 5 લાખની લાંચ લેતા વચેટિયાને ઝડપી પાડ્યો છે.

49,140 મતદાન મથકો પર યોજાશે લોકસભા ચૂંટણી

આગામી 7મી મેના રોજ ગુજરાતની 26 લોકસભા બેઠકોની ચૂંટણી માટે ત્રીજા તબક્કાનું મતદાન યોજાશે. તો સાથે સાથે ગુજરાત વિધાનસભાની 5 બેઠકો પર પેટાચૂંટણીઓ પણ યોજવા જઈ રહી છે. તો ગુજરાતની 26 લોકસભા બેઠકોની ચૂંટણી અને 5 વિધાનસભા બેઠકોની પેટાચૂંટણીને લઈને તમામ તૈયારીઓ પૂર્ણ થઈ ગઈ છે.

સરદાર બાગ સ્વીમીંગ પુલમાં મહિલાના મોતથી ખળભળાટ

વડોદરાથી એક આવી જ ચોંકાવનારી ઘટના સામે આવી છે જેમાં સ્વિમિંગ પુલમાં સ્વિમિંગ કરીને બહાર આવેલી મહિલાની અચાનક તબિયત બગડી. જ્યારે તેને હોસ્પિટલ લઈ જવામાં આવી તો હોસ્પિટલના તબીબોએ તેને મૃત જાહેર કરી.

MS Dhoni પાસે આવ્યો છેલ્લો બોલ, પ્રેક્ષકોની ચિચિયારીઓથી ગુંજ્યુ સ્ટેડિયમ

IPL 2024માં 39મી મેચ ચેન્નાઈ સુપર કિંગ્સ અને લખનૌ સુપર જાયન્ટ્સ વચ્ચે રમાઈ રહી છે. આ મેચમાં લખનૌએ ટોસ જીતીને પ્રથમ બોલિંગ કરવાનો નિર્ણય કર્યો હતો. જે બાદ પ્રથમ બેટિંગ કરતા CSKએ 20 ઓવરમાં 4 વિકેટ ગુમાવીને 210 રન બનાવ્યા હતા. 19.4 ઓવર પછી શિવમ દુબે રન આઉટ થતા એમએસ ધોની બેટિંગ કરવા આવ્યા હતા. આખું સ્ટેડિયમ ધોનીની રાહ જોઇ રહ્યું હતુ.

લોટસ સ્કૂલે નાપાસ વિદ્યાર્થીઓને LC લેવા દબાણ કરતાં રોષ

અમદાવાદની લોટસ સ્કૂલ વિરુદ્ધ સ્કૂલના વાલીઓ દ્વારા DEO કચેરી ખાતે ફરિયાદ કરવામાં આવી છે. વાલીઓની ફરિયાદ છે કે જોધપુર ખાતે આવેલી લોટસ સ્કૂલ દ્વારા બાળકોના ભવિષ્ય સાથે ચેડાં કરવામાં આવ્યા છે. લોટસ સ્કૂલ દ્વારા નાપાસ થયેલા વિદ્યાર્થીઓને LC લઈ જવા માટે દબાણ કરવામાં આવ્યું હોવાનો આરોપ લાગ્યો છે.

અચાનક જમીન ધસી જવીથી કારણે મોટો ખાડો પડ્યો, ભીડ રીલ બનાવવા લાગતાં પ્રશાસને કલમ 144 લગાવી

થોડા દિવસો પહેલા રાજસ્થાનના બિકાનેર જિલ્લાના લુંકરનસર તાલુકા વિસ્તારના સહજરાસર ગામમાં 1.5 વીઘા જમીન 100 ફૂટ ડૂબી ગઈ હતી. જમીન ખસી ગયા પછી, અહીંનો નજારો એવું લાગે છે કે જાણે તે કોઈ વિદેશી દેશનું ભૂસ્તરશાસ્ત્રીય સ્થળ હોય. આવી સ્થિતિમાં લોકો સેલ્ફી લેવા અને રીલ બનાવવા માટે આ જગ્યાએ આવી રહ્યા છે. પોલીસ આ સ્થળે કલમ 144 લગાવી રહી છે.

ભરતપુર પોલીસે રોકડ સહિત 15 કરોડનો સામાન જપ્ત કર્યો

ચૂંટણી આચારસંહિતા લાગુ થયા બાદ રાજસ્થાન પોલીસ એક્શન મોડમાં છે. ભરતપુરમાં વાહનોના ચેકિંગ દરમિયાન પોલીસને મોટી સફળતા મળી છે. પોલીસે રોકડ સહિત અંદાજે 15 કરોડનો સામાન કબજે કર્યો છે. લોકસભાની ચૂંટણી શાંતિપૂર્ણ અને ભયમુક્ત બને તે માટે પોલીસ અધિક્ષકે જિલ્લાની સરહદે નાકાબંધી કરવાનો આદેશ આપ્યો છે. ભરતપુર જિલ્લો તેની સરહદો અન્ય રાજ્યો સાથે વહેંચે છે.

રાજસ્થાનમાં માર્ગ અકસ્માતમાં 3 પોલીસકર્મીઓના દુ:ખદ મોત

રાજસ્થાનના નીમકથાણા જિલ્લામાં મંગળવારે એક દર્દનાક અકસ્માત થયો, જ્યાં રોડીઝથી ભરેલી ટ્રોલી કાબૂ બહાર ગઈ અને પોલીસ જીપ પર પલટી ગઈ. આ ભયાનક માર્ગ અકસ્માતમાં ત્રણ પોલીસકર્મીઓ કચડાઈ ગયા હતા. મુખ્યમંત્રી ભજનલાલ શર્મા અને પૂર્વ સીએમ વસુંધરા રાજે સિંધિયાએ પણ આ દુર્ઘટના પર શોક વ્યક્ત કર્યો છે.

જુનાગઢ કેશોદમાં ફૂડ પોઇઝનિંગની ઘટના બની

જુનાગઢના કેશોદમાં બાલાગામ વાડી વિસ્તારમાં ફૂડ પોઈઝનિંગની ઘટના બની છે. આ ઘટનામાં કુલ 6 લોકોને ગંભીર અસર થઈ છે અને તમામ અસરગ્રસ્તોને હોસ્પીટલમાં ખસેડાયા છે. એક જ પરીવારના સભ્યોએ ભોજન લીધા બાદ તબિયત લથડી હતી.

દિલ્હી - NCRમાં હવામાન અચાનક બદલાયુ

દિલ્હી - NCRમાં હવામાનની પેટર્નમાં અચાનક ફેરફાર જોવા મળ્યો હતો. અનેક વિસ્તારોમાં ધૂળની ડમરીઓ સાથે વરસાદ પડ્યો હતો. હવામાન વિભાગે આજે દિલ્હીમાં આંધી અને હળવા વરસાદની આગાહી કરી હતી. વાવાઝોડાને લઈને સમગ્ર દિલ્હીમાં હવામાન વિભાગ દ્વારા યલો એલર્ટ જારી કરવામાં આવ્યું છે.

રામ નવમી પર હિંસા ફાટી નીકળી ત્યાં લોકસભાની ચૂંટણી નહીં થાય, કલકત્તા હાઈકોર્ટે શા માટે આપી આ ચેતવણી?
પશ્ચિમ બંગાળમાં રામ નવમી પર ફાટી નીકળેલી સાંપ્રદાયિક હિંસા પર કોલકત્તા હાઈકોર્ટે નારાજગી વ્યક્ત કરી છે. મંગળવારે 23 એપ્રિલ, 2024એ કોર્ટે ચેતવણી આપી હતી કે, તે આ વર્ષે જ્યાં સાંપ્રદાયિક હિંસા ફાટી નીકળી છે ત્યાં લોકસભા ચૂંટણી 2024 માટે મંજૂરી આપશે નહીં. જો લોકો શાંતિથી ઉજવણી ન કરી શકે તો ચૂંટણી પંચને અમારી ભલામણ છે કે આવા મતવિસ્તારોમાં ચૂંટણી ન યોજવી જોઈએ.

ચૂંટણી કમિશ્નર, પી. ભારતીએ પ્રેસ કોન્ફરન્સ કરી સુરક્ષા અને મતદારોને લઈ આપી જાણકારી

લોકસભામાં 266 અને વિધાનસભામાં કુલ 24 ઉમેદવાર છે, 12 લાખ કરતાં વધુ લોકો પ્રથમવાર મતદાન કરશે. અમદાવાદ પૂર્વ બેઠક પર 2 EVM મુકવામાં આવશે. 22,700 મતદારોએ હોમ વોટિંગ માટે અરજી કરી.

2જી કૌભાંડ કેસમાં ચુકાદાના 12 વર્ષ બાદ કેન્દ્ર સરકાર ફરીથી SCમાં પહોંચી, આદેશમાં સુધારાની માંગ કરી

2જી કૌભાંડ કેસમાં સુપ્રીમ કોર્ટના નિર્ણયના 12 વર્ષ બાદ કેન્દ્ર સરકારે આદેશમાં સુધારાની માગણી સાથે સુપ્રીમ કોર્ટનો સંપર્ક કર્યો છે. કેન્દ્ર સરકારે સ્પેક્ટ્રમ સંસાધનોની ફાળવણી માટે હરાજીનો માર્ગ અપનાવવો જરૂરી છે તે શરતમાં સુધારો કરવા માંગે છે. કેન્દ્રએ કાયદા મુજબ વહીવટી પ્રક્રિયા દ્વારા ફાળવણી કરવાની માંગ કરી છે.

લોકસભાની ચૂંટણીને લઈને ભાજપનો પ્રચંડ પ્રચાર

PM મોદી અને અમિત શાહ ગુજરાતમાં ચૂંટણી પ્રચાર શરૂ કરશે. ગુજરાતના સ્થાપના દિવસે PM મોદી ગુજરાત આવશે. PM મોદી 1 મેના રોજ દાહોદમાં સભા કરશે. PM મોદી દાહોદ અને પંચમહાલ લોકસભા માટે સભા કરશે.  27 અને 28 એપ્રિલે અમિત શાહ ગુજરાત આવશે. આ સાથે ગુજરાતના અલગ અલગ ઝોનમાં અમિત શાહ સભા કરશે. 

 બનાસકાંઠામાં ભમરાનો આતંક, 50થી વધુને ડંખ માર્યા

ઢીમા ગામે શોભાયાત્રા દરમિયાનન આ ઘટના સામે આવી છે. અહીં 50થી વધુ લોકોને ભમરા કરડતા ઈજાગ્રસ્ત થયા છે. તમામ લોકોને સારવાર માટે હોસ્પિટલ ખસેડવામાં આવ્યા છે. 

MP: દિગ્વિજય સિંહના ગઢમાં કોંગ્રેસને ઝટકો

મધ્યપ્રદેશમાં દિગ્વિજય સિંહના ગઢમાં કોંગ્રેસને આજે ઝટકો લાગ્યો છે. ટીકમગઢ લોકસભાના કોંગ્રેસ અને અન્ય પક્ષોના લગભગ 20 નેતાઓ ભાજપમાં જોડાયા છે. તેમણે ભાજપના રાષ્ટ્રીય અધ્યક્ષ જેપી નડ્ડાની હાજરીમાં પાર્ટીનું સભ્યપદ લીધું.

હવામાનની આગાહીઃ 3 દિવસ બાદ ફરીથી ગરમી વધશે

વાતાવરણ અંગે હવામાન વિભાગની અગાહી સામે આવી છે. જેમાં કહેવાયું છે કે આગામી 3 દિવસ બાદ ફરી તાપમાન 2થી 3 ડીગ્રી વધશે. અમદાવાદમાં ગઈકાલે સૌથી વધુ 39 ડિગ્રી તાપમાન રહ્યું હતું તો સાથે જ આગામી દિવસોમાં તાપમાન 40 ડિગ્રી આસપાસ જશે તેવી આગાહી કરવામાં આવી છે. 

વલસાડઃ આંગળી પર વોટિંગનું નિશાન નહીં તો રજા નહીં ભરાયઃ રમણ પાટકર

GIDCમાં કામ કરતા કામદારોને કડક શબ્દોમાં ચીમકી આપવામાં આવી છે. આ ચીમકી વોટિંગને લઈને આપવામાં આવી છે. 7 મેના રોજ મતદાન માટે રજા આપી છે.  તમારી આંગળી પર મતદાનનું નિશાન હોવુ જોઇએ. નિશાન ન હોય તો તમારી રજા ભરવામાં આવશે નહીં. 

અમદાવાદમાં રાજસ્થાન હિન્દી હાઈસ્કૂલમાં એડમિશનને લઈને હોબાળો

શાળાએ ધો 8માંથી પાસ થયેલા બાળકોને ધો9માં લેવાનો ઈન્કાર કરતા વાલીઓમાં રોષનો માહોલ જોવા મળી રહ્યો છે.  શાહીબાગની રાજસ્થાન હિન્દી હાઈસ્કૂલમાં વાલીઓનો હોબાળો જોવા મળ્યો છે.  શાળાએ વાલીઓને શિક્ષકો ન હોવાથી અન્ય સ્કૂલમાં એડમિશન લેવા સૂચના આપવામાં આવી છે. હિન્દીને બદલે અંગ્રેજી માધ્યમમાં એડમિશન લેવા કહેવાયું છે. તો સાથે જ 1-2 નહીં કુલ 56 વિદ્યાર્થીઓના એડમિશન અટક્યા હોવાથી વાલીઓમાં રોષ જોવા મળી રહ્યો છે.

ન તો કોંગ્રેસ સત્તામાં આવવાની છે કે ન તો CAA રદ થશે: શાહ

કેન્દ્રીય ગૃહ પ્રધાન અમિત શાહે સીએએ રદ્દ કરવા અંગે પી ચિદમ્બરમની ટિપ્પણી પર વળતો પ્રહાર કરતા કહ્યું કે કોંગ્રેસ જાણે છે કે તે વિકાસના મુદ્દા પર મોદીજી સામે ચૂંટણી લડી શકે નહીં, તેથી તે તુષ્ટિકરણની રાજનીતિ કરીને પોતાની વોટબેંક ભેગી કરવાનો પ્રયાસ કરી રહી છે. તે CAA પાછી ખેંચી લેશે તેવા નિવેદનો આપી રહી છે. પરંતુ ન તો કોંગ્રેસ સત્તામાં આવવાની છે કે ન તો CAA રદ થશે.

નિલેશ કુંભાણીના ઘર બહાર કોંગ્રેસના કોર્પોરેટરનો વિરોધ

ભાજપમાં જોડાવાની વાત વચ્ચે કુંભાણી સંપર્ક વિહોણા થયા છે. જનતાના ગદ્દાર બેનર સાથે કુંભાણીનો વિરોધ કરાઈ રહ્યો છે. કુંભાણીના ઘરે વિરોધ કરતા કાર્યકરોની અટકાયત કરી દેવામાં આવી છે. બેનર સાથે પૂર્વ કોર્પોરેટર દ્વારા વિરોધ પ્રદર્શન થઈ રહ્યું છે. સરથાણામાં આવેલ કુંભાણીના ઘરે 3 દિવસથી તાળા છે. નિલેશ કુંભાણી ક્યાં છે તેની કોઈને નથી ખબર. શહેરના પ્રમુખને પણ નથી ખબર કે કુંભાણી ક્યાં છે. દિનેશ સાવલિયા અને ભારતી પટેલે વિરોધ નોંધાવ્યો છે.

લોકસભાની ચૂંટણીમાં ભાજપના પ્રચાર માટે 5 સોન્ગ લોન્ચ કરાયા

ભાજપના પ્રચાર માટે 5 સોન્ચ લોન્ચ કરાયા છે. CM અને સી.આર.પાટીલના હસ્તે પ્રારંભ થયો છે. અલગ અલગ 3 નૃત્ય કૃતિઓ પણ રજૂ કરાશે. દરેક લોકસભામાં ટેબ્લો દ્વારા પ્રચાર કરાશે. પ્રચાર માટે 10 ટેબ્લો રજૂ કરાયા છે. ભાજપ પ્રચાર સામગ્રી પણ ઘર ઘર સુધી પહોંચાડશે. અલગ અલગ 80 વસ્તુઓથી પ્રચાર કીટ બનાવાઈ છે. 

ક્ષત્રિય સમાજના આંદોલન મુદ્દે સૌથી મોટા સમાચાર

રાજકોટમાં ક્ષત્રિય આંદોલનકારીઓ એકાએક નિષ્ક્રિય થયા. આંદોલન ઠંડુ પાડવા બંધ બારણે બેઠક થઈ હોવાની ચર્ચા પણ છે. 3 દિવસથી અનેક ક્ષત્રિય મહિલા મીડિયાથી દૂર છે. ક્ષત્રિય માટે લડવાની વાતો કરનાર ક્ષત્રાણીનું ગ્રુપ નિષ્ક્રિય બન્યું છે. ભાજપ સાથે બંધ બારણે બેઠક થઈ હોવાની ચર્ચાઓ પણ છે. મીડિયા દ્વારા સંપર્ક કરવામાં આવતા ફોન બંધ આવી રહ્યા છે.

લોકસભા ચૂંટણી પહેલા ભરૂચ કોંગ્રેસમાં ભંગાણ

કોંગ્રેસના નેતા યોગી પટેલે રાજીનામું આપ્યું.  યોગી પટેલ NSUIના ગુજરાત પ્રદેશના ઉપપ્રમુખ છે. યોગી પટેલ દક્ષિણ ગુજરાતના પ્રભારી પણ હતા. રાજીનામું આપવાનું કારણ હજી અકબંધ છે.

દિલ્હી CM કેજરીવાલને ઇન્સ્યુલિન અપાયુ

કેજરીવાલનું શુગર લેવલ સતત વધી રહ્યું હતું, EDની ધરપકડ બાદ પ્રથમ વખત ઇન્સ્યુલિન અપાયુ.  કેજરીવાલનું શુગર લેવલ 320 સુધી પહોંચી ગયું હતું.

 ક્ષત્રિય સમાજનો રોષ ઠારવા ભાજપના પ્રયાસ

ક્ષત્રિય સમાજના રોષને ઠારવા ભાજપ હરકતમાં આવ્યું છે. મતદાન પર અસર ન પડે તે માટે ભાજપ સક્રિય થયું છે. ગૃહ રાજ્યમંત્રી હર્ષ સંઘવી બેઠકો કરી રહ્યાં છે. ક્ષત્રિય બહુલ જિલ્લાઓમાં સંઘવીની બેઠકો થઈ રહી છે. આજે પણ ક્ષત્રિય આગેવાનો સાથે બેઠક યોજાશે. બનાસકાંઠા, આણંદમાં ક્ષત્રિય આગેવાનો સાથે સંઘવીની બેઠક થશે અને આવતીકાલથી ક્ષત્રિય સમાજનું ધર્મરથ કાઢવાનું આયોજન છે. 

રાજ્યમાં 2 દિવસ બાદ તાપમાન ઉંચકાવવાની આગાહી

મોટાભાગના શહેરોમાં ગરમીના તાપમાનમાં ઘટાડો થયો છે. પવનની દિશા બદલાતા તાપમાન ઘટ્યું છે. અમદાવાદ, કંડલા અને અમરેલીમાં 39 ડિગ્રી તાપમાન છે તો ગાંધીનગરમાં 38.6 ડિગ્રી ,સુરતમાં 38 ડિગ્રી તાપમાન, ભાવનગરમાં 38.2 ડિગ્રી, રાજકોટમાં 38.6 ડિગ્રી તાપમાન, સુરેન્દ્રનગરમાં 38.7 ડિગ્રી, મહુવામાં 38.8 ડિગ્રી તાપમાન, ડીસામાં 37.8 ડિગ્રી, વડોદરામાં 37.9 ડિગ્રી તાપમાન, ભુજમાં 37.6 ડિગ્રી, કેશોદમાં 37.8 ડિગ્રી તાપમાન જોવા મળ્યું છે. 

સલમાન ખાનના ઘરે ફાયરિંગ મુદ્દે મોટા સમાચાર

આ કેસમાં તાપી નદીમાં ફેંકાયેલી 2 રિવોલ્વર મળી આવી છે. શૂટરોએ રિવોલ્વર તાપી નદીમાં ફેંકી હતી. બન્ને રિવોલ્વરમાંથી બુલેટ્સ પણ મળી આવી છે. મુંબઈ ક્રાઇમ બ્રાન્ચે સુરતમાં તપાસ શરૂ કરી હતી. ક્રાઈમ બ્રાન્ચની બાંદ્રા યુનિટ 9એ સુરતમાં તપાસ કરી અને સાથે જ એન્કાઉન્ટર સ્પેશિયાલિસ્ટ દયા નાયકના હાથમાં કેસ આપવામં આવ્યો છે. 

સુરતમાં ભાજપ બિનહરીફ થયા બાદ મોટા સમાચાર

કોંગ્રેસ નેતા નિલેશ કુંભાણી ભાજપમાં જોડાશે. સુરત લોકસભાથી કુંભાણીએ ઉમેદવારી નોંધાવી હતી. ચૂંટણીપંચે નિલેશ કુંભાણીનું ફોર્મ રદ્દ કર્યું હતું. હવે ગુરુવારે કુંભાણી ભાજપમાં જોડાશે. 

સાળંગપુરમાં હનુમાન જયંતીની ઉજવણી

વહેલી સવારથી દર્શન માટે હરિભક્તો ઉમટ્યા છે. મંદિર જય હનુમાનના નાદથી ગુંજી ઉઠ્યું છે. આજે CM પણ સાળંગપુર હનુમાનજીના દર્શન કરશે. 

PM મોદીનો રાજસ્થાન અને છત્તીસગઢમાં પ્રચાર

ગૃહમંત્રી અમિત શાહનો આજે બંગાળ અને કર્ણાટકમાં પ્રચાર શરૂ થશે. આ સાથે દક્ષિણ બેંગ્લોર બેઠકમાં અમિત શાહનો રોડ શો થશે. બાબા રામદેવ વિરુદ્ધ કેસ મુદ્દે સુપ્રીમ કોર્ટમાં સુનાવણી પણ થશે. જેમાં પતંજલિની ભ્રામક જાહેરાત મુદ્દે અરજી પર સુનાવણી કરાશે. અરવિંદ કેજરીવાલની અરજી મુદ્દે સુપ્રીમ કોર્ટમાં સુનાવણી થશે અને તેમને કોર્ટમાં રજૂ પણ કરાશે. 

રાજ્યમાં લોકસભાની ચૂંટણીમાં ચિત્ર સ્પષ્ટ થયું

રાજ્યમાં 25 બેઠકો પર ચૂંટણી માટે મતદાન યોજાશે. સુરત બેઠક ભાજપ તરફી બિનહરીફ જાહેર  કરી દેવામાં આવી છે. હવે 25 બેઠકો પર 265 ઉમેદવારો ચૂંટણીના મેદાનમાં છે. સૌથી વધુ અમદાવાદ પૂર્વ બેઠક પર 18 ઉમેદવારો, તો સૌથી ઓછા બારડોલી બેઠક પર 3 ઉમેદવારો અને બનાસકાંઠામાં બે મહિલા ઉમેદવારો વચ્ચે ટક્કર જામશે. 12 બેઠકો પર કુલ 19 મહિલા ઉમેદવારો જોવા મળી રહ્યા છે.