કાર વેચી નાણાં ઓહિયા કરવા માટે જાણીતા નામચીન અભિષેક નંદવાણીની રાંદેર પોલીસે ધરપકડ કરી જેલભેગો કરી દીધો હતો. લોકોને ટોપી પહેરાવવામાં માહેર બહુનામધારી નંદવાણી અનેક ગંભીર ગુનાનો ઈતિહાસ ધરાવે છે. મળતી વિગતો પ્રમાણે રાંદેરની પુનિતનગર સોસાયટીમાં રહેતા જમીન દલાલ દેવેન્દ્ર રાજારામ વ્યાસની પાસે ઓળખીતા હિમાંશુ નામના દલાલ મારફતે અભિષેક નંદવાણી તેમને નાણાની તાત્કાલિક જરૂર હોવાથી હુન્ડાઈ વર્ના કાર વેચવા માંગે છે એવું જણાવી રૂ. ૧૫.૨૧ લાખમાં સોદો નક્કી કર્યો હતો.
[[$googlead]]
કારના રૂપિયા આપી દઈશ તેમ કહીને કાર લઈ ગયો આરોપી
વેચાણની રકમ ચૂકવી 27 ઓગસ્ટે કારને દેવેન્દ્ર વ્યાસે પોતાના ઘર પાસે મૂકી હતી, પરંતુ સવારે કાર ગાયબ હતી. દેવેન્દ્રે જોયું તો મોબાઈલ પર અભિષેક નંદવાણીનો મેસેજ હતો કે હું કાર લઇ ગયો છું, હું કારના નાણાં પરત કરી દઈશ. ત્યારબાદ નાણાંની ઉઘરાણી કરતાં અભિષેક નંદવાણી ગલ્લાંતલ્લાં કરવા લાગ્યો હતો અને કાર કે નાણાં પરત નહીં કરીને છેતરપિંડી કરી હતી.
દુખાવારૂપ બનેલો અભિષેક કાર વેચાણ કરીને પણ અનેક ટોપી ફેરવી ચૂક્યો છે
દેવેન્દ્ર વ્યાસે ગત નવેમ્બર માસમાં રાંદેર પોલીસ મથકમાં રીઢા ઠગ અભિષેક સુરેશકુમાર નંદવાણી (રહે. જોલી રેસિડન્સી, વેસુ)
અને અંશુ ગિરીશકુમાર અરોરા (રહે. ન્યૂ પ્રાચી ટાવર, ભાયંદર વેસ્ટ, મુંબઇ) વિરુદ્ધ ફરિયાદ નોંધાવી હતી. જે ગુનામાં રાંદેર પોલીસે અભિષેક નંદવાણીની ધરપકડ કરી જેલહવાલે કર્યો હતો. અનેક ઠગ કારનામાથી વેપારીઓ માટે માથાના દુખાવારૂપ બનેલો અભિષેક કાર વેચાણ કરીને પણ અનેક ટોપી ફેરવી ચૂક્યો છે. નંદવાણીએ અગાઉ એક મહિલા પાસેથી કાર વેચાણ પેટે છેતરપિંડી કરી હતી. તે ઠગવિદ્યા માટે અનેક નામો ધારણ કરે છે. અગાઉ તેણે ઈલેક્ટ્રોનિક શોપમાંથી ઈન્વર્ટર એસી તેમજ અઠવાલાઈન્સ સેવાસદન સામે કેમેરો લઈ જઈને પણ ઠગાઈ આચરી હોવાની ફરિયાદ પોલીસમાં થઈ હતી.
