- મેચ જોવા માટે લોકોનો ભારે ધસારો
- ટિકિટ લેવા માટે પણ લોકોની લાંબી લાઈન
- મોટેરાં સ્ટેશન પર પણ ભારે ભીડ
એક તરફ સ્ટેડિયમમાં મેચ જોવા માટે પ્રવેશ આપવાની શરૂઆત થઈ ગઈ છે. ત્યાં બીજી તરફ અમદાવાદમાં લોકો સ્ટેડિયમ પહોંચવા માટે મેટ્રોમાં પડાપડી કરી રહ્યા છે. અમદાવાદ મેટ્રો ટ્રેન સવારથી જ હાઉસફૂલ જોવા મળી રહી છે. તેમજ સ્ટેશન પર ટિકિટ માટે પણ લાંબી લાઈન લાગી છે. મેટ્રો ઇન્ટર ચેન્જ થાય ત્યાં લોકોની ખૂબ ભીડ જોવા મળી રહી છે. મેટ્રો ટ્રેનમાં બધા લોકો વાદળી ટી શર્ટમાં જ જોવા મળી રહ્યાં છે.
ભારત અને ઓસ્ટ્રેલિયા વચ્ચે આજે અમદાવાદના નરેન્દ્ર મોદી સ્ટેડિયમાં મહામુકાબલો થઈ રહ્યો છે. ત્યારે મેચ જોવા માટે મોટી સંખ્યામાં લોકો મેટ્રોનો ઉપયોગ કરી રહ્યા છે. પરંતુ મેટ્રોના સમયમાં વધારો કરવામાં આવ્યો છતાં પણ મેચ જોવા માટે દર્શકોની ભારે ભીડ જોવા મળી રહી છે. મેટ્રો ટ્રેનના બે પિલરથી લઈ સ્ટેડિયમના ગેટ સુધી ખીચોખીચ ભીડ છે. બહાર એટલી બધી ભીડ છે કે પોલીસના વાહનો પણ ભીડમાં ફસાયા હતા.
નરેન્દ્ર મોદી સ્ટેડિયમ સુધી પહોંચવા માટે સૌથી સરળ ઉપાય મેટ્રો ટ્રેન છે. સવારના 6 વાગ્યાથી દર 12 મિનિટે મેટ્રો મળી રહેશે, જે રાત્રિના 1 વાગ્યા સુધી કાર્યરત રહેશે .મેટ્રો સ્ટેશન માત્ર 100 મીટર જ દૂર છે, જેથી લોકો સરળતાથી અને જલદીથી સ્ટેડિયમ પહોંચી શકશે. મેટ્રોમાં બેસવા માટે લોકોએ સ્ટેશનો પર લાંબી લાઈન લગાવી છે.
પૂર્વ વિસ્તારમાંથી વસ્ત્રાલથી થલતેજની મેટ્રો ટ્રેનમાં બેસીને મોટેરા ખાતે નરેન્દ્ર મોદી સ્ટેડિયમ પહોંચવું હોય તો એના માટે ઇન્કમટેક્સ મેટ્રો સ્ટેશન ખાતે ટ્રેન બદલવી પડશે. ઇન્કમટેક્સ મેટ્રો સ્ટેશનથી મોટેરા સ્ટેડિયમ તરફ જતી ટ્રેનમાં તમારે બેસીને જવું પડશે. જો એસજી હાઈવે, બોપલ, બોડકદેવ, હેલ્મેટ ચાર રસ્તા, મેમનગર, આનંદનગર, પ્રહલાદનગર તરફથી જો તમે આવવા માગતા હોવ તો થલતેજની મેટ્રો ટ્રેનમાં બેસીને તમારે ઇન્કમટેક્સ ખાતે ટ્રેન બદલવી પડે અને મોટેરા તરફ જતી ટ્રેનમાં બેસવું પડશે.
[[$googlead]]
