સુરેન્દ્રનગર જિલ્લાના ગ્રામજનો અને શહેરી વિસ્તારો માટે એક મહત્વપૂર્ણ સમાચાર છે. આગામી 4 દિવસ સુધી જિલ્લાના મોટા ભાગના વિસ્તારોમાં પાણીનો પુરવઠો બંધ રાખવાનો નિર્ણય લેવામાં આવ્યો છે.
2 ડિસેમ્બરથી 5 ડિસેમ્બર સુધી પાણી બંધ
પાણી પુરવઠા અને ગટર વ્યવસ્થા બોર્ડ દ્વારા જાહેરાત કરવામાં આવી છે કે આગામી 2 ડિસેમ્બરથી 5 ડિસેમ્બર સુધી, એટલે કે સતત ચાર દિવસ, જિલ્લાના 300થી વધુ ગામોમાં પાણીનું વિતરણ સંપૂર્ણપણે બંધ રહેશે.પાણી પુરવઠો બંધ થવાનું મુખ્ય કારણ ધોળીધજા ડેમ ખાતેનું સમારકામ છે. ડેમ પર આવેલા રો-વોટર ભૂગર્ભ સ્ટેશનમાં મહત્વપૂર્ણ રિપેરિંગની કામગીરી હાથ ધરવામાં આવનાર છે. આ કામગીરીને પગલે પાણીનો પુરવઠો બંધ રાખવો અનિવાર્ય બન્યો છે.
આ વિસ્તારોને થશે અસર
જિલ્લાના મુખ્ય તાલુકાઓ અને નગરપાલિકા વિસ્તારોમાં પાણી વિતરણ સંપૂર્ણપણે બંધ રહેશે, જેમાં નીચેના વિસ્તારોનો સમાવેશ થાય છે. વઢવાણ, મૂળી, સાયલા, ચોટીલા (નગરપાલિકા), થાન (નગરપાલિકા). સ્થાનિક નગરપાલિકાઓ, જેમ કે થાન અને ચોટીલાને, આ ચાર દિવસ માટે નાગરિકોની સુવિધા માટે પાણીની વૈકલ્પિક વ્યવસ્થા કરવા માટે સૂચના આપવામાં આવી છે.
રવિ પાક પર અસર થવાની સંભાવના
આ નિર્ણયની અસર માત્ર પીવાના પાણી પર જ નહીં, પરંતુ ખેતી પર પણ થઈ શકે છે. જિલ્લામાં 10,000 એકર વિસ્તારમાં કરવામાં આવેલા રવિ પાકના વાવેતરને પણ પાણી પુરવઠો બંધ થવાને કારણે અસર થવાની સંભાવના છે. તંત્ર દ્વારા ગ્રામજનો અને શહેરી વિસ્તારોના લોકોને અપીલ કરવામાં આવી છે કે આ સમયગાળા દરમિયાન પૂરતો પાણીનો સંગ્રહ કરી લે.
