અદાણી ગ્રુપે છત્તીસગઢમાં મોટા રોકાણની જાહેરાત કરી છે. ત્યારે આ ગ્રુપ દ્રારા વિવિધક્ષેત્રમાં ઉદ્યોગોના વિસ્તરણ માટે ₹ 75,000 કરોડના રોકાણની જાહેરાત કરી છે. તદુપરાંત વધુમાં, કંપની સિમેન્ટ પ્લાન્ટના વિસ્તરણ માટે વધારાના ₹ 5,000 કરોડનું પણ રોકાણ કરશે. શિક્ષણ, આરોગ્ય, કૌશલ્ય વિકાસ અને પર્યટનમાં વિકાસ સાથે રોજગારોનું સર્જન થશે.
છત્તીસગઢના મુખ્યમંત્રી વિષ્ણુ દેવ સાંઈ સાથેની મુલાકાતમાં અદાણી ગ્રુપના ચેરમેન ગૌતમ અદાણીએ રાજ્યની ઔદ્યોગિક અને માળખાગત ક્ષમતાઓને વધારવા માટે એક મોટી યોજનાનું અનાવરણ કર્યું હતું. અદાણી ગ્રુપે જણાવ્યું છે કે તે રાજ્યની વીજ ઉત્પાદન ક્ષમતા 6,120 મેગાવોટ સુધી વધારવાના ઉદ્દેશ્યથી કોરબા, રાયપુર અને રાયગઢમાં તેના પાવર પ્લાન્ટનું વિસ્તરણ કરવા ₹ 60,000 કરોડનું રોકાણ કરશે.
પાવર સેક્ટરને પ્રોત્સાહન આપવા ઉપરાંત અદાણી ગ્રુપ રાજ્યમાં તેના સિમેન્ટ પ્લાન્ટને આગળ વધારવા માટે ₹5,000 કરોડનું રોકાણ કરશે. ગૌતમ અદાણી સાથેની આ મુલાકાતમાં આ માહિતી છત્તીસગઢના મુખ્યમંત્રી વિષ્ણુ દેવ સાંઈના કાર્યાલય દ્વારા સોશિયલ મીડિયા X પર એક પોસ્ટમાં આપવામાં આવી હતી.
મહત્વપૂર્ણ ક્ષેત્રોનો સમાવેશ
ગૌતમ અદાણીએ મુખ્યમંત્રી સમક્ષ આગામી 4 વર્ષમાં CSR એટલે કે કોર્પોરેટ સોશિયલ રિસ્પોન્સિબિલિટી હેઠળ 10,000 કરોડ રૂપિયાના કાર્યો કરવાની પ્રતિબદ્ધતાનો પુનરોચ્ચાર કર્યો છે. આ ભંડોળ રાજ્યની મહત્વપૂર્ણ વિકાસ જરૂરિયાતોને પૂર્ણ કરશે. જેમાં શિક્ષણ, આરોગ્ય, કૌશલ્ય વિકાસ અને પર્યટન જેવા મહત્વપૂર્ણ ક્ષેત્રોનો સમાવેશ કરવામાં આવ્યો છે.
રોજગારીની તકો ઉભી થશે
મુખ્યમંત્રી સાથેની આ બેઠકમાં સંરક્ષણ સંબંધિત સાધનોના ઉત્પાદન અને છત્તીસગઢમાં એક અત્યાધુનિક ડેટા સેન્ટર ખોલવા અને GCC એટલે કે ગ્લોબલ કેપેસિટી સેન્ટર સ્થાપવા જેવા ક્ષેત્રોમાં શક્ય સહયોગ અંગે પણ વિચારણા કરવામાં આવશે. અદાણી જૂથના આવા પ્રયાસોથી રોજગારીની તકો ઉભી થશે અને રાજ્યના વિકાસને વધુ વેગ મળશે.
નવીનતમ યોજના
અદાણી ગ્રુપની કંપની અદાણી પાવર દેશની સૌથી મોટી ખાનગી થર્મલ પાવર ઉત્પાદક કંપની છે. તેની કુલ વીજ ઉત્પાદન ક્ષમતા 15,250 મેગાવોટ છે. કંપનીના થર્મલ પાવર પ્લાન્ટ ગુજરાત, મહારાષ્ટ્ર, કર્ણાટક, રાજસ્થાન, છત્તીસગઢ, મધ્યપ્રદેશ અને ઝારખંડમાં છે. આ ઉપરાંત, કંપની પાસે ગુજરાતમાં 40 મેગાવોટનો સૌર ઉર્જા પ્રોજેક્ટ પણ છે. આગામી 10 વર્ષોમાં ડેટા સેન્ટર ક્ષમતાની 1000 મેગાવોટ્સ (મેગાવોટ્સ) સ્થાપવાની અદાણીની નવીનતમ યોજના છે.
