- પ.બંગાળ ટીએમસી MLA તાપસ રૉયનું રાજીનામુ
- તાપસ રૉય પાર્ટીથી હતા નારાજ
- સંદેશખાલી કેસમાં પાર્ટીએ લીધેલા પગલાથી નારાજ
લોકસભાની ચૂંટણીની તૈયારીઓ વચ્ચે પશ્ચિમ બંગાળના ટીએમસીને એક મોટો ફટકો પડ્યો છે. ધારાસભ્ય તાપસ રોયે પાર્ટીમાંથી રાજીનામુ આપી દીધુ છે. રાજીનામુ આપતા પહેલા તેમણે સંદેશખાલી મામલે ઉકેલની કામગીરીને લઇને નારાજગી વ્યક્ત કરી હતી. તે દરમિયાન જ તેમણે લોકસભાની ચૂંટણી પહેલા પાર્ટી છોડવાના સંકેતો આપી દીધા હતા.
તાપસ રોય પાર્ટીથી નારાજ હતા
વિધાનસભામાં ટીએમસીના ડેપ્યુટી ચીફ વ્હીપે પણ પાર્ટીની ટીકા કરી હતી. તેમણે કહ્યું કે જ્યારે એન્ફોર્સમેન્ટ ડિરેક્ટોરેટ (ED)એ જાન્યુઆરીમાં તેમના નિવાસસ્થાને દરોડા પાડ્યા ત્યારે પાર્ટી તેમની સાથે ન હતી. તાપસ રોયે કહ્યું, "હું પાર્ટીના કામકાજથી નિરાશ છું. પાર્ટી અને સરકાર પર લાગેલા ઘણા ભ્રષ્ટાચારના આરોપોથી હું કંટાળી ગયો હતો. આ ઉપરાંત સંદેશખાલીના મુદ્દાને જે રીતે હેન્ડલ કરવામાં આવ્યો હતો તેનું હું સમર્થન કરતો નથી."
શું તાપસ રૉય ભાજપમાં જોડાશે ?
ટીએમસીના વરિષ્ઠ નેતાઓ કુણાલ ઘોષ અને બ્રત્ય બસુ આજે સવારે તેમને મનાવવા માટે તેમના નિવાસસ્થાને પહોંચ્યા હતા. ઉત્તર કોલકાતાના સાંસદ સુદીપ બંદોપાધ્યાય સાથે પણ તેમનો વિવાદ ચાલી રહ્યો હતો. તાપસ રોયે કહ્યું કે, હું છેલ્લા 25 વર્ષથી પાર્ટીનો ઈમાનદાર નેતા છું, પરંતુ મને ક્યારેય મારો હક મળ્યો નથી. રાજીનામું આપ્યા પછી, જ્યારે તેમને ભાજપમાં જોડાવા વિશે પૂછવામાં આવ્યું, ત્યારે તેમણે હાલમાં આ અંગે ટિપ્પણી કરવાનો ઇનકાર કર્યો હતો.
