- પોલીસ ગુરૂદ્વારામાં દાખલ થઈ ન હતીઃ પોલીસ
- ગુરૂદ્વારામાં છૂપાયેલો હતો અમૃતપાલસિંહઃ પંજાબ પોલીસ
- અમૃતપાલે સવારે છ વાગ્યાની આસપાસ સરેન્ડર કર્યુઃ પંજાબ પોલીસ
ઘણા સમયથી ફરાર ખાલિસ્તાન સમર્થક અમૃતપાલ સિંહને આજે મોગા જિલ્લામાં ધરપકડ બાદ ડિબ્રુગઢ જેલમાં મોકલી દેવામાં આવ્યો છે. અમૃતપાલ વિરૂદ્ધ કડક કાર્યવાહી કરતા તેના પર NSA પણ લગાવવામાં આવી છે. પંજાબ પોલીસ અને ઈન્ટેલિજન્સ બ્યુરોના સંયુક્ત ઓપરેશનમાં અમૃતપાલની ધરપકડ કરવામાં આવી છે. અમૃતપાલ છેલ્લા ઘણા દિવસોથી ફરાર હતો. પંજાબ પોલીસ અને સુરક્ષા એજન્સીઓ સતત તેની શોધમાં લાગી હતી. અમૃતપાલને પકડવા માટે દેશભરમાં નેપાળ બોર્ડર સુધી ઓપરેશન ચલાવવામાં આવ્યું હતું. તે જ સમયે, પંજાબ પોલીસે ટ્વીટ કરીને અમૃતપાલ સિંહની ધરપકડની માહિતી આપી હતી. ત્યારબાદ એક પ્રેસ કોન્ફરન્સ કરવામાં આવી હતી જેમાં સમગ્ર ઘટના અંગે માહિતી આપવામાં આવી હતી.
અમૃતપાલ સિંહની આજે મોગા જિલ્લામાંથી ધરપકડ કરવામાં આવી છે. આ સાથે પોલીસે નાગરિકોને શાંતિ અને સૌહાર્દ જાળવવા વિનંતી કરી છે અને કોઈપણ ફેક ન્યૂઝ શેર ન કરવા સૂચના આપી છે. હાલમાં જ અમૃતપાલના સૌથી મહત્વપૂર્ણ સાથી પપ્પલપ્રીત સિંહની પોલીસે ધરપકડ કરી હતી. આ પછી, 15 એપ્રિલે અમૃતપાલના સૌથી મહત્વપૂર્ણ સહયોગી જોગા સિંહને ફતેહગઢ સાહિબ જિલ્લામાંથી પકડવામાં આવ્યો હતો. અમૃતપાલ સતત પોલીસ અને સુરક્ષા એજન્સીઓને ચકમો આપી રહ્યો હતો. કહેવામાં આવી રહ્યું છે કે અમૃતપાલને જનરલ ભિંડરાવાલેના મૂળ ગામમાંથી ધરપકડ કરવામાં આવી હતી.
અમૃતપાલની ધરપકડ પર પંજાબ પોલીસે કહ્યું, ઓપરેશન દરમિયાન ગુરુદ્વારાની ગરિમાનું ધ્યાન રાખવામાં આવ્યું હતું
આઈજી સુખચૈન ગિલે જણાવ્યું કે NSA હેઠળ અમૃતપાલની ધરપકડ કરવામાં આવી છે. તેમણે ચેતવણી આપી હતી કે કોઈને પણ વાતાવરણ બગાડવા દેવાનો હક નથી. ઈન્ટેલિજન્ટ ઈનપુટના આધારે આજે સવારે 7.45 વાગ્યે અમૃતપાલની ધરપકડ કરવામાં આવી છે. આ સાથે જ આઈજીએ પંજાબના લોકોનો પણ આભાર માન્યો હતો. તેમણે કહ્યું કે આ સમગ્ર ઓપરેશન દરમિયાન જનતાએ પંજાબમાં શાંતિ અને વ્યવસ્થા જાળવી રાખી હતી. આ સાથે પંજાબ પોલીસે કાયદો અને વ્યવસ્થા સંભાળી હતી.
અમૃતપાલ સિંહ પર દબાણ કરવામાં આવ્યું હતું
પંજાબના આઈજીએ કહ્યું કે પોલીસે છેલ્લા 35 દિવસથી અમૃતપાલ પર દબાણ બનાવી રાખ્યું હતું. તમામ પોલીસ વિભાગો કેન્દ્રીય એજન્સીઓ સાથે સંપૂર્ણ સંકલનમાં રહીને કામ કરી રહ્યા હતા. અમૃતપાલ સિંહની આજે સવારે પોણા સાત વાગ્યે ધરપકડ કરવામાં આવી છે. તેમણે કહ્યું કે અમારી પાસે માહિતી હતી કે અમૃતપાલ ગુરુદ્વારાની અંદર છે, તેથી ગુરુદ્વારાની ગરિમાને ધ્યાનમાં રાખીને અમે આ સમગ્ર ઓપરેશન પાર પાડ્યું છે. પંજાબના તમામ વિભાગો, 4 ઇન્ટેલિજન્સ વિંગ, તમામ એકબીજા સાથે મળીને કામ કરી રહ્યા હતા.
