ઓડિશામાં ભાજપ-બીજેડી વચ્ચે ગઠબંધન મુદ્દે સમજૂતી ન થઇ શકી

• એક્સ પર પોસ્ટ મૂકીને આપી જાણકારી
  
  
  
• ઓડિશામાં ભારતીય જનતા પાર્ટી એકલે હાથે લોકસભા અને વિધાનસભા ચૂંટણી લડશે.
• ઓડિશાની તમામ લોકસભા-વિધાનસભા ચૂંટણી એકલે હાથે લડીશું : ભાજપ પ્રદેશ અધ્યક્ષ

ઓડિશામાં ભારતીય જનતા પાર્ટી એકલે હાથે લોકસભા અને વિધાનસભા ચૂંટણી લડશે. આ પહેલાં રાજકીય વર્તુળોમાં ચર્ચા હતી કે ભાજપ અને બીજૂ જનતા દળ ગઠબંધન સાધીને ચૂંટણી લડી શકે છે. ભાજપના પ્રદેશ અધ્યક્ષ મનમોહન સામલે જણાવ્યું છે કે રાજ્યની 21 લોકસભા બેઠક અને 147 વિધાનસભા બેઠકો પર ભાજપ એકલે હાથે ચૂંટણી લડશે. આ સાથે જ ગઠબંધનની ચર્ચાઓ પર પૂર્ણવિરામ મુકાઇ ગયું છે. ભાજપે હવે રાજ્યમાં એકલે હાથે ચૂંટણી લડવાની જાહેરાત કરી દીધી છે.

ભાજપના પ્રદેશ અધ્યક્ષ મનમોહન સામલે એક્સ પર લખ્યું છે કે ઓડિશાની બીજૂ જનતા દળ પાર્ટી વીતેલા 10 વર્ષથી કેન્દ્ર સરકારને મહત્વના રાષ્ટ્રીય પ્રસંગે સમર્થન આપતી આવી છે. અમે તે બદલ તે પક્ષનો આભાર માનીએ છીએ. વિકસિત ભારત અને વિકસિત ઓડિશા બનાવવા માટે ભારતીય જનતા પાર્ટી આ વખતે લોકસભાની તમામ 21 બેઠકો અને વિધાનસભાની તમામ 147 બેઠકો પર એકલા હાથે ચૂંટણી લડશે.

ઓડિશામાં આ વર્ષે લોકસભા અને વિધાનસભા બેઠકો માટે ચાર તબક્કે મતદાન થવાનું છે. ચૂંટણી પંચે જણાવ્યા મુજબ ઓડિશામાં 13 મે, 20 મે, 25 મે અને 1 જૂને એમ ચાર તબક્કે લોકસભાની તેમ જ વિધાનસભાની ચૂંટણી માટે મતદાન થવાનું છે. 13 મેના રોજ લોકસભાની બેઠકોની સાથે જ વિધાનસભાની 28 બેઠકો માટે મતદાન થશે. 20 મેના રોજ વિધાનસભાની 35 બેઠકો માટે મતદાન થશે. વિધાનસભાની બાકીની બેઠકો માટે 25 મે અને 1 જૂને મતદાન થશે. મતગણતરી 4 જૂનના રોજ હાથ ધરવામાં આવશે.

ઉલ્લેખનીય છે કે ઓડિશામાં ભાજપનું બીજૂ જનતા દળ સાથે ગઠબંધન થવું નક્કી જણાતું હતું અને આમ પણ વડાપ્રધાન નરેન્દ્ર મોદી અને ઓડિશાના સીએમ નવીન પટનાઇક વચ્ચે જે પ્રકારના સંબંધ છે તેને જોતા બંને પક્ષો વચ્ચે ગઠબંધન થવું નક્કી જ જણાતું હતું પરંતુ અંદરખાને શું રંધાયું કે આ ગઠબંધન ન થઇ શક્યું તે સામે આવ્યા બાદ જ વાસ્તવિક ચિત્ર સ્પષ્ટ થશે. ભાજપને બીજેડી સાથે ગઠબંધન નહીં થવાને કારણે પોતાના 400 બેઠકના ટાર્ગેટને પૂરો કરવામાં મુશ્કેલીનો સામનો કરવો પડી શકે છે. જોકે, ચૂંટણી બાદ પણ બંને પક્ષો સાથે આવી શકે છે.