શિયાળુ સત્ર પહેલા મળી સર્વપક્ષીય બેઠક, સત્રના એજન્ડા પર ચર્ચા

• મહુઆને લઈને રિપોર્ટ્સ મીડિયામાં લીક થવા મામલે કેન્દ્ર સરકારને ઘેરી
  
• ઓલ પાર્ટી મિટિંગમાં 23 પક્ષોના 30 નેતાઓએ હાજરી આપી હતી
• સત્રમાં નિયમો અને પ્રોસેસનું પાલન કરીને સાર્થક ચર્ચા કરે: પ્રહલાદ જોશી

સંસદનું શિયાળુ સત્ર આગામી 4 ડિસેમ્બરથી શરૂ થઈ રહ્યું છે. સત્ર શરૂ થતાં પહેલા સત્રના એજન્ડા પર ચર્ચા કરવા માટે આજે મોદી સરકાર દ્વારા સર્વપક્ષીય બેઠક બોલાવવામાં આવી હતી. સંસદીય કાર્ય મંત્રી પ્રહલાદ જોશી જણાવ્યું હતું કે શિયાળુ સત્રમાં કુલ 15 બેઠકો યોજાશે. અમે આજે ઓલ પાર્ટી મિટિંગ બોલાવી, જેમાં 23 પક્ષોના 30 નેતાઓએ હાજરી આપી હતી. શૂન્યકાલ નિયમિત રીતે થતો આવ્યો છે. અમે તમામ પક્ષોને વિનંતી કરી છે કે તેઓ સત્રમાં મુદ્દાઓ પર સાર્થક ચર્ચા કરે, તેના માટે માહોલ જાળવી રાખે. ચર્ચાઓ નિયમો અને પ્રોસેસનું પાલન કરીને થવી જોઈએ. સરકાર તમામ મુદ્દાઓ પર ચર્ચા કરવા માટે તૈયાર છે.

TMC સાંસદોએ ઓલ પાર્ટી મિટિંગને ગણાવ્યો ટાઈમ પાસ 

દરમિયાન, તૃણમૂલ કોંગ્રેસના સૂત્રોએ જણાવ્યું હતું કે પાર્ટીએ સર્વપક્ષીય બેઠકમાં 6 મુદ્દા ઉઠાવ્યા હતા. TMCનું પ્રતિનિધિત્વ કરી રહેલા લોકસભા સાંસદ સુદીપ બંદોપાધ્યાય અને રાજ્યસભા સાંસદ ડેરેક ઓ'બ્રાયન દ્વારા કરવામાં આવ્યું હતું. સૂત્રોના જણાવ્યા અનુસાર, તૃણમૂલ નેતાઓએ બેઠકમાં કહ્યું, 'દુર્ભાગ્યવશ, કેન્દ્ર સરકાર સંસદ સત્ર પહેલા આ સર્વપક્ષીય બેઠકોને ટાઈમ પાસ બનાવી દીધી છે. અમને કેમ મૂર્ખ બનાવવામાં આવી રહ્યા છે? ટીએમસીના નેતાઓએ આરોપ લગાવ્યો કે ગત સત્રમાં સરકારે સર્વપક્ષીય બેઠકમાં શેર કર્યા વગર સત્રની વચ્ચે જ ખાનગી રીતે, બિલ ઉમેરી દીધા હતા.