Assembly Election: અરુણાચલ અને સિક્કિમ વિધાનસભાની ચૂંટણીને લઇને ગણતરી શરૂ

• અરુણાચલ- સિક્કિમમાં વિધાનસભાની ચૂંટણીને લઇને ગણતરી શરૂ
  
• અરુણાચલ વિધાનસભામાં 60 બેઠકો
• સિક્કિમ વિધાનસભામાં 32 બેઠકો

અરુણાચલ પ્રદેશ અને સિક્કિમ વિધાનસભાની ચૂંટણીને લઇને મતગણતરી શરૂ થઇ ગઇ છે. બપોર સુધી આ બંને રાજ્યોની વિધાનસભા પર ચિત્ર સ્પષ્ટ થઇ જશે કે વિધાનસભામાં કોની સરકાર બનશે.

બપોરે ચિત્ર થશે સ્પષ્ટ

અરુણાચલ વિધાનસભામાં 60 અને સિક્કિમ વિધાનસભામાં 32 બેઠકો છે. બંને રાજ્યોમાં લોકસભા ચૂંટણીની સાથે વિધાનસભા માટે પણ મતદાન થયું હતું. જો કે દેશના અન્ય રાજ્યોની સાથે લોકસભા ચૂંટણીના પરિણામો 4 જૂને જ જાહેર કરવામાં આવશે.

અરુણાચલ પ્રદેશમાં ભાજપ આગળ

અરુણાચલ પ્રદેશ અને સિક્કિમ વિધાનસભા ચૂંટણીની મતગણતરી શરૂ થઈ ગઈ છે અને આજે બપોર સુધીમાં ચૂંટણીના પરિણામો જાહેર થઈ શકે છે. અરુણાચલ પ્રદેશની સ્થિતિ પર નજર કરીએ તો પેમા ખાંડુના નેતૃત્વમાં ભાજપની સરકાર છે. જો ખાંડુ જીતશે તો તેઓ સતત ત્રીજી વખત સરકાર બનાવશે. પેમા સહિત 10 ઉમેદવારો પહેલેથી જ બિનહરીફ ચૂંટાઈ આવ્યા છે. આ બેઠકો બોમડિલા, ચૌખામ, હ્યુલિયાંગ, ઇટાનગર, મુક્તો, રોઇંગ, સગલી, તાલી, તાલિહા અને ઝીરો-હાપોલી છે. આવી સ્થિતિમાં માત્ર 50 બેઠકો પર જ મતગણતરી ચાલી રહી છે. આ રીતે મતગણતરી શરૂ થતાં જ ભાજપે 10 ​​બેઠકો પર લીડ મેળવી લીધી છે. રાજ્યમાં ભાજપની સીધી સ્પર્ધા કોંગ્રેસ સાથે છે. ભાજપે રાજ્યની તમામ 60 સીટો પર પોતાના ઉમેદવારો ઉભા રાખ્યા છે જ્યારે કોંગ્રેસે માત્ર 19 સીટો પર પોતાના ઉમેદવારો ઉભા રાખ્યા છે.

સિક્કિમમાં શું છે સ્થિતિ ?

જ્યારે સિક્કિમની 32 વિધાનસભા બેઠકો પર SKMનો સિક્કિમ ડેમોક્રેટિક ફ્રન્ટ (SDF) સાથે સીધો મુકાબલો છે. સિક્કિમ ક્રાંતિકારી મોરચા (SKM) હાલમાં મુખ્યમંત્રી પ્રેમ સિંહ તમાંગના નેતૃત્વમાં સત્તામાં છે. ભાજપ અને કોંગ્રેસ જેવા રાષ્ટ્રીય પક્ષોનો સિક્કિમમાં બહુ પ્રભાવ નથી.