- અતીક અહેમદ અને અશરફની જાહેરમાં ગોળી મારીને હત્યા
- આરોપીઓના નામ લવલેશ તિવારી, સની અને અરુણ મૌર્ય છે
- પ્રયાગરાજ પોલીસ ત્રણેય હુમલાખોરોની પૂછપરછ કરી રહી છે
માફિયા અતીક અહેમદ અને તેના ભાઈ અશરફની રાત્રે લગભગ 10.30 વાગ્યે ગોળી મારીને હત્યા કરવામાં આવી હતી. તેમને તબીબી સારવાર માટે પ્રયાગરાજની કેલ્વિન હોસ્પિટલમાં લઈ જવામાં આવ્યા હતા, જ્યાં ત્રણ અજાણ્યા યુવકોએ તેમને ગોળી મારી દીધી હતી. બંનેના ઘટનાસ્થળે જ મોત થયા હતા. અતીક અને અશરફને કડક સુરક્ષા હેઠળ મેડિકલ માટે હોસ્પિટલમાં લઈ જવામાં આવી રહ્યા હતા. અતીક અને અશરફને કસ્ટડી રિમાન્ડ પર લઈ પૂછપરછ કરી રહેલી પોલીસ તેમને રાત્રે 10 વાગ્યે કેલ્વિન હોસ્પિટલમાં લઈ ગઈ હતી. અહીં આતિક મીડિયાને નિવેદન આપી રહ્યો હતો, ત્યારે પાછળથી આવેલા ત્રણ યુવકોએ ઝડપથી ફાયરિંગ શરૂ કરી દીધું. અચાનક ગોળીબાર બાદ બંનેના મોત થયા હતા. હુમલાખોરો પોલીસના હાથે ઝડપાઈ ગયા હતા. હુમલાખોરો હત્યા કર્યા બાદ જયશ્રી રામના નારા લગાવી રહ્યા હતા. આ વાત કેટલીક મીડિયા ચેનલો પર પણ સાંભળવા મળી હતી. આરોપીઓના નામ લવલેશ તિવારી, સની અને અરુણ મૌર્ય જણાવવામાં આવી રહ્યા છે.
હુમલાખોરોએ હાથ ઊંચા કરીને સરેન્ડર કર્યું હતું
મળતી માહિતી અનુસાર હુમલાખોરોના ગળામાં આઈડી કાર્ડ પણ હતું. આના કારણે એવી આશંકા છે કે ત્રણેય લોકો મીડિયા પર્સન બનીને જાહેરમાં આવ્યા હતા. અશરફ અને અતીકને ગોળી માર્યા બાદ હુમલાખોરોએ હાથ ઊંચા કરીને સ્થળ પર જ આત્મસમર્પણ કર્યું હતું. તેમજ લોકોએ તેમને જય શ્રી રામના નારા લગાવતા સાંભળ્યા હતા.
અતીક અહેમદનું પાકિસ્તાન કનેક્શન
અતીક અહેમદ અને અશરફના નિર્દેશ પર સાંજે પોલીસ ટીમે કસારી મસારી સ્થિત નટી ઉર્ફે નટુ તિરાહે નજીકના જંગલમાં બનેલા ખંડેરમાંથી ઉમેશ પાલની હત્યામાં વપરાયેલી બે પિસ્તોલ (એક અમેરિકન) મળી આવી હતી. પોલીસને 55થી વધુ કારતુસ પણ મળી આવ્યા છે. આમાં પાંચ કારતુસ પાકિસ્તાન ઓર્ડિનન્સ દ્વારા બનાવવામાં આવ્યા હોવાનું કહેવાય છે. આના કારણે અતીકનું પાકિસ્તાન કનેક્શન પણ બહાર આવ્યું છે. ઉમેશ પાલની પિસ્તોલથી જ હત્યા કરવામાં આવી હતી. હત્યા બાદ શૂટર ચકિયા કસરી માફિયા ભાઈઓની સૂચનાથી મસારી પહોંચ્યો હતો અને પિસ્તોલ છુપાવીને ફરાર થઈ ગયો હતો.
