Ayodhya: રામ મંદિરમાં VIP-VVIPના મોબાઈલ ફોન લઈ જવા પર પ્રતિબંધ, જાણો કારણ

• રામ મંદિરમાં દર્શન-પૂજા, સુરક્ષા અને વ્યવસ્થા અંગે બેઠક યોજાઇ
  
• રામ મંદિર પરિસરમાં મોબાઈલ ફોન પર સંપૂર્ણ પ્રતિબંધ રહેશે
• પ્રાણ પ્રતિષ્ઠા બાદથી અયોધ્યામાં શ્રદ્ધાળુઓની ભારે ભીડ

અયોધ્યામાં રામલલાની પ્રતિમાના અભિષેક બાદથી અયોધ્યામાં શ્રદ્ધાળુઓની સંખ્યા સતત વધી રહી છે. રામ મંદિર ટ્રસ્ટ દ્વારા સુવિધાઓમાં સતત વધારો કરવામાં આવી રહ્યો છે. દરમિયાન શુક્રવારે ટ્રસ્ટની મહત્વની બેઠક મળી હતી, જેમાં રામ મંદિરમાં દર્શન-પૂજા, સુરક્ષા અને વ્યવસ્થા અંગે ચર્ચા-વિચારણા સાથે મહત્વના નિર્ણયો લેવામાં આવ્યા હતા. આમાં મુખ્ય વાત એ છે કે હવે રામ મંદિર પરિસરમાં મોબાઈલ ફોન પર સંપૂર્ણ પ્રતિબંધ રહેશે.

રામ મંદિર ટ્રસ્ટની બેઠકમાં નિર્ણય લેવામાં આવ્યો કે મંદિર પરિસરમાં મોબાઈલ ફોન પર સંપૂર્ણ પ્રતિબંધ રહેશે. જ્યારે આ પહેલા સામાન્ય લોકો દ્વારા મોબાઈલ ફોન લઈ જવા પર પ્રતિબંધ હતો. હવે વીઆઈપી અને વીવીઆઈપી પર પણ મોબાઈલ ફોન લઈ જવા પર પ્રતિબંધ મુકવામાં આવ્યો છે. રામ મંદિર ટ્રસ્ટની બેઠકમાં અયોધ્યાના આઈજી અને કમિશ્નરની સાથે અન્ય અધિકારીઓ પણ હાજર હતા. જેમાં સર્વસંમતિથી નિર્ણય લેવામાં આવ્યો હતો કે રામ મંદિર પરિસરમાં સામાન્ય લોકો જ નહીં પરંતુ ખાસ લોકો પણ પોતાની સાથે મોબાઈલ ફોન લઈ જઈ શકશે નહીં.

તમને જણાવી દઈએ કે 22 જાન્યુઆરીએ પ્રાણ પ્રતિષ્ઠા બાદથી અયોધ્યામાં શ્રદ્ધાળુઓની સંખ્યામાં સતત વધારો થઈ રહ્યો છે. મંદિરમાં દરરોજ VIP અને VVIP દર્શન કરવા પહોંચી રહ્યા છે. આ સાથે તાજેતરના સમયમાં ઘણી જાણીતી હસ્તીઓ પણ અયોધ્યાની મુલાકાતે આવી છે. રાષ્ટ્રપતિ દ્રૌપદી મુર્મુએ પણ થોડા દિવસો પહેલા રામલલાના દર્શન કર્યા હતા. જ્યારે ફિલ્મ અને રમત જગતની અનેક હસ્તીઓ પણ અહીં આવી ચુકી છે.