- બાંગ્લાદેશમાં હિંદુઓના મંદિરો, ઘરો અને વ્યવસાયિક સંસ્થાઓ પર થઇ રહેલા હુમલાની નિંદા કરી
- તેમણે કેન્દ્ર સરકારને પડોશી દેશમાં હિંદુ લઘુમતીઓના રક્ષણ માટે હાકલ કરી
- આપણે ભારતમાં એક થવું પડશે અને વિશ્વને હિન્દુઓની તાકાત બતાવવી પડશે
યોગ ગુરુ બાબા રામદેવે મંગળવારે બાંગ્લાદેશમાં હિંદુઓના મંદિરો, ઘરો અને વ્યવસાયિક સંસ્થાઓ પર થઇ રહેલા હુમલાની નિંદા કરી હતી. તેમણે કેન્દ્ર સરકારને પડોશી દેશમાં હિંદુ લઘુમતીઓના રક્ષણ માટે રાજકીય અને રાજદ્વારી રીતે દરેક શક્ય પ્રયાસો કરવા હાકલ કરી હતી. તેમણે કહ્યું કે કેટલાક લોકો ભારતમાં પણ અસ્થિરતા પેદા કરવાના ઈરાદાથી સોશિયલ મીડિયા પર બાંગ્લાદેશની ઘટનાને વખાણી રહ્યા છે, તેમની સામે કડક પગલાં લેવાની જરૂર છે.
બાબા રામદેવે કહ્યું વિશ્વમાં જે રીતે ઇસ્લામિક કટ્ટરવાદ વધી રહ્યો છે અને હવે તેણે ભારતના પડોશમાં પણ દસ્તક આપી છે
બાબા રામદેવે કહ્યું વિશ્વમાં જે રીતે ઇસ્લામિક કટ્ટરવાદ વધી રહ્યો છે અને હવે તેણે ભારતના પડોશમાં પણ દસ્તક આપી છે તે આપણા દેશ માટે ખૂબ જ ખતરનાક બની શકે છે. ઇસ્લામિક કટ્ટરપંથીઓ બાંગ્લાદેશમાં હિન્દુઓ સાથે જે કરી રહ્યા છે તે ખોટું છે. આપણે ભારતમાં એક થવું પડશે અને વિશ્વને હિન્દુઓની તાકાત બતાવવી પડશે.
કેટલાક લોકો બાંગ્લાદેશ જેવી સ્થિતિ ભારતમાં પણ ઈચ્છે છેઃ બાબા રામદેવ
રામદેવે કહ્યું, 'બાંગ્લાદેશમાં સાંપ્રદાયિક હિંસા ચરમ પર છે. જમાત-એ-ઇસ્લામી અને તમામ કટ્ટરવાદી દળો તેમની ક્રૂરતા બતાવી રહ્યા છે. આવી કોઈ ઘટનાનું પુનરાવર્તન ન થવું જોઈએ. તે સહન કરવામાં આવશે નહીં. જો આપણે બાંગ્લાદેશ બનાવી શકીએ તો આપણા હિંદુ ભાઈઓની સુરક્ષા માટે ત્યાં પણ દખલ કરી શકીએ. આવા લોકોને પણ અટકાવવા પડશે.
ભૈયાજી જોશીએ આ મુદ્દે શું કહ્યુ ?
RSSના વરિષ્ઠ નેતા ભૈયાજી જોશીએ પણ બાંગ્લાદેશમાં હિન્દુ લઘુમતીઓને નિશાન બનાવવા પર પ્રતિક્રિયા આપી છે. તેમણે કહ્યું, 'ભારત સરકારે બાંગ્લાદેશ મુદ્દે યોગ્ય પગલાં લેવા જોઈએ. અમે સરકારને વિનંતી કરી રહ્યા છીએ કે ત્યાંના હિંદુઓ સુરક્ષિત રહે તે સુનિશ્ચિત કરે. અમને વિશ્વાસ છે કે સરકાર યોગ્ય પગલાં લેશે. શેખ હસીનાએ 5 ઓગસ્ટ, 2024ના રોજ બાંગ્લાદેશના વડાપ્રધાન પદ પરથી રાજીનામું આપ્યા બાદ દેશ છોડી દીધો હતો અને હાલમાં તેઓ ભારતમાં છે.
હાલમાં બાંગ્લાદેશમાં સેનાએ ચાર્જ સંભાળી લીધો છે
હસીનાને રાજીનામું આપીને બાંગ્લાદેશથી ભાગી જવાની ફરજ પડી હતી કારણ કે તેમની સરકાર સામે વિદ્યાર્થીઓના વિરોધ હિંસક બન્યા હતા. હાલમાં બાંગ્લાદેશમાં સેનાએ ચાર્જ સંભાળી લીધો છે અને વચગાળાની સરકાર બનાવવાની પ્રક્રિયા ચાલી રહી છે. નોબેલ પુરસ્કાર વિજેતા મુહમ્મદ યુનુસને બાંગ્લાદેશમાં વચગાળાની સરકારનું નેતૃત્વ કરવા માટે પસંદ કરવામાં આવ્યા છે. બાંગ્લાદેશના રાષ્ટ્રપતિ મોહમ્મદ શહાબુદ્દીનની અધ્યક્ષતામાં યોજાયેલી મહત્વપૂર્ણ બેઠકમાં આ નિર્ણય લેવામાં આવ્યો હતો. આ બેઠકમાં દેશની ત્રણેય સેનાઓના વડાઓ અને વિદ્યાર્થી આંદોલનનું નેતૃત્વ કરી રહેલા મોટા વિદ્યાર્થી સંગઠનોના નેતાઓ પણ હાજર હતા.
