- અમૃતપાલ સિંહની પંજાબ પોલીસે આખરે ધરપકડ કરી લીધી
- અમૃતપાલ છેલ્લા બે મહિનાથી ફરાર હતો
- ધરપકડ પહેલા અમૃતપાલ મોગા જિલ્લાના રોડે ગામમાં સ્થિત ગુરુદ્વારા પહોંચ્યો હતો
ખાલિસ્તાન તરફી સંગઠન 'વારિસ પંજાબ દે'ના ચીફ અમૃતપાલ સિંહની પંજાબ પોલીસે આખરે ધરપકડ કરી લીધી છે. અમૃતપાલ છેલ્લા બે મહિનાથી ફરાર હતો અને તેની શોધમાં પોલીસ અનેક રાજ્યોમાં સર્ચ ઓપરેશન પણ ચલાવી રહી હતી. ધરપકડ પહેલા અમૃતપાલ મોગા જિલ્લાના રોડે ગામમાં સ્થિત ગુરુદ્વારા પહોંચ્યો હતો અને ત્યાં પ્રવચન આપ્યુ હતુ, જેનો વીડિયો સામે આવ્યો છે.
રોડે ગામ કેમ પસંદ કર્યું?
અમૃતપાલ સિંહે તેની ધરપકડ માટે પંજાબના રોડે ગામને શા માટે પસંદ કર્યું તેની પાછળ એક મહત્વપૂર્ણ કારણ છે. હકીકતમાં, આ એ જ ગામ છે જ્યાં આતંકવાદી જરનૈલ સિંહ ભિંડરાવાલેનો જન્મ થયો હતો અને અમૃતપાલ સિંહની 'દસ્તરબંદી' (પાઘડી બાંધવાની વિધિ) સમારોહ પણ અહીં થયો હતો. અકાલ તખ્ત સાહિબના પૂર્વ જથેદાર અને જરનૈલ સિંહ ભિંડરાવાલેના ભત્રીજા જસબીર સિંહ રોડે પણ અહીં રહે છે. આ ઉપરાંત આતંકવાદ દરમિયાન પંજાબમાં અનેક લોકોની હત્યા કરવામાં સામેલ આતંકવાદી લખબીર સિંહ રોડે પણ આ ગામનો જ છે, જે હાલમાં પાકિસ્તાનમાં છુપાયેલો છે.
અમૃતપાલની દસ્તરબંધી અહીં 2022માં થઈ હતી
ભિંડરાવાલેને પોતાનો આદર્શ માનનારા અમૃતપાલ સિંહે 29 સપ્ટેમ્બર, 2022ના રોજ આ રોડ ગામમાં તેની દસ્તરબંધી કરી હતી. ત્યારે તેણે કહ્યું કે શીખો હજુ પણ ગુલામ છે. એવું કહેવામાં આવી રહ્યું છે કે અમૃતપાલે ધરપકડ પહેલા જે ગુરુદ્વારામાં ઉપદેશ આપ્યો હતો, ત્યાંથી જ તે બહાર આવ્યો હતો. પોતાને ભિંડરાવાલે સાથે જોડીને, તે પ્રસિદ્ધિમાં આવવા માંગતો હતો અને તેથી જ ધરપકડ પહેલાં ભાષણ માટે તેણે રોડે ગામ પસંદ કર્યું.
શાહને આ ગામમાંથી ધમકી આપવામાં આવી હતી
રોડે ગામમાં જ આયોજિત એક કાર્યક્રમ દરમિયાન કેન્દ્રીય ગૃહમંત્રી અમિત શાહને ધમકી આપવામાં આવી હતી. જ્યારે અમૃતપાલ દીપ સિદ્ધુની યાદમાં ગેટ બનાવવાનો શિલાન્યાસ કરવા અહીં પહોંચ્યો હતો ત્યારે તેણે ધમકી આપી હતી. તેણે કહ્યું કે અમિત શાહનું પણ ઈન્દિરા ગાંધી જેવું જ ભાગ્ય થઈ શકે છે. જો કે, જ્યારે મામલો ઉગ્ર બન્યો ત્યારે તેણે પોતાનું નિવેદન પાછું ખેંચ્યું અને કહ્યું કે શાહને કોઇ ધમકી આપી ન હતી એવુ ફેરવી તોળ્યુ હતુ.
આ રીતે ચર્ચામાં આવ્યો હતો
અમૃતપાલ પહેલીવાર 23 ફેબ્રુઆરીના રોજ ચર્ચામાં આવ્યો હતો. તેણે પોતાના નજીકના મિત્રને છોડાવવા હજારો સમર્થકો સાથે અજનાલા પોલીસ સ્ટેશન પર હુમલો કર્યો. આ હુમલામાં 6 પોલીસકર્મીઓ ઘાયલ થયા હતા.અમૃતપાલ અને તેના સમર્થકોના હાથમાં તલવારો, લાકડીઓ હતી. આ સમગ્ર હોબાળો આઠ કલાક સુધી ચાલ્યો હતો. અમૃતપાલના સમર્થકોએ લવપ્રીત તુફાનને મુક્ત કરવાની માંગ કરી હતી. આ પછી તેણે ઘણી ટીવી ચેનલોમાં આપેલા ઈન્ટરવ્યુમાં અલગ ખાલિસ્તાનની માંગ કરી હતી.
