ભાજપની રાષ્ટ્રીય કાર્યકારિણીની બેઠક ફેબ્રુઆરી મહિનામાં મળશે, લોકસભા ચૂંટણીની તૈયારીઓ શરૂ

• ભાજપની રાષ્ટ્રીય કાર્યકારિણી બેઠક 16 થી 18 ફેબ્રુઆરી
  
• દેશમાંથી ભાજપના 2000 જેટલા નેતાઓ હાજરી આપશે
• લોકસભા ચૂંટણી 2024નો વિઝન ડોક્યુમેન્ટ બનાવશે

ભારતીય જનતા પાર્ટીઓ આગામી લોકસભા ચૂંટણી 2024ની તડામાર તૈયારીઓ કરી લીધી છે. ભાજપના રાષ્ટ્રીય અધ્યક્ષ થી લઈને વડાપ્રધાન નરેન્દ્ર મોદી અને અમિત શાહે લોકસભા ચૂંટણી 2024ને લઈને રણશિંગુ ફુંકી દીધું છે. જેની તૈયારીના ભાગરુપે ભારતીય જનતા પાર્ટીએ તેના રાષ્ટ્રીય કાર્યકારિણીની બેઠક યોજવાની તારીખ જાહેર કરી લીધી છે. 

રાષ્ટ્રીય કાર્યકારિણી બેઠક 16 થી 18 ફેબ્રુઆરી

આગામી લોકસભાની ચૂંટણીને લઈને ભાજપની મહત્વની બેઠક ફેબ્રુઆરીમાં યોજાશે. ભાજપની રાષ્ટ્રીય કાર્યકારિણીની બેઠક તારીખ 16 ફેબ્રુઆરી થી 18 ફેબ્રુઆરી દરમિયાન દિલ્હીમાં યોજાશે. જેમાં લોકસભાની ચૂંટણીની તૈયારીઓના લેખાજોખાં જોવામાં આવશે. લોકસભા ચૂંટણી પહેલા ભાજપમાં સક્રિયતા ઝડપથી વધી રહી છે. આ બેઠકમાં દેશભરમાંથી ભાજપના 2000 જેટલા નેતાઓ હાજરી આપશે અને આ મહત્વપૂર્ણ બેઠકમાં વડાપ્રધાન મોદી પાર્ટીને ચૂંટણીમાં જીતનો મંત્ર આપશે.

સૂત્રો પાસેથી પ્રાપ્ત માહિતી અનુસાર,

પાર્ટી અધ્યક્ષ જે. પી. નડ્ડાએ લોકસભા ચૂંટણી પહેલાં પાર્ટીના મહા-સચિવોને નવી જવાબદારીઓ આપવાનું શરૂ કરી દીધું છે. સૂત્રોના જણાવ્યા અનુસાર, ભાજપે પાર્ટીના મહાસચિવ વિનોદ તાવડેને જોઇનિંગ કમિટીની જવાબદારી સંભાળવા માટે કહ્યું છે. આ સમિતિ ભાજપમાં અન્ય પક્ષોના પ્રભાવશાળી નેતાઓ અને વર્તમાન સાંસદોને સામેલ કરવાની શક્યતાઓ તપાસશે. ભાજપ આવું એટલા માટે કરી રહ્યું છે કે, આવા નેતાઓના પ્રભાવ અને ચૂંટણી જીતવાની તેમની ક્ષમતાને ધ્યાનમાં રાખીને તેમને પાર્ટીમાં લાવીને ચૂંટણી લડી શકાય.

પાર્ટીનો વિઝન ડોક્યુમેન્ટ બનાવશે

તેવી જ રીતે ભાજપે વિઝન ડોક્યુમેન્ટ તૈયાર કરવાનું કામ રાધા મોહનદાસ અગ્રવાલને સોંપ્યું છે. તેઓ કેટલાક અન્ય મોટા નેતાઓ સાથે મળીને લોકસભા ચૂંટણી 2024 માટે પાર્ટીનો વિઝન ડોક્યુમેન્ટ બનાવશે. ચૂંટણી પ્રચાર, પ્રચાર અને સંગઠનને લગતી અન્ય કામગીરી સુનિલ બંસલ અને અન્ય મહામંત્રીઓ સંભાળશે.

બૌદ્ધ સંમેલનોનું આયોજન

દુષ્યંત ગૌતમ દેશભરમાં બૌદ્ધ સંમેલનોનું આયોજન કરશે અને મોદી સરકારની કામગીરી વિશે જણાવશે. અગાઉ જેપી નડ્ડાએ મંગળવારે પાર્ટીના મહાસચિવો અને કેન્દ્રીય મંત્રીઓ ધર્મેન્દ્ર પ્રધાન, ભૂપેન્દ્ર યાદવ, અશ્વિની વૈષ્ણવ અને મનસુખ માંડવિયા સાથે બેઠક કરી હતી.