Delhiથી વિશાખાપટ્ટનમ જઈ રહેલી ફ્લાઈટમાં બોમ્બની ધમકી, 107 મુસાફરોમાં ફફડાટ

નવી દિલ્હીથી વિશાખાપટ્ટનમ જઈ રહેલી એર ઈન્ડિયાની ફ્લાઈટને બોમ્બની ધમકી મળી હતી. જો કે, ધમકી ભર્યા કોલ મળ્યા બાદ તપાસમાં જાણવા મળ્યું કે, આ એક અફવા છે. વિશાખાપટ્ટનમ એરપોર્ટના ડિરેક્ટર એસ રાજા રેડ્ડીએ જણાવ્યું હતું કે દિલ્હી પોલીસને બોમ્બની ધમકીનો કોલ મળ્યો હતો અને તેણે એરલાઈન અને વિશાખાપટ્ટનમ એરપોર્ટને એલર્ટ કરી દીધું હતું.

દિલ્હીથી વિશાખાપટ્ટનમ જઇ રહેલું વિમાન સુરક્ષિત રીતે લેન્ડ કરવામાં આવ્યું હતું અને પ્લેનની સંપૂર્ણ તપાસ કર્યા પછી જાણવા મળ્યું કે સમગ્ર મામલે તપાસ કરવામાં આવતા કોઇ શંકાસ્પદ મળ્યો નથી અને આ અફવા હોય તેવું ગણાવ્યું છે.

તાજેતરની કેટલીક ઘટનાઓ

થોડા દિવસો પહેલા જબલપુરથી હૈદરાબાદ જતી ઈન્ડિગોની ફ્લાઈટને બોમ્બની ધમકી બાદ નાગપુરમાં ઉતરાણ કરવાની ફરજ પડી હતી. ત્યારબાદ એરલાઈને કહ્યું હતું કે પ્લેનના વોશરૂમમાં રહેલ એક નોટમાં બોમ્બની ધમકી મળ્યા બાદ ફ્લાઈટ 6E-7308ને ડાયવર્ટ કરવામાં આવી હતી. તે પછી પણ અધિકારીએ કહ્યું કે સુરક્ષા એજન્સીઓ દ્વારા સંપૂર્ણ શોધખોળ કર્યા પછી પણ કંઈપણ શંકાસ્પદ મળ્યું નથી.

ઓગસ્ટમાં સામે આવેલી અન્ય ઘટનામાં, મુંબઈથી એર ઈન્ડિયાની ફ્લાઈટમાં બોમ્બની ધમકી મળ્યા બાદ તિરુવનંતપુરમ ઈન્ટરનેશનલ એરપોર્ટ પર સંપૂર્ણ ઈમરજન્સી જાહેર કરવામાં આવી હતી. પીટીઆઈના જણાવ્યા અનુસાર, આ વિમાનના 135 મુસાફરોને આઈસોલેશન ખાડીમાં લઈ જવામાં આવ્યા હતા અને તેમની તપાસ કરવામાં આવી હતી.