Chhattisgarh: સુરક્ષા દળોને મળી મોટી સફળતા, ત્રણ ઈનામી નક્સલવાદીઓ સહિત 19ની ધરપકડ

છત્તીસગઢના સુકમા જિલ્લામાં બુધવારે સુરક્ષાદળોને મોટી સફળતા મળી છે. સુરક્ષા દળોએ અલગ અલગ ઓપરેશનમાં 19 નક્સલીઓની ધરપકડ કરી છે. પોલીસ અધિકારીઓએ જણાવ્યું કે, ધરપકડ કરાયેલા ત્રણ નક્સલવાદીઓ પર ઈનામ જાહેર કરવામાં આવ્યું હતું. જિલ્લાના ભેજ્જી અને જગરગુંડા પોલીસ સ્ટેશન વિસ્તારમાંથી તેમની ધરપકડ કરવામાં આવી હતી.

સુરક્ષા દળો દ્વારા પકડાયેલા ત્રણ નક્સલવાદીઓ પર ઈનામ છે, જેમાં કમાન્ડર બરસે હડમા, કમાન્ડર બરસે નાગેશ અને હેમલા જીતુ પર એક-એક લાખ રૂપિયાનું ઈનામ છે.

ગુપ્તચર માહિતીના આધારે ઓપરેશન

અધિકારીઓએ જણાવ્યું હતું કે, 27 ઓક્ટોબરના રોજ ભેજ્જી પોલીસ સ્ટેશન વિસ્તારના ગોમપાડ અને ભંડારપદર ગામની વચ્ચેના જંગલમાં નક્સલવાદીઓની હાજરી હોવાની માહિતી પર જિલ્લા પોલીસ અને કેન્દ્રીય રિઝર્વ પોલીસ ફોર્સની સંયુક્ત ટીમને ઓપરેશન માટે મોકલવામાં આવી હતી. બાદમાં પોલીસે ભંડારપદર ગામના જંગલોની ઘેરાબંધી કરી હતી અને પાંચ નક્સલીઓની ધરપકડ કરી હતી.

ત્રણ નક્સલવાદીઓ પર પોલીસકર્મીઓની હત્યાનો આરોપ

અધિકારીઓના જણાવ્યા અનુસાર ધરપકડ કરાયેલા નક્સલવાદીઓ પર આ વર્ષે ફેબ્રુઆરીમાં ઇલેક્ટ્રિશિયન પોડિયામ જોગાની હત્યા અને સપ્ટેમ્બરમાં પોલીસ બાતમીદારના આરોપમાં ગામના ઓયામી પાંડુની હત્યામાં સામેલ હોવાનો આરોપ છે. આમાંથી ત્રણ નક્સલવાદીઓ પર 2022માં બે પોલીસકર્મીઓની હત્યા કરવાનો પણ આરોપ છે.

જગરગુંડામાંથી 14ની ધરપકડ

અધિકારીઓએ જણાવ્યું કે, અન્ય એક ઓપરેશનમાં 27 ઓક્ટોબરના રોજ જગરગુંડા પોલીસ સ્ટેશન વિસ્તારમાં નક્સલવાદીઓની હાજરી હોવાની માહિતી પર સંયુક્ત ટીમે ઘેરાબંધી કરી અને 14 નક્સલવાદીઓની ધરપકડ કરી છે. સુરક્ષા દળોએ ધરપકડ કરાયેલા નક્સલવાદીઓ પાસેથી ગનપાઉડર, વિસ્ફોટકો અને અન્ય વસ્તુઓ જપ્ત કરી છે.

કોર્ટે નક્સલવાદીઓને જેલમાં મોકલ્યા

અધિકારીઓએ જણાવ્યું હતું કે, નક્સલવાદીઓની પૂછપરછ દરમિયાન જાણવા મળ્યું હતું કે તેઓ સુરક્ષા દળોને નુકસાન પહોંચાડવા માટે માર્ગ પર લેન્ડમાઈન નાખવાનો પ્રયાસ કરી રહ્યા હતા. બુધવારે પોલીસે તમામ નક્સલવાદીઓને સ્થાનિક કોર્ટમાં રજૂ કર્યા, જ્યાંથી તેમને જેલ મોકલી દેવામાં આવ્યા. અધિકારીઓએ જણાવ્યું કે, નક્સલવાદીઓને પકડવા માટે આ વિસ્તારમાં સતત વિશેષ ઓપરેશન ચલાવવામાં આવી રહ્યા છે.