જસ્ટિસ સંજીવ ખન્ના હશે દેશના નવા ચીફ જસ્ટિસ, CJIએ કેન્દ્રને કરી ભલામણ

ચીફ જસ્ટિસ ડીવાય ચંદ્રચુડનો કાર્યકાળ પૂરો થઈ રહ્યો છે. તેઓ 10 નવેમ્બર 2024ના રોજ નિવૃત્ત થશે. આવી સ્થિતિમાં તેમણે પોતાના અનુગામીની ભલામણ કરી છે. CJIએ કેન્દ્ર સરકારને પત્ર લખીને જસ્ટિસ ખન્નાના નામનો પ્રસ્તાવ મૂક્યો છે. મોદી સરકારને મોકલવામાં આવેલી ભલામણમાં તેમણે કહ્યું છે કે સંજીવ ખન્ના દેશના આગામી મુખ્ય ન્યાયાધીશ હશે.

CJIએ કેન્દ્રને કરી ભલામણ 

ડીવાય ચંદ્રચુડ 10 નવેમ્બરે 65 વર્ષના થશે. તેમણે 9 નવેમ્બર 2022 ના રોજ ભારતના મુખ્ય ન્યાયાધીશનું પદ સંભાળ્યું. CJI ચંદ્રચુડ દ્વારા કેન્દ્રને લખવામાં આવેલા પત્રમાં કહેવામાં આવ્યું છે કે 10 નવેમ્બરે પદ છોડ્યા બાદ જસ્ટિસ ખન્ના સુપ્રીમ કોર્ટના નવા મુખ્ય ન્યાયાધીશ તરીકે કાર્યભાર સંભાળશે. જો કેન્દ્ર સરકાર CJI ચંદ્રચુડની ભલામણ સ્વીકારે છે, તો જસ્ટિસ ખન્ના ભારતના 51માં મુખ્ય ન્યાયાધીશ હશે. CJI તરીકે જસ્ટિસ ખન્નાનો કાર્યકાળ 13 મે, 2025 સુધી લગભગ 7 મહિનાનો રહેશે. જસ્ટિસ ખન્નાને જાન્યુઆરી 2019માં દિલ્હી હાઈકોર્ટમાંથી સુપ્રીમ કોર્ટમાં બઢતી આપવામાં આવી હતી. સામાન્ય રીતે સુપ્રીમ કોર્ટના જજની નિવૃત્તિ વય 65 વર્ષ હોય છે.

કોણ છે જસ્ટિસ સંજીવ ખન્ના?

• સંજીવ ખન્નાએ લાંબા સમય સુધી આવકવેરા વિભાગમાં વરિષ્ઠ સ્થાયી સલાહકાર તરીકે સેવા આપી ચૂક્યા છે. તેમણે 2004માં રાષ્ટ્રીય રાજધાની ક્ષેત્ર દિલ્હી માટે સ્થાયી વકીલ (સિવિલ) નિયુક્ત કરાયા હતા. તેઓ દિલ્હી હાઇકોર્ટમાં એડિશનલ પબ્લિક પ્રોસિક્યુટર અને એમિક્સ ક્યૂરીના રૂપમાં ફોજદારી કેસોના મામલામાં હાજર રહીને દલીલો કરી હતી.,
• 2005માં તેમને દિલ્હી હાઈકોર્ટના એડિશનલ જજ તરીકે બઢતી આપવામાં આવી હતી અને 2006માં તેમને કાયમી જજ બનાવવામાં આવ્યા હતા.
• દિલ્હી હાઈકોર્ટના ન્યાયાધીશ તરીકે તેમણે દિલ્હી એકેડમી, દિલ્હી ઈન્ટરનેશનલ આર્બિટ્રેશન સેન્ટર અને ડિસ્ટ્રિક્ટ કોર્ટના અધ્યક્ષ/ઈન્ચાર્જનું પદ પણ સંભાળ્યું છે.
• જસ્ટિસ સંજીવ ખન્નાને 18 જાન્યુઆરી 2019ના રોજ સુપ્રીમ કોર્ટના જસ્ટિસ બનાવવામાં આવ્યા હતા. જસ્ટિસ ખન્ના એવા જજોમાં સામેલ છે જેઓ કોઈપણ હાઈકોર્ટના ચીફ જસ્ટિસ બનતા પહેલા જ સુપ્રીમ કોર્ટમાં પદોઉન્નતિ પામ્યા.
• તેમણે 17 જૂન 2023 થી 25 ડિસેમ્બર 2023 સુધી સુપ્રીમ કોર્ટ લીગલ સર્વિસીસ કમિટીના અધ્યક્ષનું પદ સંભાળ્યું હતું અને હાલમાં નેશનલ લીગલ સર્વિસ ઓથોરિટીના કાર્યકારી અધ્યક્ષ અને રાષ્ટ્રીય ન્યાયિક એકેડેમી, ભોપાલની ગવર્નિંગ કાઉન્સિલના સભ્ય છે.