Cyber Crime: દેશભરમાં 87 કરોડની સાયબર છેતરપિંડીના આરોપસર ગુરુગ્રામથી 7 લોકોની ધરપકડ

દેશભરમાં સેંકડો લોકો પાસેથી 87 કરોડ રૂપિયાથી વધુની સાયબર છેતરપિંડીના આરોપસર ગુરુગ્રામથી સાત છેતરપિંડી કરનારાઓની ધરપકડ કરવામાં આવી છે. ગુરુગ્રામ સાયબર પોલીસે છેલ્લા બે મહિનામાં આ ધરપકડો કરી છે. પોલીસે તેની પાસેથી 7.60 લાખ રૂપિયા રોકડા, સાત મોબાઈલ ફોન અને ત્રણ સિમ કાર્ડ જપ્ત કર્યા છે.

87 કરોડ રૂપિયાથી વધુની સાયબર છેતરપિંડીમાં 7ની ધરપકડ

ગુરુગ્રામ સાયબર શાખાના આસિસ્ટન્ટ કમિશનર ઓફ પોલીસ પ્રિયાંશુ દિવાને જણાવ્યું હતું કે આરોપીઓ વિવિધ સાયબર ગુનાઓમાં સંડોવાયેલા હતા. દેશભરમાં આરોપીઓ વિરુદ્ધ કુલ 10,956 ફરિયાદો અને 399 કેસ નોંધાયા છે. આમાંથી 22 કેસ હરિયાણામાં નોંધાયેલા છે, જેમાંથી છ કેસ ગુરુગ્રામમાં છે. ત્યારે આ બાબતે તપાસ ચાલી રહી હતી અને બે મહિનાની અંદર જ તેની ધરપકડ કરવામાં આવી છે.

તેમણે કહ્યું કે આરોપીઓની ઓળખ સોનુ કુમાર, ઈશ્વર, સુનીલ કુમાર, પવન કુમાર શર્મા, નીરજ, સલીમ અને પ્રિયા મિશ્રા તરીકે થઈ છે. ઇન્ડિયન સાયબર ક્રાઇમ કોઓર્ડિનેશન સેન્ટર (I4C) તરફથી મળેલા ડેટાની સમીક્ષા કર્યા પછી પોલીસે શોધી કાઢ્યું કે સાત સાયબર છેતરપિંડી કરનારાઓએ દેશભરમાં અનેક લોકો સાથે છેતરપિંડી આચરી લોકોના 87.06 કરોડ રૂપિયા ચાઉં કરી ગયા છે.

પોલીસે રોકડ સહિતની સામગ્રી જપ્ત કરી 

તપાસ દરમિયાન, પોલીસને જાણવા મળ્યું કે આરોપીઓ ફેડએક્સ (ફેડરલ એક્સપ્રેસ) ના નકલી અધિકારીઓ તરીકે પોતાને રજૂ કરીને લોકોને છેતરતા હતા. કેટલાક આરોપીઓએ તેમના પીડિતોને શેરબજારમાં રોકાણ પર ઊંચા વળતરનું વચન પણ આપ્યું હતું. પોલીસે તેના કબજામાંથી 60.91 લાખ રૂપિયા રોકડા, એક નોટ ગણવાની મશીન અને 9 ફોન જપ્ત કર્યા.

ગત વર્ષે સાયબર છેતરપિંડીમાં 24 ની ધરપકડ કરાઇ હતી

ગયા વર્ષે ઓક્ટોબરમાં ગુરુગ્રામ પોલીસે 17 કરોડ રૂપિયાના સાયબર છેતરપિંડીના કેસમાં 24 લોકોની ધરપકડ કરી હતી. દેશભરમાં આરોપીઓ વિરુદ્ધ કુલ 4568 ફરિયાદો અને 189 કેસ નોંધાયા હતા. આમાંથી 14 કેસ હરિયાણામાં નોંધાયા હતા, જેમાં ગુરુગ્રામમાં ત્રણનો સમાવેશ થાય છે. આ આધારે તપાસ હાથ ધરવામાં આવી હતી.