અંદામાન સમુદ્રમાં સર્જાયેલ ચક્રવાતી તોફાન દાના બંગાળની ખાડીમાં પહોંચી ગયું છે. આજે તોફાનના કારણે ઓડિશા, પશ્ચિમ બંગાળ, કેરળ, તમિલનાડુ, કર્ણાટકમાં હવામાન ખૂબ જ ખરાબ છે. જો કે ચક્રવાતી તોફાન આંદામાન સમુદ્રમાંથી નીકળી ગયું છે, તેથી કેરળ, તમિલનાડુ, કર્ણાટકમાં તોફાનની અસર ઓછી થઈ છે, પરંતુ હવે તોફાન બંગાળની ખાડીમાં છે. તે આવતીકાલે 24 ઓક્ટોબરે સવારે ઓડિશાના પુરીના દરિયાકાંઠે ત્રાટકવાની શક્યતા છે.
આવતીકાલે દરિયાકાંઠે ટકરાયા બાદ પવનની ઝડપ 150 કિલોમીટર પ્રતિ કલાક સુધી પહોંચી શકે છે
આજે તોફાનની અસરને કારણે ઓડિશામાં 100થી 120 કિલોમીટર પ્રતિ કલાકની ઝડપે પવન ફૂંકાઈ રહ્યો છે. આવતીકાલે દરિયાકાંઠે ટકરાયા બાદ પવનની ઝડપ 150 કિલોમીટર પ્રતિ કલાક સુધી પહોંચી શકે છે. ઓડિશામાં આજે ભારેથી અતિભારે વરસાદની સંભાવના છે. છેલ્લા 4-5 દિવસથી વરસાદના કારણે જનજીવન અસ્તવ્યસ્ત છે. તેથી, ઓડિશા સરકારે રહેવાસીઓ અને પ્રવાસીઓ માટે એક એડવાઈઝરી જારી કરી છે. તેમજ સ્થાનિક રહેવાસીઓને તેમના ઘરની અંદર રહેવા માટે કહેવામાં આવ્યું છે.
ઓડિશામાં તોફાનનો સામનો કરવાની તૈયારી
ઓડિશાના વિશેષ રાહત અધિકારી દેવ રંજન સિંહના જણાવ્યા અનુસાર, તોફાન આજે 24 ઓક્ટોબરની મધ્યરાત્રિએ અથવા આવતીકાલે 25 ઓક્ટોબરની સવારે પુરીના કિનારે ટકરાશે. તેથી દરિયાકાંઠાના વિસ્તારોને ખાલી કરાવવામાં આવ્યા છે. 14 જિલ્લાની શાળા-કોલેજો, આંગણવાડી-કચેરીઓ બંધ છે. કર્મચારીઓ, ડોકટરો, પોલીસ કર્મચારીઓની રજાઓ રદ કરવામાં આવી છે. ડિઝાસ્ટર મેનેજમેન્ટ મિનિસ્ટર સુરેશ પૂજારી પોતે પરિસ્થિતિ પર નજર રાખી રહ્યા છે. પુરીથી પ્રવાસીઓ નીકળી ગયા છે. હોટેલ બુકિંગ કેન્સલ કરવામાં આવ્યા છે. કાર્તિક સ્નાન માટે પુરી પહોંચેલી 5 હજાર મહિલાઓને સલામત સ્થળે ખસેડવામાં આવી છે.
મંદિરોમાં ભક્તોનો પ્રવેશ બંધ કરી દેવામાં આવ્યો છે
મંદિરોમાં ભક્તોનો પ્રવેશ બંધ કરી દેવામાં આવ્યો છે. ઓડિશા સ્ટેટ ડિઝાસ્ટર ફોર્સની 51 ટીમો, ફાયર બ્રિગેડની 178 અને NDRFની 10 ટીમો બચાવ કામગીરી માટે તૈનાત કરવામાં આવી છે. ખરાબ હવામાનને કારણે રાષ્ટ્રપતિ દ્રૌપદી મુર્મુએ પણ તેમની ઓડિશાની 3 દિવસની મુલાકાત મુલતવી રાખી છે. માછીમારોને દરિયાકિનારાની નજીક ન જવા માટે કહેવામાં આવ્યું છે. 750 રાહત કેન્દ્રો બનાવવામાં આવ્યા છે. કંટ્રોલ રૂમ 24 કલાક કાર્યરત રહેશે. ભારતીય કોસ્ટ ગાર્ડ (ICG), આર્મી, એરફોર્સ અને નેવીને એલર્ટ મોડમાં રાખવામાં આવ્યા છે. વાયુસેનાના વિમાનો અને નૌકાદળના જહાજો નજીકમાં ફરતા રહેશે.
