દિલ્હીમાં સોમવાર (14 ઓક્ટોબર)થી ફટાકડાના ઉત્પાદન, સંગ્રહ, વેચાણ અને ઉપયોગ પર પ્રતિબંધ લાગુ કરવામાં આવ્યો છે. આ પ્રતિબંધ આવતા વર્ષની 1 જાન્યુઆરી સુધી અમલમાં રહેશે. દિલ્હી સરકાર દ્વારા જારી કરવામાં આવેલા નિર્દેશોમાં આ નિર્ણયની માહિતી આપવામાં આવી છે. શિયાળામાં દિલ્હીમાં પ્રદૂષણ ઘણું વધી જાય છે. આ કારણે આ વખતે પણ દિવાળી પહેલા જ દિલ્હીમાં ફટાકડા ફોડવા પર પ્રતિબંધ મુકવામાં આવ્યો છે.
દિલ્હીમાં દશેરાની ઉજવણી બાદ તરત જ દિલ્હી પ્રદૂષણ નિયંત્રણ સમિતિએ વધતા પ્રદૂષણને ધ્યાનમાં રાખીને ફટાકડા પર પ્રતિબંધની જાહેરાત કરી છે. દશેરાની ઉજવણીના એક દિવસ બાદ રવિવારે દિલ્હીમાં હવાની ગુણવત્તા 'મધ્યમ'થી 'નબળી' શ્રેણીમાં આવી ગઈ હતી. સેન્ટ્રલ પોલ્યુશન કંટ્રોલ બોર્ડના જણાવ્યા અનુસાર, સોમવાર બપોર સુધી હવા ગુણવત્તા સૂચકાંક એટલે કે AQI 228 સાથે 'નબળી' શ્રેણીમાં રહ્યો.
દિલ્હી પોલીસે રોજ રિપોર્ટ કરવો પડશે
દિલ્હી પોલ્યુશન કંટ્રોલ કમિટીના પત્રમાં દિલ્હી પોલીસને ફટાકડા પર સંપૂર્ણ પ્રતિબંધ લાદવાની સૂચનાઓને અમલમાં મૂકવાનો આદેશ આપવામાં આવ્યો છે. સૂચનામાં કહેવામાં આવ્યું છે કે પોલીસે દિલ્હી પ્રદૂષણ નિયંત્રણ સમિતિને રોજનો રિપોર્ટ આપવો પડશે. પર્યાવરણ મંત્રી ગોપાલ રાયે પણ લોકોને આ માટે સહયોગ કરવાની અપીલ કરી છે. તેમણે X પર દિલ્હી પ્રદૂષણ નિયંત્રણ સમિતિનો પત્ર શેર કર્યો છે.
ફટાકડા પર 1 જાન્યુઆરી સુધી પ્રતિબંધ
પત્ર શેર કરતી વખતે ગોપાલ રાયે લખ્યું, શિયાળામાં વધતા પ્રદૂષણને ધ્યાનમાં રાખીને, ફટાકડાના ઉત્પાદન, સંગ્રહ, વેચાણ અને ઉપયોગ પર આજથી 1 જાન્યુઆરી સુધી પ્રતિબંધ લાગુ છે. દિલ્હી સરકારે પ્રતિબંધને લઈને નિર્દેશ જારી કર્યા છે. તમામ દિલ્હીવાસીઓ પાસેથી સહકારની વિનંતી છે. એર ક્વોલિટી મેનેજમેન્ટ કમિશને રવિવારે હવાની ગુણવત્તાનું મૂલ્યાંકન કર્યું અને કહ્યું કે તે ગ્રેડેડ રિસ્પોન્સ એક્શન પ્લાનના સ્ટેજ-1ને અમલમાં મૂકતા પહેલા એકાદ દિવસ સુધી તેની નજીકથી દેખરેખ રાખશે. એનસીઆર અને આસપાસના વિસ્તારોમાં વાયુ પ્રદૂષણને અટકાવી શકાય છે.
