દિલ્હી વિધાનસભાની ચૂંટણી દરમિયાન એક વીડિયો સોશિયલ મીડિયા પર વાયરલ થયો હતો. કે જેમાં પીએમમોદીએ જનસભા સંબોધન દરમિયાન બીજેપી નેતાની પગે લાગતા જોવા મળ્યા હતા. ત્યારે આજે દિલ્હીના ચૂંટણી પરિણામમાં તે જ નેતા વિજયી બન્યા છે. આ બીજેપી નેતાનું નામ છે રવિન્દ્રસિંહ નેગી. કે જેઓને બીજેપીએ પટપડગંજથી ઉમેદવાર બન્યા હતા.
AAPના અવધ ઓઝાને હરાવ્યા
મહત્વનું છે કે પટપડગંજ બેઠક પરથી આમ આદમી પાર્ટી (AAP)ના ઉમેદવાર અવધ ઓઝાએ દિલ્હી વિધાનસભા ચૂંટણીમાં પોતાની હાર સ્વીકારી લીધી છે. ભારતીય જનતા પાર્ટી (ભાજપ) ના ઉમેદવાર રવિન્દ્ર સિંહ નેગીએ તેમને હરાવ્યા છે. રવિન્દ્ર નેગીએ આમ આદમી પાર્ટીના અવધ ઓઝાને 23,280 મતોથી હરાવ્યા. રવિન્દ્ર સિંહ નેગી અગાઉ પણ આ બેઠક પરથી સમાચારમાં રહી ચૂક્યા છે. 2020 ની વિધાનસભા ચૂંટણીમાં, તેમણે મનીષ સિસોદિયાને સખત ટક્કર આપી હતી. જો કે આ વખતે સિસોદિયાએ પોતાની બેઠક બદલીને જંગપુરાથી ચૂંટણી લડી હતી પરંતુ તેમને ત્યાં પણ હારનો સામનો કરવો પડ્યો હતો.
રવિન્દ્રસિંહ નેગીની રાજકીય સફર?
તેઓ વર્ષ 2020માં પટપડગંજથી AAP નેતા મનીષ સિસોદિયા સામે લડ્યા પરંતુ માત્ર 2ટકા મતોના માર્જિનથી હારી ગયા.
2022 MCD ચૂંટણી સમયે ભાજપે તેમને વિનોદ નગર વોર્ડમાંથી ટિકિટ આપી હતી. જ્યાં તેમણે AAP ઉમેદવારને 2,311 મતોથી હરાવ્યા હતા. તેમણે દિલ્હી ભાજપ એકમમાં જિલ્લા મહાસચિવ તરીકે કામ કર્યું છે.
કોણ છે રવિન્દ્રસિંહ નેગી?
રવિન્દ્ર નેગીનું નામ પણ વિવાદો સાથે જોડાયેલું છે. સોશિયલ મીડિયા પર કેટલાક વીડિયો વાયરલ થયા હતા જેમાં તેઓ એક દુકાનદારને તેની ડેરીનું નામ બદલવા માટે કહી રહ્યા હતો. બીજા એક વીડિયોમાં, તે હિન્દુ ફેરિયાઓને તેમના વાહનો પર ભગવા ધ્વજ લગાવવાનું કહેતા જોવા મળ્યા હતા. ચૂંટણી પંચમાં આપવામાં આવેલી માહિતી મુજબ રવિન્દ્રસિંહ નેગીની ઉંમર 48 વર્ષ છે. તેઓ સ્નાતક છે. તેમની કુલ સંપત્તિ ₹1.8 કરોડ છે અને દેવું ₹16 લાખ છે.
27 વર્ષ પછી જીતી આ બેઠક ?
મહત્વનું છે કે આ વખતે પટપડગંજ બેઠક પર ભાજપ અને આમ આદમી પાર્ટી વચ્ચે નજીકની સ્પર્ધા જોવા મળી હતી. રવિન્દ્ર સિંહ નેગીએ AAP ઉમેદવાર અવધ ઓઝાને હરાવ્યા અને આ બેઠક ભાજપના ખાતામાં અપાવી છે. ભાજપ માટે આ જીત ઐતિહાસિક છે, કારણ કે પાર્ટીએ 27 વર્ષ પછી આ બેઠક જીતી છે.
