કેજરીવાલના પત્નીને દિલ્હી હાઇકોર્ટથી મોટી રાહત, બે Voter ID રાખવાનો છે મામલો

• કેજરીવાલના પત્ની સુનીતા કેજરીવાલને મોટી રાહત 
  
• તેમના પર બે વોટર આઈડી કાર્ડ હોવાનો આરોપ છે
• BJP નેતા હરીશ ખુરાનાની ફરિયાદ પર કેસ નોંધ્યો હતો

દિલ્હીના મુખ્યમંત્રી અરવિંદ કેજરીવાલના પત્ની સુનીતા કેજરીવાલને મોટી રાહત મળી છે. તેમના પર બે વોટર આઈડી કાર્ડ હોવાનો આરોપ છે. આ કેસમાં ટ્રાયલ કોર્ટે સુનીતાને સમન્સ જારી કર્યા હતા. જેના પર દિલ્હી હાઈકોર્ટે પ્રતિબંધ મૂક્યો છે. બીજેપી નેતા હરીશ ખુરાનાની ફરિયાદ પર આ કેસ નોંધવામાં આવ્યો હતો. 28 ઓગસ્ટ 2023ના રોજ સમન્સ જારી કરવામાં આવ્યું હતું.

જસ્ટિસ અમિત બંસલે આદેશ પસાર કર્યો અને કહ્યું કે ટ્રાયલ કોર્ટના આદેશ પરનો સ્ટે 1 ફેબ્રુઆરી, 2024 સુધી અમલમાં રહેશે જ્યારે કેસની આગામી સુનાવણી થશે.

તીસ હજારી કોર્ટના મેટ્રોપોલિટન મેજિસ્ટ્રેટ અર્જિન્દર કૌરે સુનીતા કેજરીવાલને 29 ઓગસ્ટ, 2023ના રોજ સમન્સ જારી કર્યા હતા.

શું છે સમગ્ર મામલો?

તમને જણાવી દઇએ કે હરીશ ખુરાનાએ 2019માં સુનિતા કેજરીવાલ વિરુદ્ધ ફરિયાદ નોંધાવી અને આરોપ લગાવ્યો હતો કે તે સાહિબાબાદ (ગાઝિયાબાદ મતવિસ્તાર) અને દિલ્હીના ચાંદની ચોકની મતદાર યાદીમાં મતદાર તરીકે નોંધાયેલી છે, જે લોકોના પ્રતિનિધિત્વ અધિનિયમની કલમ 17નું ઉલ્લંઘન છે. આ કેસની સુનાવણી બાદ ટ્રાયલ કોર્ટે સમન્સ જારી કર્યા હતા.

વરિષ્ઠ વકીલ રેબેકા જ્હોન કેજરીવાલ વતી હાજર થયા અને હાઈકોર્ટને જણાવ્યું કે લોકપ્રતિનિધિત્વ અધિનિયમ મુજબ, જ્યારે કોઈ વ્યક્તિ ખોટી ઘોષણા રજૂ કરે છે ત્યારે જ ગુનો બને છે અને આ કિસ્સામાં ખુરાનાએ તે બતાવવા માટે કંઈપણ રેકોર્ડ પર રાખ્યું નથી જેનાથી કરેલી જાહેરાત ખોટી સાબિત થવી જોઈએ.