- દિલ્હી ફરી એકવાર વરસાદથી પ્રભાવિત
- વરસાદને કારણે અનેક વિસ્તારોમાં ભરાયા પાણી
- વરસાદથી પ્રભાવિત રૂટ વિશે ટ્રાફિક પોલીસે આપી સૂચના
દેશના અનેક રાજ્યોમાં મેઘરાજા મન મુકીને વરસી રહ્યા છે. હવામાન વિભાગની આગાહીને પગલે દિલ્હીના અનેક ભાગોમાં ભારે વરસાદની આગાહી કરવામાં આવી છે. તેવામાં દિલ્હી પર મેઘરાજા મહેરબાન થયા છે. અનેક વિસ્તારોમાં વરસાદી પાણી ભરાતા વાહચાલકોને હાલાકી ભોગવવાનો વારો આવ્યો છે.
મળતી માહિતી મુજબ, દેશની રાજધાની દિલ્હી ફરી એકવાર વરસાદથી પ્રભાવિત થઈ છે. બુધવારે રાત્રે શરૂ થયેલા વરસાદને કારણે અનેક વિસ્તારોમાં પાણી ભરાઈ ગયા છે અને રસ્તાઓ બંધ થઈ ગયા છે. નીચાણવાળા વિસ્તારોના રસ્તાઓ પણ પાણીમાં ગરકાવ થઈ ગયા છે અને અનેક અંડરપાસમાં પણ પાણી ભરાઈ ગયા છે. આવી સ્થિતિમાં દિલ્હીના રસ્તાઓ બંધ કરી દેવામાં આવ્યા છે. જેના કારણે વાહનવ્યવહાર પણ પ્રભાવિત થયો છે. દિલ્હી ટ્રાફિક પોલીસે સોશિયલ મીડિયા પર વરસાદથી પ્રભાવિત રૂટ વિશે સતત માહિતી આપી રહી છે. આ માર્ગો પર ન જવાની સલાહ આપવામાં આવી છે.
મહેરૌલી-બદરપુર રોડ પર રોડ પાણીથી ભરાઈ ગયો હોવા છતાં લોકો ત્યાંથી પસાર થતા રહ્યા. જો કે, અંડરપાસમાંથી પસાર થવું અથવા પાણી ભરાયેલા રસ્તા પર વાહન ચલાવવું અત્યંત જોખમી છે. થોડા દિવસો પહેલા દિલ્હીમાં પાણી ભરાયેલા રસ્તા પર એક મહિલા પુલ ક્રોસ કરી રહી હતી. મહિલાને રસ્તો ખબર ન હોવાથી તેના ત્રણ વર્ષના પુત્ર સાથે ગટરમાં ડૂબી ગઈ હતી. આ અકસ્માતમાં બંનેના મોત થયા હતા.
