દિલ્હી એનસીઆરમાં બુધવારે સવારે અચાનક વાતાવરણમાં બદલાવ જોવા મળ્યો છે. રાત્રિએ આકાશમાં વાદળો છવાયા હતા પરંતુ સવારે સાડા સાત વાગ્યે પણ વાતાવરણ અંધાર્યુ હતું, જાણે કે હમણા વરસાદ પડશે અને પડ્યો પણ. ગાઝિયાબાદ, નોઈડા અને ગુરુગ્રામ સહિત દિલ્હી એનસીઆરના ઘણા વિસ્તારોમાં હળવો અને ભારે વરસાદ પડી રહ્યો છે.
જેના કારણે ઓફિસો માટે ઘરેથી નીકળેલા લોકો અધવચ્ચે જ અટવાયા હતા. અનેક વિસ્તારોમાં પાણી ભરાઈ જવાની સ્થિતિ સર્જાઈ હતી.
કાળા ડિબાંગ વાદળો છવાયા
ભારતીય હવામાન વિભાગના જણાવ્યા અનુસાર ઓડિશામાં બનેલું લો પ્રેશર હવે મધ્યપ્રદેશ તરફ ખૂબ જ ઝડપથી આગળ વધી રહ્યું છે. જેના કારણે આજે મધ્યપ્રદેશના મોટા ભાગોમાં ભારે વરસાદની સંભાવના છે. આ લો પ્રેશરને કારણે દિલ્હી એનસીઆરથી લઈને ઉત્તર પ્રદેશ અને બિહાર સુધી રાજસ્થાનના મોટા ભાગને અસર થવાની ધારણા હતી. આ પછી બુધવારે સવારે દિલ્હી એનસીઆરમાં વાતાવરણ એકદમ સ્વચ્છ જોવા મળ્યુ પરંતુ જેમ જેમ દિવસ આગળ વધતો ગયો સવારે 7 વાગે તો જાણે રાત પડી હોય તેવું અંધાર્યુ હતું.
નોઈડા ગાઝિયાબાદમાં ભારે વરસાદ
ગાઝિયાબાદ, નોઈડા, ગુરુગ્રામ, નજફગઢ અને દ્વારકા જેવા NCR વિસ્તારોમાં ભારે વરસાદ શરૂ થઈ ગયો. અન્ય ઘણા વિસ્તારોમાં પણ હળવો વરસાદ થયો છે. હવામાન વિભાગના દિલ્હી કેન્દ્રના જણાવ્યા અનુસાર, આજે દિવસભર વરસાદ ચાલુ રહેવાની સંભાવના છે. બીજી તરફ બુધવારે વહેલી સવારે કામ અર્થે ઘરની બહાર નીકળેલા લોકો આ વરસાદને કારણે અટવાઈ પડ્યા હતા. માર્ગો પર અનેક જગ્યાએ ટ્રાફિક જામ થયો હતો.
ભારે પવન સાથે વરસાદની શક્યતા
હવામાન વિભાગની આગાહી મુજબ દિલ્હીમાં વરસાદ પડી રહ્યો છે. વાતાવરણ એકદમ ખુશનુમા અને ઠંડક વાળુ જોવા મળી રહ્યું છે. હવામાન વિભાગે ગાઝિયાબાદ અને NCR વિસ્તારોમાં ગૌતમ બુદ્ધમાં વરસાદ માટે યલો એલર્ટ પણ જાહેર કર્યું છે. ફરીદાબાદ અને ગુરુગ્રામમાં પણ હળવા ઝરમર વરસાદની શક્યતા છે.
