- કેન્દ્રીય ગૃહ મંત્રાલયની દેખરેખ હેઠળ આ એક્ઝામ લેવાશે
- એક્ઝામના બે કલાક પૂર્વે જ પ્રશ્નપત્ર તૈયાર કરાશે
- કુલ 2.38 લાખ ઉમેદવારો આ એક્ઝામ આપશે
પોસ્ટ-ગ્રેજ્યુએટ મેડિકલ કોર્સિસમાં પ્રવેશ માટેની NEET-PG એક્ઝામ એક મહિનાની અંદર લેવાઇ શકે છે તેમ સૂત્રો દ્વારા જાણવા મળ્યું છે. સૂત્રોના કહેવા મુજબ મંગળવારે બપોરે ગૃહ મંત્રાલયના અધિકારીઓ સરકારની એન્ટી-સાઈબર ક્રાઇમ બૉડીના અધિકારીઓને મળ્યા હતા.
NEET-PGનું મોનિટરિંગ ગૃહ મંત્રાલય કરશે અને પ્રશ્નપત્ર એક્ઝામના બે કલાક પૂર્વે જ તૈયાર કરાશે. કુલ 2.38 લાખ ઉમેદવારો આ એક્ઝામ આપશે. અગાઉ આ એક્ઝામ ગત 23 જૂને લેવાનારી હતી પરંતુ પેપર લીક સહિતની ગેરરીતિઓના કારણસર 22 જૂને રાત્રે એક્ઝામ મુલતવી રખાઇ હતી. નેશનલ બોર્ડ ઑફ એક્ઝામિનેશન્સ ઇન મેડિકલ સાયન્સિસ (NBEMS)નાં વાઇસ પ્રેસિડેન્ટ પ્રો. મીનુ બાજપેઇના જણાવ્યાનુસાર સરકાર કોઇ છીડાં ન રહે તે માટે વિવિધ એજન્સીઓના માધ્યમથી તકેદારી રાખી રહી છે. પેપર લીક મામલે તેમણે કહ્યું કે ગૃહ મંત્રાલય, ઇન્ફર્મેશન ટેક્નોલોજી મંત્રાલય અને આરોગ્ય મંત્રાલય સમગ્ર મામલે વ્યાપક સ્તરે અવલોકન કરી રહ્યા છે. તપાસ પૂરી થવામાં છે. પરીક્ષામાં કોઇ પણ પ્રકારની ગરબડ નહીં થાય. પરીક્ષા પારદર્શી રીતે લેવાશે.
