- મોદી 3.0ની પ્રથમ કેબિનેટ મિટિંગમાં મહત્ત્વનો નિર્ણય
- છેલ્લા 10 વર્ષમાં આ યોજના હેઠળ ગરીબ કુટુંબો માટે 4.21 કરોડ ઘરોનું નિર્માણ થઈ ચૂક્યું છે
- ઘરમાં તમામ સુવિધાઓ પણ ઉપલબ્ધ કરાવાઈ છે
મોદી 3.0ના શપથ લીધા બાદથી નવી સરકાર ફૂલ એક્શન મોડમાં હોય તેવું લાગી રહ્યું છે. વડાપ્રધાન મોદીએ સોમવારે સવારે પોતાનું કામ સંભાળ્યા બાદ કિસાન સન્માન નિધિને લઈને મોટો નિર્ણય લીધો હતો તો સાંજે કેબિનેટ મિટિંગમાં પીએમ આવાસ યોજનાને વધુ લંબાવવાનો નિર્ણય કર્યો છે.
વડાપ્રધાન નરેન્દ્ર મોદીએ સોમવારે સાંજે તેમની નવી કેબિનેટની પ્રથમ બેઠક યોજી હતી. આ બેઠકમાં નિર્ણય લેવામાં આવ્યો હતો કે કેન્દ્ર સરકાર ત્રણ કરોડ વધારાના ગ્રામીણ અને શહેરી પરિવારોને પ્રધાનમંત્રી આવાસ યોજના હેઠળ ઘર બનાવવા માટે સહાય પૂરી પાડશે. 10 વર્ષમાં 4.21 કરોડ મકાનો બનાવવામાં આવ્યા છે. ભાજપનો ઢંઢેરો બહાર પાડતી વખતે ખુદ વડાપ્રધાને આની જાહેરાત કરી હતી. અધિકારીઓએ જણાવ્યું હતું કે આજે મળેલી કેબિનેટની બેઠકમાં ત્રણ કરોડ વધારાના ગ્રામીણ અને શહેરી પરિવારોને લાયક પરિવારોની સંખ્યામાં વધારાને કારણે ઊભી થતી આવાસની જરૂરિયાતોને પહોંચી વળવા માટે મકાનો બાંધવા માટે સહાય પૂરી પાડવાનો નિર્ણય લેવામાં આવ્યો છે.
