- બિહારના મુખ્યમંત્રી નીતિશ કુમાર દિલ્હીના પ્રવાસે
- નીતીશ કુમાર અને તેજસ્વી યાદવે રાહુલ ગાંધી સાથે કરી મુલાકાત
- ભાજપના ખુશ્બુ સુંદરે મુલાકાતની સરખામણી મહાભારતના કૌરવો સાથે કરી
બિહારના મુખ્યમંત્રી નીતીશ કુમાર અને નાયબ મુખ્યમંત્રી તેજસ્વી યાદવે બુધવારે (12 એપ્રિલ) રાહુલ ગાંધી અને કોંગ્રેસ અધ્યક્ષ મલ્લિકાર્જુન ખડગે સાથે મુલાકાત કરી હતી. આ સાથે ભાજપ હવે વિપક્ષી પાર્ટીઓ પર હુમલો કરનાર બની ગયું છે. સત્તાધારી ભાજપે વિપક્ષી ગઠબંધનની શક્યતાને નકારી કાઢી છે. બીજેપીના અમિત માલવિયાએ રાહુલ અને નીતીશનો ફોટો શેર કરીને કહ્યું હતું કે, 'હજી કોની-કોની લોકો સામે ઝુકશે નીતીશ કુમાર'. તે જ સમયે, ભાજપના ખુશ્બુ સુંદરે તેની સરખામણી મહાભારતના કૌરવો સાથે કરી હતી.
હકીકતમાં બિહારના મુખ્યમંત્રી નીતિશ કુમાર દિલ્હીના પ્રવાસે છે. નીતિશ કુમાર કોંગ્રેસ અધ્યક્ષ મલ્લિકાર્જુન ખડગેના ઘરે ગયા અને તેમને મળ્યા હતા. આ દરમિયાન કોંગ્રેસ નેતા રાહુલ ગાંધી અને બિહારના ડેપ્યુટી સીએમ તેજસ્વી યાદવ પણ હાજર હતા. ખડગેએ કહ્યું હતું કે અમારે વિપક્ષને એક કરીને લડવું પડશે. અમે તમામ વિપક્ષોને એક કરવાની દિશામાં કામ કરી રહ્યા છીએ. કેન્દ્રીય મંત્રી અનુરાગ ઠાકુરે પણ આ અંગે વિપક્ષ પર નિશાન સાધ્યું છે. તેમણે ગઠબંધનને તે પક્ષોનું 'ઠગબંધન' ગણાવ્યું હતું. જે ભ્રષ્ટાચારમાં ગળાડૂબ છે.
વિપક્ષી એકતા ભાજપ માટે ખતરો બની શકે
વિપક્ષી નેતાઓનું એકઠા થવું ભાજપ માટે સૌથી મોટો ખતરો સાબિત થઈ શકે છે. આથી ભાજપે હવે આ મુદ્દે વિપક્ષને ઘેરવાનું શરૂ કર્યું છે. વિપક્ષની આ બેઠકમાં અદાણી કેસમાં જેપીસીની માંગ અને રાહુલ ગાંધીને લોકસભામાંથી ગેરલાયક ઠેરવવા સામે વિપક્ષની સંયુક્ત લડાઈ પર પણ ચર્ચા થઈ હતી. કોંગ્રેસ સાથેની બેઠક બાદ નીતિશ કુમાર અને તેજસ્વીએ અરવિંદ કેજરીવાલના ઘરે બેઠક પણ કરી હતી. કેજરીવાલે કહ્યું હતું કે તેઓ તમામ પક્ષોને એક મંચ પર લાવવાના નીતિશ કુમારના પ્રયાસની સાથે છે.
નીતિશની વિપક્ષી નેતાઓ સાથે મુલાકાત
2024ની લોકસભા ચૂંટણી પહેલા નીતીશ કુમારની દિલ્હી મુલાકાતને ઘણી મહત્વપૂર્ણ માનવામાં આવે છે. નીતીશ પોતાના દિલ્હી પ્રવાસ પર ઘણા વિપક્ષી નેતાઓને મળવાના છે. આ પહેલા મંગળવારે (11 એપ્રિલ) તેઓ લાલુ યાદવની પુત્રી મીસા ભારતીના ઘરે પહોંચ્યા હતા. અહીં તેઓ લાલુ યાદવને મળ્યા હતા. બંને વચ્ચે વર્તમાન રાજકીય સ્થિતિ પર પણ ચર્ચા થઈ હતી. આ વખતે વિપક્ષનું સૌથી મોટું લક્ષ્ય ભાજપને સત્તા પરથી હટાવવાનું છે. બેઠક બાદ ખડગેએ આગામી લોકસભા ચૂંટણી અને વિધાનસભા ચૂંટણી માટે ગઠબંધનની જાહેરાત પણ કરી હતી. આ સાથે જ રાહુલે કહ્યું હતું કે આ બેઠક ઐતિહાસિક હતી અને પાર્ટીઓ ભાજપ વિરુદ્ધ સંયુક્ત લડાઈ લડશે.
