દિલ્હીમાં નકલી વિઝા બનાવવાના નામે 300 કરોડ રૂપિયાની છેતરપિંડીનો મામલો સામે આવ્યો છે. દિલ્હીના તિલક નગર વિસ્તારમાં 5 વર્ષથી આરોપીઓ દ્વારા છેતરપિંડીનો આ ખેલ ચાલી રહ્યો હતો. પોલીસે આ કેસમાં 7 લોકોની ધરપકડ કરી છે. આરોપીઓએ લગભગ 5 હજાર નકલી વિઝા બનાવ્યા છે જેના આધારે લોકો વિદેશ ગયા હતા.
અધિકારીઓના જણાવ્યા અનુસાર આ વર્ષે 2 સપ્ટેમ્બરે કુરુક્ષેત્રનો રહેવાસી સંદીપ નામનો વ્યક્તિ પોલીસના હાથે ઝડપાયો હતો. તેની પાસે નકલી સ્વીડિશ વિઝા હતા. તે ઇટાલી જવા માંગતો હતો. જ્યારે ઈમિગ્રેશન ચેકિંગ ચાલી રહ્યું હતું ત્યારે તે ઝડપાઈ ગયો હતો. સંદીપે પોલીસને જણાવ્યું કે તેની જેમ તેના ગામના ઘણા લોકોએ આવા જ વિઝા લીધા હતા. તેમાંથી ઘણા આવા વિઝા પર વિદેશમાં પણ કામ કરી રહ્યા છે. પોલીસ પૂછપરછ દરમિયાન સંદીપે જણાવ્યું કે તેણે વિઝા માટે એજન્ટ આસિફ અલીને 10 લાખ રૂપિયા આપ્યા હતા.
આરોપીએ પોલીસને જણાવ્યું હતું
આસિફ અલી ઉપરાંત સંદીપે પોલીસને શિવા ગૌતમ અને નવીન રાણાના નામ પણ જણાવ્યા હતા, જેમની પોલીસે ધરપકડ કરી હતી. શિવા ગૌતમે પોલીસને એજન્ટ બલવીર સિંહનું નામ જણાવ્યું. આ પછી પોલીસે દરોડા પાડીને બલબીર સિંહ અને તેના સહયોગી જસવિંદર સિંહની ધરપકડ કરી હતી. બંનેએ પોલીસને મનોજ મોંગા વિશે જણાવ્યું હતું. મનોજ મોંગા એ વ્યક્તિ છે જે તિલક નગરમાં નકલી વિઝા બનાવતો હતો.
પોલીસની ટીમે તિલક નગરમાં દરોડો પાડ્યો હતો. પોલીસના દરોડામાં મનોજ મોંગાની ધરપકડ કરવામાં આવી હતી. મનોજ મોંગાને ગ્રાફિક્સ ડિઝાઇનિંગનું સારું જ્ઞાન હતું. તેણે ડિપ્લોમા પણ કર્યો હતો. મનોજે પોલીસને જણાવ્યું કે, તે લગભગ 5 વર્ષ પહેલા જયદીપ સિંહને મળ્યો હતો. તેણે જ તેને આવું કૃત્ય કરવા માટે ઉશ્કેર્યો હતો.
વિઝા માટે 8 લાખ રૂપિયા વસૂલતા હતા
એક પોલીસ અધિકારીએ જણાવ્યું કે આરોપી એક મહિનામાં 50 થી 60 વિઝા બનાવતો હતો. આ માટે તે નકલી સ્ટીકરો લગાવતો હતો. વિઝા માટે 8 લાખ રૂપિયા વસૂલતા હતા. આરોપી લોકોને ફસાવવા માટે ટેલિગ્રામ, સિગ્નલ અને વોટ્સએપનો ઉપયોગ કરતો હતો. તેઓ આ એપ્સ દ્વારા લોકો સાથે વ્યવહાર કરતા હતા. પોલીસે આરોપીઓ પાસેથી 18 પાસપોર્ટ કબજે કર્યા છે. આ ઉપરાંત તેમની પાસેથી નકલી વિઝા સ્ટીકર પણ મળી આવ્યા છે.
