સંયુક્ત કિસાન મોરચા અને કિસાન મજદૂર મોરચાના નેતૃત્વમાં પંજાબ બંધનું એલાન આપવામાં આવ્યું છે. આ બંધ સવારે 7 થી સાંજના 4 વાગ્યા સુધી ચાલશે. આ સમયગાળા દરમિયાન તબીબી સંભાળ સહિતની આવશ્યક સેવાઓ ચાલુ રહેશે.
પંજાબમાં આજે ખેડૂતોની હડતાળ છે. ખેડૂતોના પંજાબ બંધની મોટી અસર રેલ ટ્રાફિક પર જોવા મળી રહી છે. ખેડૂતોના વિરોધને કારણે 221 ટ્રેનો રદ કરવામાં આવી છે અથવા તેના રૂટ ડાયવર્ટ કરવામાં આવ્યા છે. સંયુક્ત કિસાન મોરચા અને કિસાન મજદૂર મોરચાના નેતૃત્વમાં બંધનું એલાન આપવામાં આવ્યું છે. આ બંધ સવારે 7 થી સાંજના 4 વાગ્યા સુધી ચાલશે. આ સમયગાળા દરમિયાન તબીબી સંભાળ સહિતની આવશ્યક સેવાઓ ચાલુ રહેશે. પાક માટે MSP ગેરંટી કાયદા સહિત 13 માંગણીઓને લઈને ખેડૂતોના આંદોલનના સમર્થનમાં આજે પંજાબ બંધ છે. પંજાબમાં 200 સ્થળોએ રસ્તાઓ બંધ છે. જલંધર-દિલ્હી નેશનલ હાઈવે અને અમૃતસર-દિલ્હી હાઈવે પર ખેડૂતો બેઠા છે. મોહાલીમાં એરપોર્ટ રોડ બ્લોક કરી દેવામાં આવ્યો છે. પંજાબના મોહાલી જિલ્લામાં કાયદો અને વ્યવસ્થા જાળવવા માટે લગભગ 600 પોલીસકર્મીઓને તૈનાત કરવામાં આવ્યા છે. વરિષ્ઠ પોલીસ અધિકારીઓ સ્થિતિ પર ચાંપતી નજર રાખી રહ્યા છે.
ધાર્મિક અને સામાજિક સંગઠનોએ પણ આ બંધને સમર્થન આપ્યું
SGPC સહિત અનેક ધાર્મિક અને સામાજિક સંગઠનોએ પણ આ બંધને સમર્થન આપ્યું છે. એક ખેડૂત નેતાનું કહેવું છે કે પંજાબ બંધ દરમિયાન ઈમરજન્સી સેવાઓ ચાલુ રહેશે. આ સિવાય કોઈપણ લગ્ન સમારોહમાં જનાર વ્યક્તિ અને પરિવારને રોકવામાં આવશે નહીં. પંજાબમાં શિયાળાની રજાઓને કારણે શાળાઓ પહેલેથી જ બંધ છે. હડતાળના કારણે પંજાબ યુનિવર્સિટીએ સોમવારના બદલે મંગળવારે પરીક્ષા લેવાનો નિર્ણય કર્યો છે. બસ સેવાઓ સાથે સંકળાયેલી સંસ્થાઓએ કહ્યું છે કે સોમવારે સાંજે 4 વાગ્યા પછી સેવાઓ પુનઃસ્થાપિત કરવામાં આવશે.
તમને જણાવી દઈએ કે આ સાથે 15 ટ્રેનો મોડી ચાલી રહી છે જ્યારે 9 ટ્રેનો રોકી દેવામાં આવી છે. દોડાવવામાં આવી રહેલી ટ્રેનોને એવા સ્થળોએ રોકવામાં આવશે જ્યાં રેલવે મુસાફરોને કોઈ અસુવિધાનો સામનો ન કરવો પડે. ડીઆરએમ ઓફિસ ફિરોઝપુરના અધિકારીઓએ જણાવ્યું કે રેલવે મુસાફરો અસરગ્રસ્ત ટ્રેનો વિશે માહિતી મેળવતા રહેશે. આ માટે સ્ટેશનો પર હેલ્પ ડેસ્કની વ્યવસ્થા કરવામાં આવશે અને પબ્લિક એડ્રેસ સિસ્ટમ દ્વારા સતત માહિતી આપવામાં આવશે. ખેડૂત નેતા જગજીત સિંહ ડલ્લેવાલનો ઉપવાસ છેલ્લા 34 દિવસથી ચાલુ છે. ખનૌરીમાં ખેડૂત નેતાઓએ કહ્યું કે તેઓ તેમનો વિરોધ ચાલુ રાખવા માટે ગાંધીવાદી માર્ગને અનુસરી રહ્યા છે અને તે સરકારને નક્કી કરવાનું છે કે તે તેમના નેતાને દૂર કરવા બળનો ઉપયોગ કરવા માંગે છે કે નહીં.
