- નેશનલ કોન્ફરન્સ પાર્ટીના અધ્યક્ષ ફારૂક અબ્દુલ્લાએ રાજીનામું આપ્યુ
- પાર્ટીના રાષ્ટ્રીય પ્રવક્તા તનવીર સાદીકે રાજીનામાની કરી પુષ્ટિ
- ફારુક અબ્દુલ્લા ખરાબ તબિયતને કારણે હવે પાર્ટીનું નેતૃત્વ કરવા માંગતા નથી
જમ્મુ-કાશ્મીરના પૂર્વ મુખ્યમંત્રી અને નેશનલ કોન્ફરન્સ પાર્ટીના અધ્યક્ષ ફારૂક અબ્દુલ્લાએ હવે પાર્ટી અધ્યક્ષ પદ પરથી રાજીનામું આપી દીધું છે. પાર્ટીના રાષ્ટ્રીય પ્રવક્તા તનવીર સાદીકે ફારુક અબ્દુલ્લાના પ્રમુખ પદેથી રાજીનામું આપ્યાની પુષ્ટિ કરી છે. ફારુક અબ્દુલ્લાએ પણ આ નિર્ણય પાછળનું કારણ જણાવ્યું છે. તેમણે કહ્યું કે તેઓ તેમની ખરાબ તબિયતને કારણે હવે પાર્ટીનું નેતૃત્વ કરવા માંગતા નથી. શ્રીનગરમાં પાર્ટી કાર્યકર્તાઓને સંબોધતા તેમણે કહ્યું કે ખરાબ તબિયત હવે તેમને પાર્ટીનું નેતૃત્વ કરવા દેતી નથી.
ફારુક અબ્દુલ્લાના રાજીનામા સાથે, હવે પાર્ટીએ નવા પ્રમુખની પસંદગી કરવી પડશે. મળતી માહિતી મુજબ પાર્ટીના નવા અધ્યક્ષ માટે 5 ડિસેમ્બરે ચૂંટણી થઈ શકે છે. હાલમાં જ્યાં સુધી ચૂંટણી નહીં થાય ત્યાં સુધી ફારૂક પ્રમુખ પદ પર રહેશે. એવી અપેક્ષા રાખવામાં આવે છે કે હવે ફારુકના પુત્ર અને પૂર્વ મુખ્યમંત્રી ઓમર અબ્દુલ્લાને પાર્ટીની કમાન મળી શકે છે. ઉમર હાલમાં પાર્ટીના ઉપાધ્યક્ષની જવાબદારી નિભાવી રહ્યા છે. પાર્ટીના પ્રવક્તા તનવીર સાદિકે કહ્યું કે પાર્ટી અધ્યક્ષની ચૂંટણી માટે ટૂંક સમયમાં નોટિફિકેશન બહાર પાડવામાં આવશે.
