કોલકાતાના ઇન્ટરનેશનલ એરપોર્ટમાં લાગી આગ

• એરપોર્ટના ડિપાર્ચર સેક્શનમાં આગ લાગી
  
• શોર્ટ સર્કિટના કારણે આગ લાગી હોવાની આશંકા
• આગની ઘટનામાં કોઈ મોટું નુકસાન થયું નથી

કોલકાતાના નેતાજી સુભાષ ચંદ્ર બોઝ ઈન્ટરનેશનલ એરપોર્ટના ડિપાર્ચર સેક્શનમાં બુધવારે રાત્રે ભીષણ આગ ફાટી નીકળી હતી. એરપોર્ટમાં આગની જોરદાર જ્વાળાઓ નીકળતી જોવા મળી હતી. ઘટના અંગે ફાયર બ્રિગેડને જાણ કરવામાં આવતાં 3 ફાયર ફાઇટર્સ ઘટનાસ્થળે પહોંચ્યા હતા અને થોડી જ વારમાં આગ પર કાબૂ મેળવી લીધો હતો.

આગ પર કાબૂ મેળવાયો

આગ લગતા મુસાફરો અને એરલાઇન કર્મચારીઓને સૌપ્રથમ બહાર કાઢવામાં આવ્યા હતા. એરપોર્ટ ડાયરેક્ટર સી પટ્ટાભીએ જણાવ્યું કે તેઓ સ્થળ પર છે. આગને કાબુમાં લેવામાં આવી છે. કોઈને ઈજા થઈ નથી. આગ લાગવાનું કારણ હજુ સુધી જાણી શકાયું નથી. આગ ડિપાર્ચર સેક્શનમાં ચેક-ઈન કાઉન્ટર પાસે લાગી હતી. આ પછી, વિભાગ 3 પ્રસ્થાન માટે બંધ કરવામાં આવ્યો હતો.

શોર્ટ સર્કિટથી આગ લાગી હોવાની આશંકા

શોર્ટ સર્કિટના કારણે આગ લાગી હોવાની આશંકા છે, પરંતુ તપાસ બાદ ચોક્કસ કારણ સ્પષ્ટ થશે. આ માટે ટીમ તપાસ કરી રહી છે. આ ઘટનામાં કોઈ મોટું નુકસાન થયું નથી. ડિપાર્ચર લાઉન્જના ડી પોર્ટલ વિસ્તારમાં રાત્રે 9.10 કલાકે આગ લાગી હતી. ડી પોર્ટલ એ એવી જગ્યા છે જ્યાં મુસાફરોને બોર્ડિંગ પાસ મળે છે. આ પછી સુરક્ષા ચેક પોસ્ટના એક ભાગમાં પણ આગ લાગી હતી. શરૂઆતમાં, આગ ઓલવવા માટે એરપોર્ટની અંદર ઇનબિલ્ટ ફાયર ફાઇટિંગ સિસ્ટમનો ઉપયોગ કરવામાં આવ્યો હતો, પરંતુ પછી ફાયર બ્રિગેડને બોલાવવામાં આવી હતી.