- પંજાબના પૂર્વ સીએમના પત્ની ભાજપમાં જોડાયા
- પટિયાલાના સાંસદ પ્રનીત કૌર ભાજપમાં જોડાયા
- પટિયાલા બેઠક પરથી ભાજપ આપી શકે ટિકિટ
લોકસભા ચૂંટણીને લઈને પંજાબમાં હવે રાજકારણ ગરમાયું છે. રાજકીય પક્ષો વિવિધ રાજ્યોમાં પોતાના ઉમેદવારોના નામની જાહેરાત કરી રહ્યા છે. ત્યારે પટિયાલાના સાંસદ અને પૂર્વ સીએમ કેપ્ટન અમરિંદર સિંહની પત્ની પ્રનીત કૌર આજે ભાજપમાં જોડાયા છે. કહેવામાં આવી રહ્યું છે કે ભાજપ તેમને પટિયાલા બેઠક પરથી લોકસભા ચૂંટણીમાં ઉતારી શકે છે.
30 વર્ષમાં પહેલીવાર અહીંથી ચૂંટણી લડશે BJP
પ્રનીત કૌર પંજાબની પટિયાલા સીટથી ચાર વખત કોંગ્રેસના સાંસદ રહી ચૂક્યા છે. ભાજપ તેમને પટિયાલાથી સીટ આપી શકે છે કારણ કે તે છેલ્લા 25 વર્ષથી પટિયાલા લોકસભા સીટ પરથી ચૂંટણી લડી રહી છે. આ સાથે જ 30 વર્ષમાં આ પહેલીવાર બનશે જ્યારે આ સીટ પરથી બીજેપીનો કોઈ ઉમેદવાર ચૂંટણી લડશે.
કોંગ્રેસે સસ્પેન્ડ કર્યા હતા
ઉલ્લેખનીય છે કે કોંગ્રેસે 3 ફેબ્રુઆરી, 2023ના રોજ પાર્ટી વિરોધી ગતિવિધિઓના આરોપમાં પ્રનીતને સસ્પેન્ડ કરી દીધા હતા. જો કે, પ્રનીત કૌરે પાર્ટીમાંથી રાજીનામું આપ્યું ન હતું કારણ કે તે લોકસભાનું સભ્યપદ ગુમાવવા માગતા ન હતા. પ્રનીત પર આક્ષેપો થયા હતા કે તે સતત ભાજપના કાર્યક્રમોમાં હાજરી આપે છે એટલું જ નહીં તેમણે રાહુલ ગાંધીની ભારત જોડો યાત્રામાં પણ ભાગ લીધો ન હતો.
