પહેલા કોણાર્ક પછી નાલંદા અને હવે સાબરમતી આશ્રમ, દુનિયાએ જોઇ ભારતની સંસ્કૃત્તિ

• આજે 10 સપ્ટેમ્બરે G-20 સમિટનો બીજો દિવસ
  
• સમિટની બેઠક પહેલા તમામ G20 દેશોના નેતાઓ રાજઘાટ પહોંચ્યા
• જ્યાં વડાપ્રધાન મોદીએ તેમનું પરંપરાગત સ્વાગત કર્યું

ભારત મંડપમ... વિશ્વની સૌથી ભવ્ય G-20 ઇવેન્ટમાંની એકનું સાક્ષી બન્યું છે. આજે 10 સપ્ટેમ્બરે G-20 સમિટનો બીજો દિવસ છે અને PM મોદી ઘણા દેશોના રાષ્ટ્રાધ્યક્ષો સાથે વાત કરશે. સમિટની બેઠક પહેલા તમામ G20 દેશોના નેતાઓ રાષ્ટ્રપિતા મહાત્મા ગાંધીની સમાધિ રાજઘાટ પહોંચ્યા, જ્યાં વડાપ્રધાન મોદીએ તેમનું સ્વાગત કર્યું. અહિંસાના પૂજારી મહાત્મા ગાંધીને શ્રદ્ધાંજલિ આપવા માટે વિશ્વના તમામ મહાન નેતાઓ રાજઘાટ પહોંચ્યા ત્યારે વડાપ્રધાન મોદીએ ખાદી અંગવસ્ત્રમ પહેરીને દરેકનું સ્વાગત કર્યું હતું. PM મોદી રાજઘાટ પર જ્યાં વિદેશી મહેમાનોનું અભિવાદન કરી રહ્યા હતા તેની પાછળ સાબરમતી આશ્રમનું મોડલ દેખાઈ રહ્યું હતું.

ખાદીના ખેસ પહેરાવીને આવકાર્યા અને પછી સાબરમતી આશ્રમ વિશે જણાવ્યું

વડાપ્રધાન મોદીએ સૌપ્રથમ તમામ મહેમાનોને ખાદીના ખેસ પહેરાવીને આવકાર્યા અને પછી સાબરમતી આશ્રમ વિશે જણાવ્યું. તમને જણાવી દઈએ કે મહાત્મા ગાંધીએ સાબરમતી આશ્રમની ઝૂંપડીમાંથી ભારતને આઝાદ કરાવવા અંગ્રેજો વિરુદ્ધ આંદોલન શરૂ કર્યું હતું. સાબરમતી આશ્રમ ભારતને આઝાદ કરાવનાર આદર્શનું ઘર બની ગયું. સાબરમતી આશ્રમ આજે પ્રેરણા અને માર્ગદર્શનના સ્ત્રોત તરીકે સેવા આપે છે.

 'વૈષ્ણવજન તો તેને રે કહીએ, જે પીડ પરાઇ જાને રે...'

G-20 દેશોના નેતાઓએ રાજઘાટ પર મહાત્મા ગાંધીને શ્રદ્ધાંજલિ આપી. અહીં મહાત્મા ગાંધીનું પ્રિય ભક્તિ ગીત 'વૈષ્ણવજન તો તેને રે કહીએ, જે પીડ પરાઇ જાને રે...' સાંભળ્યું હતું. આ પહેલાં વડાપ્રધાન મોદીએ તમામ નેતાઓનું ખાદીની શાલ પહેરાવી સ્વાગત કર્યું હતું. પીએમ મોદીએ તમામ નેતાઓને રાજઘાટ વિશે પણ માહિતી આપી હતી. સાથે જ, સાબરમતીના બેકડ્રોપ પર મહાત્મા ગાંધીની કહાની પણ જણાવી રહ્યા છે. ઋષિ સુનક વહેલી સવારે દિલ્હી અક્ષરધામ મંદિર ગયા હતા. તેઓ ત્યાંથી સીધા રાજઘાટ બાપુને શ્રદ્ધાંજલિ આપવા પહોંચ્યા હતા.

ભારત મંડપમમાં રાષ્ટ્રપતિ દ્વારા રાત્રિભોજનનું આયોજન કરવામાં આવ્યું હતું

આ પહેલા શનિવારે જ્યારે PM મોદી G20 સમિટમાં વિદેશી નેતાઓનું સ્વાગત કરી રહ્યા હતા ત્યારે ઓડિશાના પ્રખ્યાત કોણાર્ક મંદિરનું સૂર્ય ચક્ર પૃષ્ઠભૂમિમાં હતું. પીએમ મોદીએ મહેમાનોને કોણાર્ક સૂર્ય મંદિર અને ચક્ર વિશે પણ માહિતી આપી હતી.

સ્વાગત મંચની પૃષ્ઠભૂમિમાં નાલંદા યુનિવર્સિટીની ઝલક દેખાતી હતી

તે જ સમયે, ભારત મંડપમમાં રાષ્ટ્રપતિ દ્વારા રાત્રિભોજનનું આયોજન કરવામાં આવ્યું હતું. આ દરમિયાન સ્વાગત મંચની પૃષ્ઠભૂમિમાં નાલંદા યુનિવર્સિટીની ઝલક દેખાતી હતી. વડાપ્રધાન મોદી જી-20ના કેટલાક નેતાઓને યુનિવર્સિટીનું મહત્વ જણાવતા પણ જોવા મળ્યા હતા. રાષ્ટ્રપતિ મુર્મુએ બ્રિટિશ વડા પ્રધાન ઋષિ સુનક સહિત જી-20 નેતાઓને નાલંદા યુનિવર્સિટીનું મહત્વ સમજાવ્યું. તમને જણાવી દઈએ કે નાલંદા યુનિવર્સિટી પ્રાચીન ભારતની પ્રગતિ દર્શાવે છે.