નવરાત્રિ પર કેન્દ્રીય કર્મચારીઓને ભેટ, DAમાં 4% વધારાની જાહેરાત..પગાર આટલો વધશે

• મોદી સરકારની દિવાળી પહેલા સરકારી કર્મચારીઓને ભેટ
  
• સરકારી કર્મચારીઓ અને પેન્શનરોને મોટી ભેટ આપી છે
• મોંઘવારી ભથ્થામાં વધારાને મંજૂરી આપવામાં આવી છે

મોદી સરકારે દિવાળી પહેલા સરકારી કર્મચારીઓ અને પેન્શનરોને મોટી ભેટ આપી છે. વડાપ્રધાન નરેન્દ્ર મોદીની અધ્યક્ષતામાં મળેલી કેબિનેટની બેઠકમાં કેન્દ્રીય કર્મચારીઓ અને પેન્શનરોના મોંઘવારી ભથ્થામાં વધારાને મંજૂરી આપવામાં આવી છે. મોંઘવારી ભથ્થામાં 4 ટકાના વધારા સાથે તેને 42 ટકાથી વધારીને 46 ટકા કરવામાં આવ્યો છે.

મોંઘવારી ભથ્થામાં વધારો કરવાની મંજૂરી

બુધવાર, 18 ઓક્ટોબર, 2023ના રોજ કેબિનેટની બેઠક યોજાઈ હતી, જેમાં મોંઘવારી ભથ્થામાં વધારાને મંજૂરી આપવામાં આવી હતી. કેન્દ્રીય કર્મચારીઓ અને પેન્શનરોને ઓક્ટોબર મહિનાનો પગાર મોંઘવારી ભથ્થામાં વધારા સાથે આપવામાં આવે તેવી શક્યતાઓ છે. ઓક્ટોબર મહિનાના પગારની સાથે કેન્દ્રીય કર્મચારીઓ અને પેન્શનધારકોને જુલાઈથી સપ્ટેમ્બરનું એરિયર્સ પણ આપી શકાય છે.

મોંઘવારી ભથ્થું 42% થી વધીને 46%!

નરેન્દ્ર મોદી સરકારે કેન્દ્રીય કર્મચારીઓના મોંઘવારી ભથ્થામાં 4 ટકા (4% DA વધારો) વધારો કર્યા બાદ હવે તે વધીને 46 ટકા થઈ ગયો છે. તેનો લાભ 1 જુલાઈ, 2023થી મળશે. ડીએમાં વધારા સાથે કર્મચારીઓના પગારમાં પણ ઉછાળો આવશે. વર્ષ 2023 માટે, સરકારે પહેલો સુધારો કર્યો હતો અને 24 માર્ચ, 2023 ના રોજ ડીએમાં વધારો જાહેર કર્યો હતો અને તે પછી, 1 જાન્યુઆરી, 2023 થી કર્મચારીઓ અને પેન્શનરોને વધેલા મોંઘવારી ભથ્થાનો લાભ ઉપલબ્ધ છે.

દિવાળી પહેલા નવરાત્રિ પર મળેલી ભેટ

15મી ઓક્ટોબરથી નવરાત્રીનો તહેવાર શરૂ થયો છે. 24મી ઓક્ટોબરે દશેરા છે. દિવાળી 12મી નવેમ્બર 2023ના રોજ છે. આવી સ્થિતિમાં તહેવારોની સિઝનમાં મોદી સરકારે કેન્દ્રીય કર્મચારીઓ અને પેન્શનરોના મોંઘવારી ભથ્થામાં વધારો કરવાનો નિર્ણય લીધો છે. કેન્દ્ર સરકારના આ નિર્ણયથી 47 લાખ કર્મચારીઓ અને 68 લાખ પેન્શનધારકોને ફાયદો થશે.