Himachal Flood: આગામી 4 દિવસ હિમાચલમાં ભારે વરસાદની ચેતવણી, 114 રસ્તાઓ બંધ

• હિમાચલમાં આગામી 4 દિવસ ભારે વરસાદની આગાહી
  
• કુદરતી આફતોના કારણે 114 રસ્તાઓ કરાયા બંધ
• 82 રૂટ પર તેની બસ સેવાઓ સ્થગિત કરવામાં આવી

હિમાચલ પ્રદેશમાં, વાદળ ફાટવા અને ભારે વરસાદને કારણે અચાનક પૂર અને ભૂસ્ખલનને કારણે 114 રસ્તાઓ બંધ થઈ ગયા છે. હવામાન વિભાગે શનિવારે 7 ઓગસ્ટ સુધી હિમાચલમાં ભારેથી અતિ ભારે વરસાદની ચેતવણી જારી કરી છે, ત્યારબાદ સાવચેતીના પગલા તરીકે રસ્તાઓ બંધ કરવાનો નિર્ણય લેવામાં આવ્યો છે.

અનેક રસ્તાઓ પર અવર જવર બંધ કરવામાં આવી

સ્ટેટ ઇમરજન્સી ઓપરેશન સેન્ટરના જણાવ્યા અનુસાર, વાહનોની અવરજવર માટે બંધ કરાયેલા રસ્તાઓમાંથી મંડીમાં 36, કુલ્લુમાં 34, શિમલામાં 27, લાહૌલ-સ્પીતિમાં આઠ, કાંગડામાં સાત અને કિન્નૌર જિલ્લામાં બે રસ્તાઓ બંધ કરવામાં આવ્યા હતા. એક અધિકારીએ જણાવ્યું કે હિમાચલ રોડ ટ્રાન્સપોર્ટ કોર્પોરેશને 82 રૂટ પર તેની બસ સેવાઓ સ્થગિત કરી દીધી છે.

હિમાચલના કેટલાક ભાગોમાં મધ્યમથી ભારે વરસાદની આગાહી

રાજ્યના કેટલાક ભાગોમાં મધ્યમથી ભારે વરસાદ પડી શકે છે. શુક્રવાર સાંજથી જોગીન્દરનગરમાં સૌથી વધુ 85 મીમી વરસાદ નોંધાયો છે, ત્યારબાદ ગોહર 80 મીમી, શિલારુ 76.4 મીમી, પાઓંટા સાહિબ 67.2 મીમી, પાલમપુર 57.2 મીમી, ધર્મશાલા 56.2 મીમી અને ચૌપાલ 52 મીમી વરસાદ નોંધાયો છે.

7 ઓગસ્ટ સુધી ભારે વરસાદ માટે યલો એલર્ટ જાહેર

હવામાન વિભાગે 7 ઓગસ્ટ સુધી ભારે વરસાદ માટે યલો એલર્ટ જાહેર કર્યું છે. અધિકારીઓએ જણાવ્યું કે 27 જૂનથી 1 ઓગસ્ટની વચ્ચે વરસાદ સંબંધિત ઘટનાઓમાં 77 લોકોએ જીવ ગુમાવ્યા અને 655 કરોડ રૂપિયાનું નુકસાન થયું. કુલ્લુના નિર્મંદ, સાંજ અને મલાનામાં સતત વાદળ ફાટવાને કારણે અચાનક પૂર આવ્યું; 31 જુલાઈની રાત્રે મંડીના પધર અને શિમલાના રામપુર સબ-ડિવિઝનમાં ઓછામાં ઓછા આઠ લોકોના મોત થયા હતા.

ડ્રોનની મદદથી ગુમ થયેલા લોકોની શોધ ચાલુ

શનિવારે સવારે વાદળ ફાટ્યા બાદ ગુમ થયેલા 45 લોકોની શોધખોળ ફરી શરૂ થઈ હતી, જેમાં આર્મી, એનડીઆરએફ, એસડીઆરએફ, આઈટીબીપી, સીઆઈએસએફ, હિમાચલ પ્રદેશ પોલીસ અને હોમગાર્ડની ટીમના 410 બચાવ કર્મચારીઓ ડ્રોનની મદદથી ગુમ થયેલા લોકોને શોધી રહ્યા હતા.