શંભુ બોર્ડર પર જોરદાર ભીડ, ખેડૂતોને મળી રહ્યો છે સપોર્ટ

• દેશમાં MSPની માંગને લઈને ખેડૂત આંદોલનના થયા 17 દિવસ પૂર્ણ 
  
• પંજાબ-હરિયાણાની શંભુ અને ખનૌરી બોર્ડર પર ભારે ગરમાવો 
• મૃતક ખેડૂત શુભકરણના ભટિંડાના બલ્લો ગામમાં અંતિમ સંસ્કાર

MSP ખરીદ ગેરંટી કાયદો અને અન્ય માંગણીઓને લઈને પંજાબ-હરિયાણાની શંભુ અને ખનૌરી બોર્ડર પર ચાલી રહેલા ખેડૂત આંદોલનના 17 દિવસ પૂર્ણ થઈ ગયા છે. બુધવારે મોડી રાત્રે FIR નોંધાયા બાદ, પટિયાલાની રાજીન્દ્રા હોસ્પિટલના ડોકટરોના બોર્ડે ખનૌરી સરહદ પર શહીદ શુભકરણના મૃતદેહનું પોસ્ટમોર્ટમ કરાવ્યું અને શ્રદ્ધાંજલિ આપ્યા બાદ ભટિંડાના બલ્લો ગામમાં ખેડૂતો દ્વારા અંતિમ સંસ્કાર કરવામાં આવ્યા.

જેના કારણે ગુરુવારે આખો દિવસ શંભુ બોર્ડર પર હંગામો મચી ગયો હતો અને ભારે ભીડ ત્યાં પહોંચી ગઈ હતી. એટલું જ નહીં મહિલાઓ, બાળકો અને વૃદ્ધો પણ કેન્દ્ર અને હરિયાણા સરકાર વિરુદ્ધ સૂત્રોચ્ચાર કરતા જોવા મળ્યા હતા. ગુરુવારે નિવૃત્ત સૈનિકો, કમિશન એજન્ટો, ઉદ્યોગપતિઓ અને અન્ય રાજ્યોના લોકો પણ શંભુ સરહદે પહોંચ્યા હતા.

શુભકરણના અંતિમ સંસ્કારને લઈને શંભુ બોર્ડર પર સવારની બેઠક મોડી સાંજ સુધી મોકૂફ રાખવામાં આવી હતી કારણ કે મુખ્ય નેતાઓ ભટિંડા ગયેલા હતા. ત્યાં હાજર કેટલાક ખેડૂત આગેવાનો કહી રહ્યા છે કે દિલ્હી કૂચ કરવાનો નિર્ણય મોડી રાત્રે જાહેર કરવામાં આવશે.

મહિલાઓ અને બાળકોનો જોશ આસમાને

ખેડૂતોના પરિવારમાંથી આવેલી મહિલાઓના ઉત્સાહમાં કોઈ ઘટાડો જોવા મળ્યો ન હતો. હાથમાં માઈક લઈને તેઓ કેન્દ્ર અને હરિયાણા સરકાર વિરુદ્ધ સૂત્રોચ્ચાર કરતી જોવા મળી હતી, સાથે સાથે MSP અને અન્ય માંગણીઓ વિશે પણ વિસ્તૃત માહિતી આપી હતી. ખેડૂતો દ્વારા લોકોને જાગૃત કરવા માંગ કરવામાં આવી હતી.તેમની લડતમાં બાળકો પણ સૂત્રોચ્ચાર કરતા જોવા મળ્યા હતા.