દેશના વિવિધ રાજ્યોમાં વાતાવરણમાં મોટો ફેરફાર જોવા મળી રહ્યો છે. ક્યાંક તીવ્ર ગરમીની શરૂઆત તો ક્યાંક વરસાદનુ આગમન થઇ ગયુ છે. જોકે ઠંડી તો હજુ ગઇ નથી. ઠંડીનો ચમકારો ઘણા રાજ્યોમાં હજી જોવા મળી રહ્યો છે. ત્યારે ઉત્તર ભારતમાં વાતાવરણ બદલાતું હોય તેમ લાગી રહ્યુ છે. કારણ કે પશ્ચિમી વિક્ષોભને કારણે ઉત્તર પ્રદેશ, રાજસ્થાન અને બિહાર સહિત ઘણા રાજ્યોમાં ઠંડી વધી છે. છેલ્લા કેટલાક દિવસોમાં દિલ્હીમાં હળવો વરસાદ નોંધાયો છે. વરસાદ બાદ તાપમાનમાં પણ ઘટાડો નોંધાયો હતો. દિલ્હી-એનસીઆરમાં પશ્ચિમી પવનો ફૂંકાઈ રહ્યા છે. જેના કારણે સવાર અને સાંજ ઠંડીમાં વધારો થયો છે.
અહીં પડશે વરસાદ
- હવામાન વિભાગના જણાવ્યા અનુસાર 6 અને 7 ફેબ્રુઆરીએ અરુણાચલ પ્રદેશ અને ઉત્તરપૂર્વ આસામમાં વાવાઝોડા અને વીજળી સાથે હળવાથી મધ્યમ વરસાદની સંભાવના છે.
- જ્યારે 7 ફેબ્રુઆરીએ અરુણાચલ પ્રદેશમાં કેટલાક સ્થળોએ ભારે વરસાદની સંભાવના છે.
- 8 ફેબ્રુઆરીએ પશ્ચિમ હિમાલય પ્રદેશ પર વધુ એક નવો પશ્ચિમી વિક્ષેપ આવવાની શક્યતા છે. પરિણામે 08 થી 11 ફેબ્રુઆરી દરમિયાન પશ્ચિમ હિમાલય પ્રદેશમાં છૂટાછવાયાથી હળવો વરસાદ અને હિમવર્ષાની સંભાવના છે.
- હવામાન આગાહી એજન્સી સ્કાયમેટનું કહેવું છે કે ગિલગિટ-બાલ્ટિસ્તાન, લદ્દાખ, જમ્મુ અને કાશ્મીર, હિમાચલ પ્રદેશ અને ઉત્તરાખંડમાં હળવાથી મધ્યમ વરસાદની શક્યતા છે. હિમવર્ષા પણ થઈ શકે છે. પંજાબ, હરિયાણા, દિલ્હી અને પશ્ચિમ ઉત્તર પ્રદેશમાં હળવા વરસાદની ચેતવણી આપવામાં આવી છે.
બિહાર સહિત આ રાજ્યોમાં ધુમ્મસની ચેતવણી
પશ્ચિમી વિક્ષોભને કારણે બિહારમાં ઠંડીની અસર ચાલુ છે. જોકે, તાપમાનમાં ધીમે ધીમે વધારો થવાની આગાહી છે. પટના, દરભંગા, મધુબની, મુઝફ્ફરપુર અને ગયા સહિત ઘણા જિલ્લાઓમાં આગામી થોડા દિવસો સુધી સવારે અને સાંજે ગાઢ ધુમ્મસ છવાયું રહેશે. પશ્ચિમી પવનોને કારણે ઠંડીની અસર રહેશે અને આગામી દિવસોમાં તાપમાનમાં વધઘટ પણ જોવા મળી શકે છે. બિહાર ઉપરાંત ઓડિશા અને હિમાચલ પ્રદેશમાં સવારે ગાઢ ધુમ્મસ છવાઈ જવાની શક્યતા છે.
હરિયાણા-પંજાબ હવામાન આગાહી
પશ્ચિમી વિક્ષોભની અસરને કારણે આગામી ત્રણ દિવસ માટે હરિયાણા અને પંજાબમાં વરસાદ અંગે ચેતવણી આપવામાં આવી છે. ગુરુગ્રામમાં છેલ્લા 24 કલાકમાં એર ક્વોલિટી ઇન્ડેક્સ (AQI) 302 નોંધાયો હતો, જે 'નીચલી' શ્રેણીમાં આવે છે, જ્યારે ફરીદાબાદનો AQI 217 હતો.
રાજસ્થાનમાં હવામાન કેવું રહેશે?
રાજસ્થાનમાં પશ્ચિમી વિક્ષોભને કારણે જયપુર, અજમેર, ધોલપુર અને બિકાનેર સહિત ઘણા જિલ્લાઓમાં હળવો વરસાદ પડ્યો છે. અજમેરમાં 3.4 મીમી, ધોલપુરમાં2.0 મીમી અને જયપુરમાં 1.0 મીમી વરસાદ નોંધાયો છે. સંગારિયામાં લઘુત્તમ તાપમાન 6.7 ડિગ્રી અને જેસલમેરમાં 8.4 ડિગ્રી નોંધાયું હતું. હવામાન વિભાગે આગાહી કરી છે કે આગામી દિવસોમાં વાદળોની ગતિવિધિ ચાલુ રહેશે.
