કેન્દ્રીય નાણાં પ્રધાન નિર્મલા સીતારમણે 1 ફેબ્રુઆરી, 2025 ના રોજ નાણાકીય વર્ષ 2025-26 માટે દેશનું બજેટ રજૂ કર્યું. નિર્મલા સીતારમણે તેમના બજેટ ભાષણમાં નવા ઇન્કમ ટેક્સ બિલની જાહેરાત કરી હતી. જેને ગયા અઠવાડિયે વડા પ્રધાન નરેન્દ્ર મોદીના નેતૃત્વ હેઠળની કેબિનેટે મંજૂરી આપી દીધી છે. હવે દેશનું નવું આવકવેરા બિલ આવતીકાલે એટલે કે ગુરુવાર, 13 ફેબ્રુઆરીએ સંસદમાં રજૂ થઈ શકે છે. 7 ફેબ્રુઆરીએ કેબિનેટની મંજૂરી મળ્યા બાદ તેને આવતા અઠવાડિયે રજૂ કરવામાં આવે તેવી અપેક્ષા હતી. કેબિનેટની મંજૂરી મળ્યા બાદ, નાણામંત્રીએ આ બાબતે મીડિયા સાથે વાત કરી હતી.
કાલે રજૂ થઇ શકે નવુ ઇન્કમ ટેક્સ બિલ
કેન્દ્રીય નાણાં પ્રધાન નિર્મલા સીતારમણે ગયા અઠવાડિયે 8 ફેબ્રુઆરીના રોજ મીડિયા સાથે વાત કરતા કહ્યું હતું કે આવતા અઠવાડિયે સંસદમાં એક નવું આવકવેરા બિલ રજૂ કરવામાં આવશે. નાણામંત્રીએ કહ્યું હતું કે લોકસભામાં બિલ રજૂ થયા પછી તેને વધુ ચર્ચા માટે નાણા અંગેની સંસદીય સ્થાયી સમિતિમાં મોકલવામાં આવશે. તેમણે કહ્યું હતું કે સંસદીય સમિતિ બિલ પર પોતાની ભલામણો આપશે, ત્યારબાદ તેને ફરીથી કેબિનેટમાં મોકલવામાં આવશે. સંસદીય સમિતિની ભલામણો પછી તેને ફરીથી કેબિનેટની મંજૂરીની જરૂર પડશે. મંજૂરી મળ્યા બાદ આ બિલ ફરીથી સંસદમાં રજૂ કરવામાં આવશે.
કેમ નવું ઇન્કમ ટેક્સ બિલ લવાશે?
તમને જણાવી દઈએ કે નવું આવકવેરા બિલ 2025 એ ભારતની કર પ્રણાલીમાં સુધારાના એક મોટા પ્રયાસનો એક ભાગ છે. નવા આવકવેરા બિલનો ઉદ્દેશ્ય હાલની કર પ્રણાલીમાં સુધારો કરવાનો અને તેને વધુ સુવ્યવસ્થિત, સરળ અને પારદર્શક બનાવવાનો છે.
હાલમાં ભારતમાં આ સિસ્ટમ આવકવેરા કાયદા 1961ના નિયમો હેઠળ કાર્યરત છે. નવું આવકવેરા બિલ પસાર થયા પછી તે આવકવેરા અધિનિયમ, 2025 બનશે અને આવકવેરા અધિનિયમ, 1961 નું સ્થાન લેશે. પ્રસ્તાવિત બિલમાં કરદાતાઓની સુવિધા માટે સરળ ભાષાનો સમાવેશ થશે અને કર નિયમો અને તેના વિભાગોને સરળ બનાવવાના પ્રયાસમાં વિભાગોની સંખ્યામાં 25-30 ટકાનો ઘટાડો થઈ શકે છે.
ટેક્સ સ્લેબમાં ફેરફાર
- 12 લાખ રૂપિયા સુધીની આવક પર કોઈ ટેક્સ નહીં લાગે.
- 12 લાખ રૂપિયાથી વધુ અને 16 લાખ રૂપિયા સુધીની આવક પર 15 ટકા ટેક્સ લાગશે.
- 15 લાખથી 20 લાખ રૂપિયાની આવક પર 20 ટકા ટેક્સ લાગશે.
- 20 લાખથી 25 લાખ રૂપિયાની આવક પર 25 ટકા ટેક્સ લાગશે.
- 25 લાખ રૂપિયાથી વધુ રકમ પર 30% ટેક્સ લાગશે.
- નોકરીયાત લોકો માટે રાહતના સમાચાર
- ઇન્કમટેક્સ પર 12 લાખ સુધી કોઇ ટેક્સ કપાશે નહી
- 1 લાખ મહિને આવક તો કોઇ ટેક્સ નહીં
