- આવનારો સમય એશિયન દેશોનો રહેવાનો આંતરરાષ્ટ્રીય નાણાભંડોળનો દાવો
- ચીન પહેલા જ્યારે અમેરિકા સરકીને ત્રીજા સ્થાને પહોંચી જશે
- 2075 સુધીમાં ભારતીય અર્થતંત્રનો આકાર વધીને 52.5 લાખ કરોડ ડૉલર સુધી પહોંચી શકે છે
આંતરરાષ્ટ્રીય નાણાભંડોળ (IMF)એ દાવો કર્યો છે કે આવનારો સમય એશિયન દેશોનો રહેવાનો છે અને જીડીપીની દૃષ્ટિએ દુનિયાના સૌથી મોટા બે દેશ એશિયાના જ રહેશે. IMFના અનુમાન અનુસાર વર્ષ 2075 સુધીમાં ચીન દુનિયાનું સૌથી મોટું અર્થતંત્ર ધરાવતો દેશ બની જશે, જ્યારે આ દૃષ્ટિએ ભારત બીજા નંબરે પહોંચી જશે. IMF દ્વારા પ્રસિદ્ધ કરવામાં આવેલા આંકડાઓ અનુસાર 2023માં ભારતનો જીડીપી 3.737 લાખ કરોડ ડૉલરનો છે, જે 2028 સુધીમાં વધીને 5.5 લાખ કરોડ ડૉલર થઇ જશે. એટલું જ નહીં આગામી ચાર દાયકામાં એટલે કે 2075 સુધીમાં ભારતીય અર્થતંત્રનો આકાર વધીને 52.5 લાખ કરોડ ડૉલર સુધી પહોંચી જઇ શકે છે. ચીન આ મામલે ભારતથી થોડું આગળ રહેશે. IMF અનુસાર હાલ ચીનનો જીડીપી 19.374 લાખ કરોડ ડૉલર છે, જે 2028 સુધીમાં 27.4 લાખ કરોડ ડૉલર અને 2075 સુધીમાં 57 લાખ કરોડ ડૉલરના સ્તરે પહોંચી જઇ શકે છે.
IMFના અનુસાર અમેરિકાનું અર્થતંત્ર ધીમું પડી જશે અને હાલ પહેલાં સ્થાને હોવા છતા તે સરકીને ત્રીજા સ્થાને પહોંચી જશે. 2023માં અમેરિકાનો જીડીપી 26.855 લાખ કરોડ ડૉલર છે, જ્યારે 2028માં તે 32.2 લાખ કરોડ ડૉલર અને 2075માં 51.5 લાખ કરોડ ડૉલર થઇ શકે છે. ભારત સરકાર છેલ્લા ઘણા સમયથી ભારતીય અર્થતંત્ર પાંચ લાખ કરોડનું કરવા કમર કસી રહી છે.
