Israel-Iran War: યુદ્ધની અસર ભારત સુધી પહોંચી..! દિલ્હીમાં ઈઝરાયેલ એમ્બેસીની સુરક્ષા વધારાઇ

મધ્ય-પૂર્વ એશિયાનો વિસ્તાર હાલમાં એક મોટા યુદ્ધ યથાવત છે. ઈરાને ઈઝરાયેલ પર સેંકડો મિસાઈલો છોડ્યા બાદ બંને દેશો વચ્ચે યુદ્ધની શક્યતા વધી ગઈ છે. આ તણાવની અસર ભારતમાં પણ જોવા મળી રહી છે. વાસ્તવમાં, ભારતની રાજધાની નવી દિલ્હીમાં સ્થિત ઇઝરાયેલ દૂતાવાસની આસપાસ પણ સુરક્ષા વ્યવસ્થા વધારી દેવામાં આવી છે.

ઈઝરાયેલની એમ્બેસી પાસે વિસ્ફોટ થયો હતો

વર્ષ 2021માં દિલ્હીના લુટિયન વિસ્તારમાં સ્થિત ઈઝરાયેલ એમ્બેસીની બહાર IED બ્લાસ્ટ થયો હતો. બ્લાસ્ટ સ્થળ પરથી એક પરબિડીયું મળી આવ્યું હતું જેના પર ઈઝરાયેલ એમ્બેસીનું સરનામું લખેલું હતું. આ વર્ષે પણ ઈઝરાયેલની એમ્બેસી પાસે સાંજે વિસ્ફોટ થયો હતો અને ઘટનાસ્થળેથી ઈઝરાયેલના રાજદૂતને અપશબ્દો સંબોધતો એક પત્ર મળી આવ્યો હતો.

નાગરિકોને ઈરાન જવાનું ટાળવાની સલાહ આપી

મધ્ય પૂર્વ અથવા પશ્ચિમ એશિયામાં વધતા તણાવને ધ્યાનમાં રાખીને, ભારત સરકારે બુધવારે નાગરિકોને અપીલ કરી છે કે તેઓ ઈરાનની તમામ બિનજરૂરી યાત્રાઓ ટાળે. ભારતીય વિદેશ મંત્રાલયે ઈરાનમાં પોતાના નાગરિકોને એલર્ટ રહેવા અને દૂતાવાસના સંપર્કમાં રહેવા વિનંતી કરી છે. ભારતે કહ્યું છે કે અમે આ ક્ષેત્રમાં સુરક્ષા સ્થિતિ પર નજીકથી નજર રાખી રહ્યા છીએ.

ઇઝરાયેલમાં ભારતીય નાગરિકો માટે માર્ગદર્શિકા

ઇઝરાયેલના તેલ અવીવમાં ભારતીય દૂતાવાસે પણ ઇઝરાયેલમાં ભારતીય નાગરિકો માટે માર્ગદર્શિકા જાહેર કરી છે. દૂતાવાસે કહ્યું છે કે, પ્રદેશમાં પ્રવર્તમાન પરિસ્થિતિને ધ્યાનમાં રાખીને, ઇઝરાયેલમાં તમામ ભારતીય નાગરિકોને એલર્ટ રહેવા અને સ્થાનિક અધિકારીઓ દ્વારા આપવામાં આવેલા સુરક્ષા પ્રોટોકોલનું પાલન કરવાની સલાહ આપવામાં આવી છે. દૂતાવાસે સાવચેતી રાખવા, દેશની અંદર બિનજરૂરી મુસાફરી ટાળવા અને સલામત આશ્રયસ્થાનની નજીક રહેવા જણાવ્યું છે. પરિસ્થિતિ પર નજીકથી નજર રાખવામાં આવી રહી છે અને તમામ ભારતીય નાગરિકોની સુરક્ષા સુનિશ્ચિત કરવા માટે ઇઝરાયેલના અધિકારીઓ સાથે નિયમિત સંપર્કમાં છે.