ભારતીય અવકાશ સંશોધન સંગઠન (ISRO) 18 મેના રોજ તેનો 101મો ઉપગ્રહ RISAT-18 લોન્ચ કરવા જઈ રહ્યું છે, જે પૃથ્વી નિરીક્ષણ અને દેખરેખ ક્ષમતાઓને વધારવા માટે મહત્વપૂર્ણ રહેશે. આ ઉપગ્રહ શ્રીહરિકોટાથી PSLV-C61 દ્વારા લોન્ચ કરવામાં આવશે. ISROના ચેરમેન વી નારાયણને ગુરુવારે એક પ્રેસ કોન્ફરન્સમાં જણાવ્યું હતું કે અમે જાન્યુઆરીમાં શ્રીહરિકોટાથી અમારું 100મું રોકેટ સફળતાપૂર્વક લોન્ચ કર્યું હતું, હવે 18 મેના રોજ, ભારતનો 101મો ઉપગ્રહ RISAT-18 પૃથ્વી નિરીક્ષણ ઉપગ્રહ તરીકે લોન્ચ કરવામાં આવશે. આ ઉપગ્રહનો ઉદ્દેશ્ય ભારતની દેખરેખ, રિમોટ સેન્સિંગ અને આપત્તિ પ્રતિભાવ ક્ષમતાઓને વધુ મજબૂત બનાવવાનો છે, જે દેશની સુરક્ષા અને સલામતીમાં મદદ કરશે.
ISROનું મિશન: રાષ્ટ્રીય સુરક્ષા અને જરૂરિયાતોને અનુસાર
ISROના ચેરમેન વી નારાયણને એ પણ સ્પષ્ટતા કરી કે બધા ISRO મિશન ભારતની સુરક્ષા અને રાષ્ટ્રીય જરૂરિયાતોને ધ્યાનમાં રાખીને આયોજન કરવામાં આવે છે. ભારતીય સશસ્ત્ર દળો માટે કોઈ ખાસ લોન્ચ યોજનાઓ વિશે પૂછવામાં આવતા તેમણે કહ્યું કે અમારા બધા કાર્યક્રમો આપણા લોકો અને દેશની સુરક્ષા માટે છે. અમે બીજા કોઈ દેશ સાથે સ્પર્ધા કરતા નથી. અમારું મિશન આપણી જરૂરિયાતોને ધ્યાનમાં રાખીને તૈયાર કરવામાં આવે છે.
શું છે ઈસરોનું આગામી મિશન?
ISROએ આગામી મિશન EOS-09 (RISAT-1B)ની પણ જાહેરાત કરી છે, જે 18 જૂન, 2025ના રોજ શ્રીહરિકોટાથી લોન્ચ કરવામાં આવશે. આ ઉપગ્રહ ભારતના પૃથ્વી નિરીક્ષણ કાર્યક્રમમાં બીજું એક મહત્વપૂર્ણ પગલું હશે. રાષ્ટ્રીય સુરક્ષા, દેખરેખ અને આપત્તિ વ્યવસ્થાપનમાં ISROના અવકાશ મિશન હવે વધુ મહત્વપૂર્ણ બની રહ્યા છે, જેનાથી દેશની તકનીકી અને વ્યૂહાત્મક શક્તિમાં વધારો થઈ રહ્યો છે.
