- કેજરીવાલની લીકર પોલિસી સ્કેમને લઇને ધરપકડ
- અન્ના હજારેએ કહ્યું કે કેજરીવાલે મારી વાત ક્યારેય ન માની
- પણ તેમની આ હાલતથી હું દુઃખી નહિ- અન્ના હજારે
દિલ્હીના કથિત દારૂ કૌભાંડમાં મુખ્યમંત્રી અરવિંદ કેજરીવાલની મુશ્કેલીઓ વધી રહી છે. આ દરમિયાન સામાજિક કાર્યકર્તા અણ્ણા હજારેએ કેજરીવાલની ધરપકડને લઈને મોટું નિવેદન આપ્યું છે. અણ્ણા હજારેએ કહ્યું કે મને દુઃખ છે કે તેમણે મારી વાત ન સાંભળી.
કેજરીવાલે મારી વાત ન સાંભળી- હજારે
અણ્ણા હજારેએ કહ્યું કે, મુખ્યમંત્રી બન્યા બાદ મેં કેજરીવાલને નવી દારૂનીતિને લઈને બે વખત પત્ર લખ્યા હતા. મને દુઃખ છે કે તેણે મારી વાત ન સાંભળી અને હવે તેની આ માટે ધરપકડ કરવામાં આવી છે. તેમણે વધુમાં જણાવ્યું કે જ્યારે કેજરીવાલ અને મનીષ સિસોદિયા હમણાં જ અમારી સાથે જોડાયા હતા ત્યારે મેં તેમને કહ્યું હતું કે હંમેશા દેશના કલ્યાણ માટે કામ કરો. પરંતુ તેણે આ વાત ધ્યાનમાં રાખી નહીં.તેમણે કહ્યું કે હવે હું તેમને કોઈ સલાહ નહીં આપીશ. કાયદો અને સરકારે જે કરવું હોય તે કરો.
દારૂ નીતિ શરૂઆતથી વિવાદમાં
મહત્વનું છે કે દિલ્હીની નવી દારૂ નીતિ નવેમ્બર 2021માં અમલમાં આવી હતી. પરંતુ આ નીતિ શરૂઆતથી જ વિવાદમાં રહી હતી. બાદમાં, દિલ્હીના તત્કાલિન મુખ્ય સચિવે એલજી વીકે સક્સેનાને એક રિપોર્ટ સોંપ્યો હતો, જેમાં દારૂની નીતિમાં અનિયમિતતાનો આક્ષેપ કરવામાં આવ્યો હતો. બાદમાં સીબીઆઈએ કેસ નોંધ્યો હતો. ઇડીએ મની લોન્ડરિંગની તપાસ માટે કેસ પણ નોંધ્યો હતો.
દારૂ કૌભાંડમાં પકડાયેલા ચોથા નેતા
કેજરીવાલ દિલ્હીના આ કથિત દારૂ કૌભાંડમાં પકડાયેલા ચોથા મોટા નેતા છે. તેમની પહેલા મનીષ સિસોદિયાની ગયા વર્ષે 26 ફેબ્રુઆરીએ ધરપકડ કરવામાં આવી હતી. ગયા વર્ષે જ 4 ઓક્ટોબરે EDએ આમ આદમી પાર્ટીના રાજ્યસભા સાંસદ સંજય સિંહની ધરપકડ કરી હતી. ત્યારબાદ આ મહિને 15 માર્ચે EDએ તેલંગાણાના પૂર્વ સીએમ કેસીઆરની પુત્રી કે. કવિતાની પણ ધરપકડ કરવામાં આવી હતી.
EDની કસ્ટડીમાં કેજરીવાલ
હાલમાં કેજરીવાલ EDની કસ્ટડીમાં છે. તેને આજે પીએમએલએ કોર્ટમાં રજૂ કરવામાં આવશે. આ દરમિયાન કેજરીવાલના વકીલોએ તેમની ધરપકડને પડકારતી અરજી સુપ્રીમ કોર્ટમાં કરી હતી. પરંતુ હવે તેણે આ અરજી પાછી ખેંચી લીધી છે. કેજરીવાલના વકીલ અભિષેક મનુ સિંઘવીએ કોર્ટને કહ્યું કે હકીકતમાં કેજરીવાલના રિમાન્ડ અને સુપ્રીમ કોર્ટમાં તેમની અરજી એકબીજા સાથે સંઘર્ષમાં છે. તેથી અમે પિટિશન પાછી ખેંચી લેવાનું નક્કી કર્યું છે
