Lok Sabha Election:622કરોડ રૂપિયાની નેટવર્થ સાથે કોંગ્રેસના સ્ટાર-ચંદ્રુ બીજા તબક્કાના સૌથી-ધનવાન ઉમેદવાર

• બીજા તબક્કાનું મતદાન નજીક આવી રહ્યું છે ત્યારે સૌથી ધનિક ઉમેદવારોની યાદી સામે આવી
  
  
  
• ઓલ્ડ મૈસૂર માંડયા બેઠક પરથી કોંગ્રેસના ઉમેદવાર વેંકટરમણ ગૌડાની વાર્ષિક આવક 16.28 કરોડ
• વેંકટરમણ ગૌડાની પત્ની કુસુમા ગૌડા પાસે 329.32 કરોડની ચલ-અચલ સંપત્તિ

દેશમાં લોકસભાની ચૂંટણી ચાલી રહી છે તથા પ્રથમ તબક્કાનું મતદાન થઈ ચૂક્યું છે. હવે બીજા તબક્કાનું મતદાન નજીક આવી રહ્યું છે તેની વચ્ચે લોકસભાના બીજા તબક્કાના ચૂંટણી જંગમાં સૌથી અમીર ઉમેદવારોની યાદી સામે આવી છે. એસોસિયેશન ફોર ડેમોક્રેટિક રિફોર્મ્સ(એડીઆર)ના એક રિપોર્ટ અનુસાર બીજા તબક્કાના સૌથી ધનાઢય ઉમેદવાર સ્ટાર ચંદ્રુ તરીકે પ્રસિદ્ધ અને કોંગ્રેસના ઉમેદવાર વેંકટરમણ ગૌડા છે જેમની કુલ નેટવર્થ રૂ. 600 કરોડથી વધુ છે.

એડીઆરના રિપોર્ટ અનુસાર સૌથી અમીર લોકસભાના ઉમેદવાર સ્ટાર ચંદ્રુની કુલ સંપત્તિ રૂ. 622.97 કરોડથી વધુની છે, જે તેણે લોકસભાના ઉમેદવારી પત્ર સાથે જોડેલા સોગંદનામામાં જણાવી છે. લોકસભાની ચૂંટણીમાં ઓલ્ડ મૈસૂર માંડયા બેઠક પરથી કોંગ્રેસના ઉમેદવાર વેંકટરમણ ગૌડાએ પોતાના સોગંદનામામાં જણાવ્યું છે કે તેની વાર્ષિક આવક 16.28 કરોડની છે.

ગત ચૂંટણીના સૌથી ધનિક ઉમેદવારને પછાડયા

બેસુમાર દોલતના માલિક સ્ટાર ચંદ્રુએ 2019ની લોકસભાની ચૂંટણીમાં સૌથી ધનવાન ઉમેદવાર સાબિત થયેલાં ડી.કે. સુરેશને પણ પાછળ છોડી દીધા છે. એડીઆરના રિપોર્ટ અનુસાર વેંકટરમણ ગૌડાએ 2,12,78,08,148 રૂપિયાની ચલ સંપત્તિ અને 4,10,19,20,693 રૂપિયાની અચલ સંપત્તિ જાહેર કરી છે. આ રીતે તેની કુલ સંપત્તિ 6,22,97,28,841 રૂપિયા છે. ખાસ બાબત એ છે કે સ્ટાર ચંદ્રુના નામ પર કોઈ કૃષિ જમીન નથી. તેની પત્ની કુસુમા ગૌડાની પાસે 329.32 કરોડની ચલ-અચલ સંપત્તિ હોવાનું તેણે જણાવ્યું છે.

સ્ટાર ચંદ્રુનો સામનો એચ.ડી.કુમારસ્વામી સામે થશે

વેંકટરમણ ગૌડા ઉર્ફે સ્ટાર ચંદ્રુ વ્યવસાયથી એક કોન્ટ્રાક્ટર છે તથા ગૌરીબિદાનુરથી ચૂંટાયેલાં અપક્ષ ધારાસભ્ય કેએચ પટ્ટાસ્વામી ગૌડાના ભાઈ છે. પટ્ટાસ્વામી પણ હાલમાં કોંગ્રેસમાં છે. ગૌડાએ બેંગલુરુ યુનિ.માંથી બીએસસીની ડિગ્રી હાંસલ કરી છે. માંડયાની બેઠક પર તેનો મુકાબલો એનડીએના ઉમેદવાર અને જેડીએસના પ્રદેશ અધ્યક્ષ એચ.ડી. કુમારસ્વામી સામે થશે.