- લોકસભા ચૂંટણીના બીજા તબક્કાનું મતદાન શાંતિપૂર્ણ રીતે પૂર્ણ
- બીજા તબક્કામાં 13 રાજ્યોની 88 સીટો પર થયું મતદાન
- સાંજે 7 વાગ્યા સુધી લગભગ 61 ટકા મતદાન નોંધાયું
લોકસભા ચૂંટણીના બીજા તબક્કાનું મતદાન શાંતિપૂર્ણ રીતે થયું છે. પંચના જણાવ્યા અનુસાર શુક્રવારે બીજા તબક્કામાં 13 રાજ્યોની 88 સીટો પર સાંજે 7 વાગ્યા સુધી લગભગ 61 ટકા મતદાન નોંધાયું હતું.
લોકસભા ચૂંટણી 2024ના બીજા તબક્કાનું મતદાન શુક્રવાર, 26 એપ્રિલે પૂર્ણ થયું હતું. દેશના 13 રાજ્યોની કુલ 88 બેઠકો પર થયેલા આ મતદાનમાં લોકોએ ઉત્સાહભેર મતદાન કર્યું હતું. ચૂંટણી પંચે કહ્યું છે કે દેશના 14 રાજ્યો અને કેન્દ્રશાસિત પ્રદેશોમાં હવે મતદાન પૂર્ણ થઈ ગયું છે. જોકે, વિવિધ રાજ્યોમાં ચૂંટણીના હજુ 5 તબક્કા બાકી છે. ચૂંટણીનો બીજો તબક્કો પૂરો થયા બાદ પીએમ મોદીએ પણ NDAને જંગી સમર્થન મળવાનો દાવો કર્યો છે.
60 ટકાથી વધુ મતદાન
ચૂંટણી પંચ દ્વારા આપવામાં આવેલી માહિતી અનુસાર, લોકસભા ચૂંટણી 2024ના બીજા તબક્કામાં લગભગ 61 ટકા મતદાન થયું હતું. એવું માનવામાં આવે છે કે છેલ્લી અપડેટ આવે ત્યાં સુધી આ આંકડો વધી શકે છે. જો કે, 2019માં યોજાયેલી છેલ્લી લોકસભા ચૂંટણીના બીજા તબક્કામાં 13 રાજ્યોની 95 બેઠકો પર 67.6 ટકા મતદાન થયું હતું. માનવામાં આવી રહ્યું છે કે આકરી ગરમીને કારણે બંને તબક્કામાં ઘણા લોકો મતદાન મથકો પર પહોંચ્યા ન હતા.
વોટિંગ પર PMએ શું કહ્યું?
બીજા તબક્કાની ચૂંટણી પૂર્ણ થયા બાદ પીએમ મોદીએ કહ્યું છે કે એનડીએને જોરદાર સમર્થન મળશે. તેમણે કહ્યું કે ભારતીય જનતા પાર્ટીના નેતૃત્વવાળી NDA માટે લોકસભા ચૂંટણીનો બીજો તબક્કો ઘણો સારો રહ્યો છે. PMએ કહ્યું કે તેઓ આજે દેશભરમાં મતદાન કરનારા લોકોનો આભાર માને છે. એનડીએને જે બેજોડ સમર્થન મળી રહ્યું છે તે વિપક્ષોને વધુ નિરાશ કરશે. પીએમએ દાવો કર્યો કે મતદારો એનડીએ પાસેથી સુશાસન ઈચ્છે છે. યુવા અને મહિલા મતદારો એનડીએને મજબૂત સમર્થન આપી રહ્યા છે.
ક્યાં અને કેટલું મતદાન?
- ત્રિપુરામાં 78.53 ટકા મતદાન
- મણિપુરમાં 77.18 ટકા મતદાન
- ઉત્તર પ્રદેશમાં 53.71 ટકા મતદાન
- મહારાષ્ટ્રમાં 53.84 ટકા મતદાન
- કેરળમાં 65.23 ટકા મતદાન
- છત્તીસગઢમાં 72.61 ટકા મતદાન
- મધ્યપ્રદેશમાં 55.77 ટકા મતદાન
- આસામમાં 70.68 ટકા મતદાન
- કર્ણાટકમાં 69.23 ટકા મતદાન
- બિહારમાં 54.91 ટકા મતદાન
- પશ્ચિમ બંગાળમાં 71.84 ટકા મતદાન
- જમ્મુ-કાશ્મીરમાં 72.21 ટકા મતદાન
