Mahakumbh Stampede Live: સીએમ યોગી જશે પ્રયાગરાજ, દિલ્હીનો પ્રવાસ રદ કર્યો

અત્યાર સુધી 5.71 કરોડ શ્રદ્ધાળઓએ લગાવી આસ્થાની ડૂબકી 

ઉત્તર પ્રદેશ માહિતી વિભાગ અનુસાર, આજ સાંજે 4 વાગ્યા સુધીમાં 5.71 કરોડથી વધુ ભક્તોએ ત્રિવેણી સંગમમાં પવિત્ર સ્નાન કર્યું છે. 28 જાન્યુઆરી સુધીમાં કુંભ મેળા વિસ્તારમાં કુલ 19.94 કરોડ લોકોએ પવિત્ર સ્નાન કર્યું છે.

મૌની અમાવસ્યાએ  રેલવે દ્વારા 190 સ્પેશિયલ ટ્રેન ચલાવી

ઉત્તર મધ્ય રેલ્વેના સીપીઆરઓ શશિકાંત ત્રિપાઠીએ જણાવ્યું હતું કે મૌની અમાવસ્યા પર સ્નાન કર્યા પછી, મોટી સંખ્યામાં શ્રદ્ધાળુઓ રેલ્વે પરિસર તરફ આવી રહ્યા છે. હવે ધીમે ધીમે ભીડ રેલ્વે સ્ટેશન તરફ આગળ વધી રહી છે. બપોર સુધીમાં કુલ 80થી વધુ ખાસ ટ્રેનો ચલાવવામાં આવી હતી. - લગભગ 50 ઉત્તર મધ્ય રેલ્વે દ્વારા, 13 ઉત્તર રેલ્વે દ્વારા અને 20 ઉત્તર પૂર્વ રેલ્વે દ્વારા. લોકોને કોઈ અસુવિધા ન થાય તે માટે રેલ્વે વહીવટીતંત્રે આજે 190 વિશેષ ટ્રેનો ચલાવવાની યોજના બનાવી. 

CM યોગી જઇ શકે છે પ્રયાગરાજ, દિલ્હીનો પ્રવાસ રદ્દ

યુપી સીએમ યોગી આદિત્યનાથ આવતીકાલે દિલ્હી જવાના હતા. પરંતુ હવે દિલ્હીનો કાર્યક્રમ રદ્દ કર્યો છે. તેઓ આવતીકાલે પ્રયાગરાજ જઇ શકે છે. તેઓ મહાકુંભ મેળાની સુરક્ષાને લઇને અધિકારીઓ સાથે બઠક કરી શકે છે. આ ઉપરાંત તેઓ ઘટના સ્થળની પણ મુલાકાત લઇ શકે છે. 

કુંભમાં પહેલીવાર ત્રણેય શંકરાચાર્યોએ સંગમમાં એકસાથે ડૂબકી લગાવી

આ વખતે કુંભ મેળામાં એક ઐતિહાસિક દ્રશ્ય જોવા મળ્યું. જ્યારે ત્રણેય જગદગુરુ શંકરાચાર્યોએ સાથે સંગમમાં ડૂબકી લગાવી. તેઓ અરૈલ વીઆઈપી ઘાટથી હોડી દ્વારા સંગમ તટ પહોંચ્યા અને  સ્નાન કર્યું. આ પછી, સાહી સ્નાનનું આયોજન કરવામાં આવ્યું. આ પ્રસંગે  શંકરાચાર્યોએ ધાર્મિક શ્રદ્ધા અને એકતાનું પ્રતીક બનીને તમામ ભક્તોને આશીર્વાદ આપ્યા.

બપોરે 2 વાગ્યા સુધી 5.04 કરોડ લોકોએ લગાવી આસ્થાની ડૂબકી

મૌની અમાવસ્યાના અવસર પર કરોડો ભક્તો આજે મહાકુંભમાં ડૂબકી લગાવવા માટે પહોંચ્યા છે. એક તરફ અખાડાઓનું અમૃત સ્નાન ચાલી રહ્યું છે, તો બીજી તરફ ભક્તો પણ ડૂબકી લગાવી રહ્યા છે. આજે બપોરે 2 વાગ્યા સુધીમાં, 5.04 કરોડ લોકોએ સ્નાન કર્યું છે. 13 જાન્યુઆરીએ મહાકુંભની શરૂઆત થઈ ત્યારથી અત્યાર સુધીમાં કુલ 25 કરોડ લોકોએ મહાકુંભમાં ડૂબકી લગાવી છે.

સંગમ તરફ આગળ વધ્યા સાધુ- સંતો

મૌની અમાવસ્યાના અવસર પર, સંતો અને નાગા સાધુઓ, અમૃત સ્નાન માટે ત્રિવેણી સંગમ તરફ આગળ વધી રહ્યા છે. સાધુઓ અને સંતો રથ અને વાહનો પર સવાર થઈને અમૃત સ્નાન માટે જઇ રહ્યા  છે.

આપણે હિંદુ છીએ, સનાતની છીએ- અવધેશાનંદગિરિ મહારાજ 

મૌની અમાવસ્યા પર જુના અખાડાના આચાર્ય મહામંડલેશ્વર સ્વામી અવધેશાનંદ ગિરી મહારાજે કહ્યું કે અમને લાગ્યું કે અમારા કારણે ભક્તોને કોઈ મુશ્કેલીનો સામનો ન કરવો જોઈએ. તેથી અમે અમારું સ્નાન મુલતવી રાખ્યું હતું, જોકે હવે પરિસ્થિતિ નિયંત્રણમાં છે, તેથી અમે સ્નાન કરવા આવ્યા છીએ. બધા અખાડાઓ સાથે સ્નાન કરવાના છે. મારો સંદેશ એ છે કે ભારત એક હોવું જોઈએ અને આપણે જાતિના આધારે વિભાજીત ન થવું જોઈએ, આપણે હિન્દુ છીએ, આપણે સનાતની છીએ.

હેલિકોપ્ટરથી પુષ્પવર્ષા 

અમૃત સ્નાન માટે અખાડા નીકળ્યા છે. 13 અખાડાઓના સંતો મહંતો અમૃત સ્નાન માટે જઇ રહ્યા છે. આ રૂટ પર ચાંપતો બંદોબસ્ત ખડકી દેવાયો છે. સંતો પર હેલિકોપ્ટરથી ફુલો વરસાવવામાં આવી રહ્યા છે.

13 અખાડાના સંતો નીકળ્યા અમૃત સ્નાન માટે 

મૌની અમાવસ્યાના પ્રસંગે સંતો અને નાગા સાધુઓ અમૃત સ્નાન માટે ત્રિવેણી સંગમ તરફ પ્રયાણ કરી રહ્યા છે. એક પછી એક સ્નાન કરવા જશે. પંચાયતી અખાડા, નિર્મોહી અખાડા, મહાનિર્વાણી અખાડા, નિરંજની અખાડા, આનંદ અખાડા, જૂના અખાડા, વૈરાગી અખાડા, દિંગબર અની અખાડા, પંચાયતી નિર્મલ અખાડા, આવાહન અખાડા, પંચાગ્નિ અખાડા એમ તમામ 13 અખાડા અમૃત સ્નાન કરવા પહોંચ્યા છે. 

અત્યાર સુધીમાં 20 કરોડ શ્રદ્ધાળુઓ નોંધાયા

મૌની અમાવસ્યા નિમિત્તે ત્રિવેણીના ઘાટના ડ્રોન ફૂટેજ સામે આવ્યા છે. આ દ્રશ્યોમાં મોટી સંખ્યામાં શ્રદ્ધાળુઓ અમૃત સ્નાન માટે પહોંચતા જોવા મળી રહ્યા છે.  આજે બપોરે 12 વાગ્યા સુધીમાં, લગભગ 4.24 કરોડ શ્રદ્ધાળુઓએ પવિત્ર સ્નાન કર્યું છે. આજ સુધીમાં પવિત્ર સ્નાન કરનારા શ્રદ્ધાળુઓની કુલ સંખ્યા 20 કરોડને વટાવી ગઈ છે.

મહાકુંભ પ્રયાગરાજ અખાડાનું અમૃત સ્નાન શરૂ

મહાકુંભમાં અખાડાઓના અમૃત સ્નાનની શરૂઆત થઈ, સંતો અને ઋષિમુનિઓ અમૃત સ્નાન કરી રહ્યા છે

નાસભાગ બાદ રેલવેએ ટ્રેનો અંગે સ્પષ્ટતા આપી હતી

મહા કુંભની નાસભાગની ઘટના પછી પ્રયાગરાજ સ્ટેશનની વર્તમાન સ્થિતિ અંગે રેલવે બોર્ડના પીઆરઓ દિલીપ કુમારે કહ્યું કે અમે આ મહાકુંભ માટે રેલવે દ્વારા બનાવેલી વ્યાપક યોજના મુજબ કામ કરી રહ્યા છીએ. આજે મૌની અમાસનો દિવસ છે, આજે અમારું આયોજન હતું કે મૌની અમાસમાં સ્નાન કર્યા પછી જ્યારે ભક્તો તેમના ઘરે જવા રવાના થશે, ત્યારે ત્યાંથી વધુ સંખ્યામાં અનરિઝર્વ્ડ ક્લાસની ટ્રેનો દોડશે જેથી વધુ લોકો મુસાફરી કરી શકે.

આજે 4 કરોડથી વધુ ભક્તોએ મહાકુંભમાં સ્નાન કર્યું

થોડા સમય બાદ અખાડાના સાધુ-સંતો અમૃતસ્નાન કરશે.

પીડિત પરિજનો પ્રત્યે સંવેદના વ્યક્ત કરુ છું- પીએમ મોદી 

યાગરાજમાં જે ઘટના થઇ તેનાથી દુઃખી છુ. કેટલાક પુણ્યાત્માઓને ગુમાવવા પડ્યા છે. કેટલાક લોકો ઇજાગ્રસ્ત થયા છે. હું પ્રભાવિત પરિવારો પ્રત્યે સંવેદના વ્યક્ત કરુ છું. અને ઇજાગ્રસ્તે જલ્દી સ્વસ્થ થાય તેવી કામના કરુ છું. હું રાજ્ય સરકાર સાથે સતત સંપર્કમાં છું. મૌની અમાસને કારણે કરોડો શ્રદ્ધાળુઓ આજે મહાકુંભ પહોંચ્યા છે. કેટલાક સમય માટે સ્નાનની પ્રક્રિયામાં વિક્ષેપ આવ્યો હતો, પરંતુ છેલ્લા ઘણા કલાકોથી સુચારુ રૂપે યાત્રીઓ સ્નાન કરી રહ્યા છે. હું ફરી એકવાર એ પરિજનો પ્રત્યે સંવેદના વ્યક્ત કરુ છું. 

દિલ્હીમાં જાહેર સભા પહેલા પીએમ મોદીએ વ્યક્ત કર્યુ દુઃખ 

દિલ્હી વિધાનસભાની ચૂંટણીને લઇને પીએમ મોદી દિલ્હીના કરતાર નગર પહોંચ્યા હતા. અહીં તેમણે જાહેર સભા સંબોધી હતી. પરંતુ સભા સંબોધન પહેલા તેમણે પ્રયાગરાજમાં મહાકુંભમાં થયેલી નાસભાગને લઇને દુઃખ વ્યક્ત કર્યુ હતું.

કેન્દ્રીય ગૃહમંત્રી અમિત શાહે વ્યક્ત કર્યુ દુઃખ

મહાકુંભમાં થયેલા દુ:ખદ અકસ્માતથી હું ખૂબ જ દુઃખી છું. આ અકસ્માતમાં પોતાના પ્રિયજનો ગુમાવનારાઓ પ્રત્યે હું સંવેદના વ્યક્ત કરું છું. ભગવાન તેમને આ દુઃખ સહન કરવાની શક્તિ આપે. વહીવટીતંત્ર ઘાયલોને હોસ્પિટલોમાં સારવાર આપી રહ્યું છે. હું ઉત્તર પ્રદેશના મુખ્યમંત્રી અને સ્થાનિક વહીવટીતંત્ર સાથે સતત સંપર્કમાં છું.

'અમૃત સ્નાન શરૂ થવાનું છે'- ડીઆઈજી વૈભવ કૃષ્ણા

મહાકુંભના ડીઆઈજી વૈભવ કૃષ્ણાએ જણાવ્યું હતું કે અમૃત સ્નાન શરૂ થવાનું છે. તે પરંપરાગત ક્રમમાં થશે... પોલીસ અને વહીવટીતંત્ર બધા અખાડાઓને તેમના પરંપરાગત ક્રમમાં જવા માટે મદદ કરશે... પરિસ્થિતિ નિયંત્રણમાં છે. અમે આજે સવારની ઘટનાના કારણની તપાસ કરી રહ્યા છીએ. લોકોની ભારે ભીડને કારણે આ ઘટના બની હતી. 10 કરોડથી વધુ લોકોના આવવાની અપેક્ષા છે.

કોઈ નાસભાગ નહોતી, ભારે ભીડ હતી- એસએસપી રાજેશ દ્વિવેદી

કુંભ મેળાના એસએસપી રાજેશ દ્વિવેદીએ જણાવ્યું હતું કે કોઈ ભાગદોડ થઈ નથી, વધુ પડતી ભીડ હતી જેના કારણે કેટલાક ભક્તો ઘાયલ થયા... કોઈપણ અફવાઓ પર ધ્યાન ન આપો. હું ભક્તોને અપીલ કરું છું કે જે ઘાટ તેમના માટે બનાવવામાં આવ્યા છે ત્યાં આરામથી સ્નાન કરે.  અમૃત સ્નાન ટૂંક સમયમાં શરૂ થવાનું છે જે શાંતિ પૂર્ણ રીતે સંપન્ન થશે. . ઘણા ઘાટ બનાવવામાં આવ્યા છે અને લોકો ત્યાં સરળતાથી સ્નાન કરી રહ્યા છે. 

રાષ્ટ્રપતિ દ્રૌપદી મુર્મૂએ દુઃખ વ્યક્ત કર્યું

પ્રયાગરાજ મહાકુંભમાં થયેલી ભાગદોડની ઘટના અત્યંત દુઃખદ છે. હું મૃતકોના પરિવારજનો પ્રત્યે સંવેદના વ્યક્ત કરું છું અને ભગવાનને પ્રાર્થના કરું છું કે ઘાયલ થયેલા તમામ ભક્તો જલ્દી સ્વસ્થ થાય.

પીએમ મોદીએ વ્યક્ત કર્યુ દુઃખ

પ્રયાગરાજ મહાકુંભમાં બનેલી દુર્ઘટના અત્યંત દુઃખદ છે. આ દુર્ઘટનામાં પોતાના પ્રિયજનો ગુમાવનારા ભક્તો પ્રત્યે મારી ઊંડી સંવેદના. આ સાથે, હું તમામ ઘાયલોના ઝડપી સ્વસ્થ થવાની કામના કરું છું. સ્થાનિક વહીવટીતંત્ર પીડિતોને શક્ય તમામ મદદ પૂરી પાડવામાં વ્યસ્ત છે. આ સંદર્ભમાં, મેં મુખ્યમંત્રી યોગીજી સાથે વાત કરી છે અને હું સતત રાજ્ય સરકારના સંપર્કમાં છું.

થોડીવારમાં અમૃત સ્નાન માટે જશે અખાડા

મહાકુંભમાં હાલ સ્થિતિ સામાન્ય છે. નિયંત્રિત છે. શ્રદ્ધાળુઓના સ્નાન બાદ હવે અખાડા સ્નાન કરવા જશે. તમામ 13 અખાડા અમૃત સ્નાન કરવા જશે. આ માટે સંગમ ઘાટ ખાતે સુરક્ષા વ્યવસ્થા કડક કરવામાં આવી છે. સંગમ તટને ખાલી કરવામાં આવ્યો છે. 

અનરિઝર્વ્ડ ટિકિટ કાઉન્ટર, એટીવીએમ અને મોબાઈલ ટિકિટિંગની વ્યવસ્થા હશે

આરક્ષિત મુસાફરો, જેમની ટિકિટ પહેલાથી જ આરક્ષિત છે, તેમને શહેરની બાજુએ આવેલા ગેટ નંબર પાંચમાંથી અલગ પ્રવેશ આપવામાં આવશે. જ્યારે બિનઆરક્ષિત મુસાફરોને કલર કોડેડ આશ્રયસ્થાનો દ્વારા દિશા મુજબ પ્રવેશ આપવામાં આવશે.

નિવેદન અનુસાર, ફક્ત આશ્રયસ્થાનોમાં જ અનરિઝર્વ્ડ ટિકિટ કાઉન્ટર, એટીવીએમ અને મોબાઈલ ટિકિટિંગની વ્યવસ્થા હશે. ભીડના વધારાના દબાણને નિયંત્રિત કરવા માટે ખુસરો બાગમાં એક લાખ લોકોને રહેવાની વ્યવસ્થા કરવામાં આવી છે.

મૌની અમાસના તહેવાર પર, નૈની જંક્શનમાં પ્રવેશ ફક્ત સ્ટેશન રોડથી જ થશે અને બહાર નીકળવું ફક્ત વેરહાઉસની બાજુથી જ હશે. તેવી જ રીતે, આરક્ષિત મુસાફરોને ગેટ નંબર બેથી અલગ પ્રવેશ આપવામાં આવશે, જ્યારે પ્રયાગરાજ છિવકી સ્ટેશન પર, પ્રવેશ ફક્ત પ્રયાગરાજ-મિર્ઝાપુર હાઇવેને જોડતા સીઓડી માર્ગ દ્વારા જ થશે અને બહાર નીકળો માત્ર G.E. સી નૈની રોડથી રહેશે.

 પ્રયાગરાજ જંકશનમાં પ્રવેશ ફક્ત શહેરના દરવાજા અને પ્લેટફોર્મ નંબર 1 પરથી આપવામાં આવશે

એવું કહેવામાં આવ્યું છે કે મૌની અમાસના સ્નાન પર્વના દિવસે, પ્રયાગરાજ જંકશનમાં પ્રવેશ ફક્ત શહેરના દરવાજા અને પ્લેટફોર્મ નંબર 1 પરથી આપવામાં આવશે. એક્ઝિટ માત્ર સિવિલ લાઈન્સ અને પ્લેટફોર્મ નંબર 6 પરથી જ થશે.

ત્રિવેણી સંગમમાં સુરક્ષા તેજ 

મૌની અમાવસ્યાના અવસરે અખાડાઓ અને સંતોના અમૃત સ્નાન માટે પોલીસનો માર્ગ મોકળો થતાં ત્રિવેણી સંગમ ખાતે ભારે સુરક્ષા વ્યવસ્થા ગોઠવવામાં આવી છે.

કોઇ પણ ટ્રેન રદ્દ નથી- રેલવે વિભાગ 

પ્રયાગરાજ આવનારી કોઇ પણ ટ્રેન રદ નથી.  પ્રયાગરાજથી દર 4 મિનિટે ટ્રેન ચાલી રહી છે. 360 વઘારે ટ્રેન પ્રયાગરાજ માટે ચાલી રહી હોવાનું રેલવે વિભાગે જણાવ્યું છે. ખાલી મુગલસરાયથી કુંભ સ્પેશિયલ ટ્રેન આગામી આદેશ સુધી રદ કરવામાં આવી છે.  પ્રયાગરાજ આવતી જતી ટ્રેનો ચાલુ જ છે. 

અત્યાર સુધીમાં 3.61 ભક્તોએ લગાવી આસ્થાની ડૂબકી 

આજે અત્યાર સુધીમાં 3.61 કરોડથી વધુ લોકોએ ત્રિવેણીના પાણીમાં પવિત્ર ડૂબકી લગાવી છે, જેમાં 28 જાન્યુઆરી સુધીમાં કુલ 19.94 કરોડથી વધુ લોકોએ સ્નાન કર્યું છે તેમ  ઉત્તર પ્રદેશ માહિતી વિભાગે જણાવ્યું હતું. 

ત્રિવેણી સંગમ ઘાટ ખાલી કરાવવાની તજવીજ 

 મહાકુંભના DIG, વૈભવ કૃષ્ણએ ઘોડા પર સવાર પોલીસ કર્મચારીઓને ત્રિવેણી સંગમ ઘાટ ખાલી કરવા માટે શ્રદ્ધાળુઓને ખસેડવા આદેશ આપ્યો. 

શ્રદ્ધાળુઓની સુરક્ષા સુનિશ્ચિત કરવા ટીમ તૈનાત 

મૌની અમાવસ્યા પર મહાકુંભ વિસ્તારમાં ભીડ જામી રહી છે, ત્યારે તમામ શ્રદ્ધાળુઓની સુરક્ષા સુનિશ્ચિત કરવા માટે, બોમ્બ ડિટેક્શન અને ડિસ્પોઝલ સ્ક્વોડની એક ટીમ સ્નિફર ડોગ સાથે આ વિસ્તારની નિયમિત તપાસ કરે છે.

મૌની અમાવસ્યા મોડી રાત સુધી, સ્નાનની ઉતાવળ ન કરો 

સીએમ યોગી આદિત્યનાથે ભક્તોને એમ પણ કહ્યું કે મૌની અમાવસ્યા મોડી રાત સુધી છે. ભક્તો સ્નાન કરવાની ઉતાવળ ન કરે. સંગમ સુધી આવવાની જરૂર નથી. જે સ્નાન માટે અસ્થાયી ઘાટ બનાવવામાં આવ્યા છે ત્યાં સ્નાન કરો. અફવાઓ પર ધ્યાન ન આપો. સાથે જ ગંભીર રીતે ઘાયલોની સારવાર ચાલી રહી હોવાનું પણ જણાવ્યું હતું. 

નજીકના ઘાટ પર જ સ્નાન કરો-સીએમ યોગી 

પ્રયાગરાજમાં પરિસ્થિતિ નિયંત્રણમાં છે પરંતુ ભીડ મોટી છે. વિવિધ અખાડાઓના સંતોએ નમ્રતાપૂર્વક કહ્યું છે કે ભક્તોએ પહેલા પવિત્ર સ્નાન કરવું જોઈએ અને ભીડ ઓછી થયા પછી અખાડા પવિત્ર સ્નાન માટે આગળ વધશે. સંગમ તટ, નાગ વાસુકી માર્ગ અને સંગમ માર્ગ પર મોટી ભીડ છે. હું ભક્તોને અપીલ કરું છું કે કોઈ પણ અફવા પર ધ્યાન ન આપે. સમગ્ર કુંભ વિસ્તારમાં ઘાટ બનાવવામાં આવ્યા છે, ભક્તોએ ફક્ત સંગમ તટ તરફ જવાની જરૂર નથી. ભક્તોએ તેમની નજીકના ઘાટ પર પવિત્ર સ્નાન કરવું જોઈએ.

પીએમ મોદી અને ગૃહમંત્રી સંપર્કમાં- સીએમ યોગી

 સંગમ તટ તરફ ભક્તોની અવરજવરને કારણે સતત દબાણ છે. અખાડા માર્ગ પર બેરિકેડિંગ પાર કરવાનો પ્રયાસ કરતી વખતે કેટલાક શ્રદ્ધાળુઓને ગંભીર ઇજાઓ પહોંચી છે. ઘાયલોને તબીબી સારવાર માટે હોસ્પિટલોમાં ખસેડવામાં આવ્યા છે. ગઈકાલે રાત્રે મૌની અમાસની શરૂઆત થતા મોટી સંખ્યામાં શ્રદ્ધાળુઓ આવી રહ્યા છે. પીએમએ અત્યાર સુધીમાં ચાર વખત પરિસ્થિતિનો અભ્યાસ કર્યો છે. કેન્દ્રીય ગૃહમંત્રી અમિત શાહ અને રાજ્યપાલ આનંદીબેન પટેલ પણ સતત પરિસ્થિતિનો અહેવાલ લઈ રહ્યા છે.

હાલ સ્થિતિ નિયંત્રણમાં- સીએમ યોગી 

વધુમાં જણાવ્યું કે હાલ સ્થિતિ નિયંત્રણમાં છે.  સંગમ તટ પર પહોંચવામાં લોકોએ દોટ મૂકી.  જો કે હાલમાં શ્રદ્ધાળુઓ સ્નાન કરી રહ્યા છે. ત્યારબાદ અખાડાઓનું સ્નાન શરૂ થશે. અખાડાના પ્રમુખો સાથે વાત થઇ છે.  પહેલા શ્રદ્ધાળુઓ સ્નાન કરશે. 

કેટલાક શ્રદ્ધાળુઓ ગંભીર રીતે ઘાયલ- સીએમ યોગી

સીએમ યોગીએ વધુમાં જણાવ્યું કે હાલ 8થી 10 કરોડ શ્રદ્ધાળુઓ છે. બેરિકેડ આવવાથી કેટલાક શ્રદ્ધાળુઓ ઘાયલ થયા છે. પીએમ મોદીએ ફોન પર 4 વાર સ્થિતિ વિશે તાગ મેળવ્યો છે. ભારે ભીડ છે હાલ પ્રયાગરાજમાં.  અફવાઓ પર ધ્યાન ન આપો.

રાત્રે 1થી દોઢ વાગ્યાની વચ્ચે બની ઘટના- સીએમ યોગી

સીએમ યોગીએ ભાગદોડને લઇને મીડિયા સાથે વાતચીત કરતા જણાવ્યુ કે  મહાકુંભમાં શ્રદ્ધાળુઓની ભારે ભીડ છે.  વ્યવસ્થા બનાવવામાં સહયોગ કરવા લોકોને અપીલ કરી છે. ગૃહમંત્રી અમિત શાહે સ્થિતિનો તાગ મેળવ્યો છે.  પીએમ મોદીએ સવારે 4 વાગે ફોન કર્યો. 

અફવાઓ પર ધ્યાન ન આપો: સીએમ યોગી

ઉત્તર પ્રદેશના મુખ્યમંત્રી યોગી આદિત્યનાથે ભક્તોને અપીલ કરી છે કે જે ઘાટ નજીક હોય ત્યાં સ્નાન કરો.  સંગમ તટ તરફ જવાનો પ્રયાસ ન કરવો જોઈએ. સ્નાન માટે ઘણા સ્નાનઘાટ બનાવવામાં આવ્યા છે. સ્નાન ગમે ત્યાં કરી શકાય છે. વહીવટીતંત્રની સૂચનાઓનું પાલન કરો. વ્યવસ્થા કરવામાં મદદ કરો. કોઈપણ અફવાઓ પર ધ્યાન ન આપો. 

જે ઘાટ નજીક હોય ત્યાં સ્નાન કરો, સીએમ યોગીની અપીલ

સીએમ યોગીએ ભાગદોડની ઘટનાને પગલે  પ્રશાસનોનો નિર્દેશોનું પાલન કરવા સૂચના આપી છે. સાથે જ શ્રદ્ધાળુઓને નજીકના ઘાટ પર જ સ્નાન કરવા અપીલ કરી છે. 

અત્યાર સુધીમાં 20 કરોડ લોકો ડૂબકી લગાવી

મૌની અમાવાસ્યાના પવિત્ર તહેવાર પર, સવારે 6 વાગ્યા સુધી 1.75 કરોડ લોકોએ સ્નાન કર્યું. જ્યારે 13 જાન્યુઆરીથી 29 જાન્યુઆરી સુધીમાં 20 કરોડ લોકોએ પવિત્ર સ્નાન કર્યું. 

અખાડા પરિષદની જાહેરાત: ભીડ વિખેરાઈ ગયા પછી અખાડાઓ સ્નાન માટે જશે

અખાડા પરિષદના પ્રમુખ રવિન્દ્ર પુરીએ જાહેરાત કરી છે કે અખાડા હવે સ્નાન માટે જશે. હવે ભીડ વિખેરાઈ ગયા પછી, આપણે સ્નાન કરવા જઈશું. અખાડાઓ રથ સાથે સ્નાન કરશે, જોકે તેમાં થોડી છૂટછાટ હશે.

પ્રયાગરાજ આવતી સ્પેશિયલ ટ્રેનો રદ

મહાકુંભમાં થયેલી ભાગદોડ બાદ વહીવટીતંત્રે મોટો નિર્ણય લીધો છે અને પ્રયાગરાજ આવતી બધી ખાસ ટ્રેનો રદ કરી દીધી છે. રેલવે અધિકારી મનીષ કુમારે જણાવ્યું હતું કે આગામી આદેશ સુધી ખાસ ટ્રેનોનું સંચાલન બંધ કરવામાં આવ્યું છે. નિયમિત ટ્રેનો દોડતી રહેશે. ભારે ભીડને કારણે ખાસ ટ્રેનો બંધ કરવામાં આવી છે.