મહારાષ્ટ્રમાં આગામી 20 નવેમ્બરે યોજાનારી વિધાનસભાની ચૂંટણીને ધ્યાનમાં રાખીને વડાપ્રધાન નરેન્દ્ર મોદીએ પણ ચૂંટણી પ્રચારની આજથી જ શરૂઆત કરી દીધી છે. PM મોદીએ શુક્રવારે મહારાષ્ટ્રના ધુલેમાં ચૂંટણી રેલીને સંબોધી હતી. પીએમ મોદીએ સભામાં આવેલા લોકોનો આભાર વ્યક્ત કર્યો અને આ પછી તેમણે મહાવિકાસ અઘાડી પર પ્રહારો કર્યા. પીએમ મોદીએ રેલીમાં કહ્યું કે જ્યારે પણ મેં મહારાષ્ટ્ર પાસેથી કંઈક માંગ્યું છે ત્યારે મહારાષ્ટ્રની જનતાએ મને દિલથી આશીર્વાદ આપ્યા છે.
ભારે જનમેદનીને સંબોધતા પીએમ મોદીએ કહ્યું કે, અમારે માટે જનતા ઈશ્વરનું રૂપ છે. અમે જનતાની સેવા માટે રાજનીતિમાં આવ્યા છીએ. વડાપ્રધાન નરેન્દ્ર મોદીએ જનમેદનીને કહ્યું કે, હું વર્ષ-2014ની વિધાનસભા ચૂંટણી વખતે તમારી વચ્ચે ધુલે આવ્યો હતો. મેં તમને મહારાષ્ટ્રમાં ભાજપ સરકાર માટે વિનંતી કરી હતી. તમે મહારાષ્ટ્રમાં 15 વર્ષના લાંબા રાજકીય ચક્રને તોડીને ભાજપને અભૂતપૂર્વ જીત અપાવી. આજે હું ફરી એકવાર અહીં ધુલેની ધરતી પર આવ્યો છું. હું ધુલેથી જ મહારાષ્ટ્રમાં ચૂંટણી પ્રચારની શરૂઆત કરી રહ્યો છું.
પીએમ મોદીએ કહ્યું કે કેટલાક લોકોની રાજનીતિનો આધાર માત્ર લૂંટ છે. મહાવિકાસ આઘાડીના વાહનમાં માત્ર ડ્રાઈવર સીટ માટે જ લડાઈ છે. તેની કારમાં ન તો વ્હીલ છે કે ન તો બ્રેક. જ્યારે તેઓ સત્તામાં આવે છે ત્યારે વિકાસ અટકાવે છે. અમારી યોજનાઓ MVA સહન કરતી નથી. પીએમ મોદીએ કહ્યું કે અમે જનતાની સેવા કરવા માટે રાજકારણમાં છીએ. પીએમ મોદીએ કહ્યું કે આગામી 5 વર્ષ મહારાષ્ટ્રની પ્રગતિને નવી ઊંચાઈ પર લઈ જશે. મહારાષ્ટ્રને જે સુશાસનની જરૂર છે તે માત્ર મહાયુતિ સરકાર જ આપી શકે છે.
ધુલેમાં રેલીમાં આવેલા લોકોને પીએમ નરેન્દ્ર મોદીએ કહ્યું કે, અમને, ભાજપ, મહાયુતિ, મહાયુતિના દરેક ઉમેદવારને તમારા આશીર્વાદની જરૂર છે. હું તમને ખાતરી આપું છું કે છેલ્લા અઢી વર્ષમાં મહારાષ્ટ્રના વિકાસને જે ગતિ મળી છે તેને રોકવા દેવામાં આવશે નહીં. પીએમ મોદીએ કહ્યું કે મહાયુતિનું વચન ઉત્તમ છે, મહાયુતિના સંકલ્પો પર ચર્ચા થઈ રહી છે.
પીએમ મોદીએ રેલીમાં કહ્યું કે મહાવિકાસ અઘાડીના લોકો મહિલાઓ સાથે દુર્વ્યવહાર કરે છે. મહારાષ્ટ્રના લોકો તેમને માફ નહીં કરે. તેઓ મહિલાઓને સશક્તિકરણ થવા દેવા માંગતા નથી. તેઓ મહિલાઓનું અપમાન કરે છે. આ લાડલી બહેના યોજના બંધ કરાવશે.
